Witbooi-Bybel spoedig terug

Tanja Bause – Hendrik Witbooi se Familiebybel en sweep is uiteindelik op pad huis toe.

Dié tradisionele artefakte sal op 26 Februarie vanuit Duitsland in Namibië aankom, het die minister van onderwys, kuns en kultuur, me. Katrina Hanse-Himarwa, aangekondig.

Op 27 Februarie sal besoek gebring word aan Hornkranz, waar die Bybel en sweep op 12 April 1893 tydens ’n botsing tussen Duitse troepe en kaptein Witbooi se soldate deur die Duitsers afgeneem is.

“Die Bybel en sweep het by die Linder-museum in Stuttgart in Duitsland opgeëindig. Aanvanklik sou dié items deel van die derde terugbring van menslike oorskot vanuit Duitsland na Namibië wees,” het sy gesê.

Verlede Augustus het Hanse-Himarwa ’n afvaardiging van 80 Namibiërs Duitsland toe gelei.

“Die afvaardiging het uit ’n verskeidenheid mense bestaan, en het beide erkende en nie-erkende tradisionele leiers van Namibië ingesluit. Die hele afvaardiging, insluitende die Nama- Tradisionele Leiersvereniging (NTLA), is voor die vertrek Duitsland toe deur my, die visepresident en die president ingelig dat ons die menslike oorskot en die Bybel op ’n verenigde en waardige manier moet gaan haal, wat ons as nasie sal eer sonder om die meningsverskil te verskuil,” het die minister gesê.

Volgens haar was dit duidelik die afvaardiging se sending was om die 32 stuks Namibiese menslike oorskot en die Bybel en sweep te repatrieer.

“Veral omdat die afvaardiging mnre. Solomon en Hendrik Ismael Witbooi ingesluit het. Niemand, insluitende die leiers van die Witbooi-familie, het in enige stadium besware teen die teruggee van die items teenoor die regering of die gemeenskap geopper nie.

“My ministerie, die Witbooi-familie en ’n afvaardiging uit Baden Württemberg, Duitsland, het besluit die items sal op 26 Februarie in Namibië aankom.”

Op 28 Februarie sal ’n optog padlangs tussen Windhoek en Gibeon die items begelei.

Op Rehoboth, Kalkrand en Mariental sal vir gebed gestop word.

“Op 1 Maart sal die Bybel en sweep aan pres. Hage Geingob oorhandig word. Die president sal dit vir veilige bewaring in Namibië se nasionale argiewe aan my oorhandig,” het sy gesê.

Die oorspronklike Bybel, ’n gesertifiseerde afskrif daarvan, asook ’n digitale kopie sal in regeringsbewaring bly.

Die Bybel is met spesiale chemikalieë behandel sodat dit nog vir die volgende 100 jaar bewaar sal bly, dus sal dit in ’n verseëlde houer bewaar word.

“’n Gesertifiseerde kopie sal op Gibeon uitgestal word by ’n plek wat in oorleg met die familie gekies is tot die Hendrik Witbooi-museum gebou is. Hier sal al die artefakte, besittings en oudiovisuele materiaal van dié legendariese mens uitgestal word,” het Hanse-Himarwa gesê.

“Die feit dat ons, die Namibiese regering, die amptelike oorhandiging op Gibeon doen is die hoogste eer, erkenning en respek vir die Nama-volk in die geheel, asook en die /Khowese/Witbooi-stam,” het sy gesê.