Windkragboere skep ruim
’n Ontwikkelaar voorsien ’n nuwe bloeitydperk vir die windkragbedryf oor die komende jare as die regering se geïntegreerde hulpbronplan van krag word.
Francois Williams – Boere in Suid-Afrika op wie se plase ’n kommersiële windplaas gebou word, kry ’n stewige finansiële inspuiting daaruit.
Benewens betalings wat hulle kry wanneer hul plaas betree word vir aanvanklike toetse en studies, en betalings vir die ongerief tydens konstruksiewerk van die windplaas, word die plaas op ’n langtermynhuurkontrak van die boer gehuur, al kan hy soos gewoonlik met sy landboubedrywighede voortgaan.
Dr. Kilian Havemann, uitvoerende hoof van die windkragontwikkelaar G7 Renewables, sê wanneer die windplaas begin krag verkoop aan Eskom, kry die grondeienaars waarop die windturbines gebou is boonop enigiets tussen 0,8% tot 1% van die omset uit kragverkope.
Havemann het tydens ’n onderhoud by die Africa Utility Week in Kaapstad gesê ’n windplaas neem omtrent net sowat ’n halwe tot een hektaar per windturbine se ruimte op, en sowat 99% van die grond is onaangeraak.
Hy voorsien ’n nuwe bloeitydperk vir die windkragbedryf oor die komende jare as die regering se geïntegreerde hulpbronplan (IRP) van krag word. Die IRP is die bloudruk vir kraglewering tot 2050 en is veronderstel om gereeld hersien te word. Volgens een uitgelapte weergawe van die nuwe IRP sal die regering toelaat dat sowat 1 600 MW se nuwe windkragvermoë van 2023 tot 2030 gebou word.
G7 kyk tans na nuwe persele vir windplaasontwikkeling. Havemann meen hoewel die laaghangende vrugte reeds in die eerste rondes van die groenkragprogram gepluk is, is daar nog heelwat goeie plekke veral in die Wes-, Noord- en Oos-Kaap waar nuwe windplase gebou kan word. Daar is selfs plek-plek gebiede in die Vrystaat, Limpopo, Mpumalanga en KwaZulu-Natal waar daar potensiaal is vir windkrag, sê Havemann.
Die “beste” plekke vir windplase wat meestal reeds ingeneem is, is waar die wind die standhoudendste waai en waar dit terselfdertyd naby ’n Eskom-kraglyn is. Die persele waarna daar nou gesoek word het dalk goeie wind, maar is ver van die naaste Eskom-substasie of kraglyn, of dit is naby ’n kraglyn, maar die windtoestande is wisselvallig.
Eskom en windkragontwikkelaars werk toenemend saam, en Eskom gee ontwikkelaars byvoorbeeld toestemming om self ’n nuwe kraglyn na die naaste Eskom-substasie te bou as Eskom nie die tyd en geld daarvoor het nie.
Die kragkoopkontrakte by windplase strek gewoonlik oor 20 jaar, maar Havemann sê die tendens in Europa en elders is dat windturbines reeds ná tien tot 15 jaar met nuwe tegnologie vervang word, byvoorbeeld groter, doeltreffender windturbines en minder van hulle, maar wat dieselfde of selfs meer elektrisiteit opwek as die voriges. Dit dra by tot laer kragkoste. Hy verwag dieselfde sal in Suid-Afrika gebeur.
Tegnologie-ontwikkeling in die windkragbedryf versnel volgens Havemann geweldig. Waar nuwe modelle in die verlede elke twee jaar bekend gestel is, kom daar nou bykans elke nege maande verbeterings aan die tegnologie.
Rompslomp
Daar is baie rompslomp om ’n windplaas gebou te kry. Soveel as tien tot 15 permitte en verskillende goedkeurings moet verkry word van al drie vlakke van regering, van die Burgerlugvaartowerheid, die Astronomiese Vereniging, die SKA, benewens heelparty omgewingsgoedkeurings.
Van die begin van die idee vir ’n projek totdat ’n ontwikkelaar aan die departement van energie se groenkragprogram kan deelneem, kan tot drie jaar verbygaan. As jy dan gekies word as voorkeurbieër, kan dit nog 12 tot 24 maande duur om die finansies te beklink. Dit kan dus vyf jaar duur voordat bouwerk uiteindelik kan begin.
G7 se Roggeveld-windplaas wat hy in Desember 2009 begin beplan het maar intussen verkoop het, het eers in April verlede jaar sy finansies beklink en bouwerk sal eers teen April 2021 voltooi wees. Dit sal dus byna 12 jaar neem voordat die windplaas sy eerste krag kan opwek. – Netwerk24
Benewens betalings wat hulle kry wanneer hul plaas betree word vir aanvanklike toetse en studies, en betalings vir die ongerief tydens konstruksiewerk van die windplaas, word die plaas op ’n langtermynhuurkontrak van die boer gehuur, al kan hy soos gewoonlik met sy landboubedrywighede voortgaan.
Dr. Kilian Havemann, uitvoerende hoof van die windkragontwikkelaar G7 Renewables, sê wanneer die windplaas begin krag verkoop aan Eskom, kry die grondeienaars waarop die windturbines gebou is boonop enigiets tussen 0,8% tot 1% van die omset uit kragverkope.
Havemann het tydens ’n onderhoud by die Africa Utility Week in Kaapstad gesê ’n windplaas neem omtrent net sowat ’n halwe tot een hektaar per windturbine se ruimte op, en sowat 99% van die grond is onaangeraak.
Hy voorsien ’n nuwe bloeitydperk vir die windkragbedryf oor die komende jare as die regering se geïntegreerde hulpbronplan (IRP) van krag word. Die IRP is die bloudruk vir kraglewering tot 2050 en is veronderstel om gereeld hersien te word. Volgens een uitgelapte weergawe van die nuwe IRP sal die regering toelaat dat sowat 1 600 MW se nuwe windkragvermoë van 2023 tot 2030 gebou word.
G7 kyk tans na nuwe persele vir windplaasontwikkeling. Havemann meen hoewel die laaghangende vrugte reeds in die eerste rondes van die groenkragprogram gepluk is, is daar nog heelwat goeie plekke veral in die Wes-, Noord- en Oos-Kaap waar nuwe windplase gebou kan word. Daar is selfs plek-plek gebiede in die Vrystaat, Limpopo, Mpumalanga en KwaZulu-Natal waar daar potensiaal is vir windkrag, sê Havemann.
Die “beste” plekke vir windplase wat meestal reeds ingeneem is, is waar die wind die standhoudendste waai en waar dit terselfdertyd naby ’n Eskom-kraglyn is. Die persele waarna daar nou gesoek word het dalk goeie wind, maar is ver van die naaste Eskom-substasie of kraglyn, of dit is naby ’n kraglyn, maar die windtoestande is wisselvallig.
Eskom en windkragontwikkelaars werk toenemend saam, en Eskom gee ontwikkelaars byvoorbeeld toestemming om self ’n nuwe kraglyn na die naaste Eskom-substasie te bou as Eskom nie die tyd en geld daarvoor het nie.
Die kragkoopkontrakte by windplase strek gewoonlik oor 20 jaar, maar Havemann sê die tendens in Europa en elders is dat windturbines reeds ná tien tot 15 jaar met nuwe tegnologie vervang word, byvoorbeeld groter, doeltreffender windturbines en minder van hulle, maar wat dieselfde of selfs meer elektrisiteit opwek as die voriges. Dit dra by tot laer kragkoste. Hy verwag dieselfde sal in Suid-Afrika gebeur.
Tegnologie-ontwikkeling in die windkragbedryf versnel volgens Havemann geweldig. Waar nuwe modelle in die verlede elke twee jaar bekend gestel is, kom daar nou bykans elke nege maande verbeterings aan die tegnologie.
Rompslomp
Daar is baie rompslomp om ’n windplaas gebou te kry. Soveel as tien tot 15 permitte en verskillende goedkeurings moet verkry word van al drie vlakke van regering, van die Burgerlugvaartowerheid, die Astronomiese Vereniging, die SKA, benewens heelparty omgewingsgoedkeurings.
Van die begin van die idee vir ’n projek totdat ’n ontwikkelaar aan die departement van energie se groenkragprogram kan deelneem, kan tot drie jaar verbygaan. As jy dan gekies word as voorkeurbieër, kan dit nog 12 tot 24 maande duur om die finansies te beklink. Dit kan dus vyf jaar duur voordat bouwerk uiteindelik kan begin.
G7 se Roggeveld-windplaas wat hy in Desember 2009 begin beplan het maar intussen verkoop het, het eers in April verlede jaar sy finansies beklink en bouwerk sal eers teen April 2021 voltooi wees. Dit sal dus byna 12 jaar neem voordat die windplaas sy eerste krag kan opwek. – Netwerk24
Kommentaar
Republikein
Geen kommentaar is op hierdie artikel gelaat nie