Windhoek Woordfees verwelkom Jannie du Toit

Die bekende en geliefde Jannie du Toit kom vermaak ons vanjaar by die Windhoek Woordfees met twee produksies en drie optredes.Jannie du Toit volg 'n musiekloopbaan ná regsopleiding en taalstudies. Vir amper vyf dekades al is hy 'n bekende en geliefde figuur op die musiektoneel, nie slegs in Suidelike Afrika nie, maar ook in die lae lande. Hy was veral betrokke by die Musiek en Liriek-beweging van die sewentigs, en vestig hom daar as liedjieskrywer, sanger en mentor vir baie opkomende (en vandag bekende) liedjieskrywers en sangers. Praat mens met musikante uit daardie era, sal daar altyd verwys word na die samekomste by sy huis, waar jong kunstenaars die water kon toets en die kreatiwiteit hoog aangeblaas is. Sedert sy eerste album in 1981, 'n Liedjie vir jou, het nog 13 albums verskyn. Hy werk ook saam met ander groot name in die teater- en musiekbedryf, en in hierdie verband sal Christa Steyn veral onthou word. Hulle het vir 25 jaar op die verhoog, in ateljees en as skeppende kunstenaars saamgewerk en wêreldwyd getoer. Produksies wat nog lank in ons geheue sal bly, sluit in Van Berlyn tot Bapsfontein, Blik en Snaar, Skadu's teen die Muur en Jannie en die Tannie.Sy Woordfees-produksies:Doep is nie dood nieIn hierdie produksie bring Jannie hulde aan sy goeie vriend Koos du Plessis. Meer as 30 jaar ná sy voortydige heengaan, leef sy onsterflike skeppings voort in hierdie woordkuns- en musiekprogram. Saam met hom op die verhoog is Susan Mouton (op tjello) en Chanie Jonker (op klavier). In hierdie produksie besef mens weer hoe ver voor sy tyd Koos Doep was, hoe hy die weg gebaan het vir soveel ander kunstenaars wat geweier het om bloot rymelary te pleeg en doef-doef musiek in te ryg. In dié program van 21 uiteenlopende, bekende én minder bekende werke, wys Jannie vir ons hoe veelsydig, wys en vol insig sy groot vriend was.Paul Boekkooi som dit só op: “Du Toit besit met sy immer meevoerende stem, sensitiewe vertolking en wydlopende verhoogervaring die sleutels om die tydloosheid van Koos du Plessis te ontsluit.” Mariana Malan het die volgende te sê: “Nostalgie gryp jou aan in die eerste oomblik van die produksie . . . Wanneer jy begin luister na Jannie du Toit se vertolking . . . weet jy daar is geen kans dat Du Plessis se woorde sal sterf nie . . . ” Kom beleef die vele nuanses van Koos Doep se nalatenskap op Omaruru (Wronsky Haus) op Dinsdag 31 Julie om 19:00. Jannie sal van sy CD's daar verkoop en daar sal ook 'n kontantkroeg en ligte verversings wees, soos by al die Woordfees-produksies. Bonjour Monsieur BrelWeer eens bring Jannie du Toit hulde aan 'n geliefde en ongelooflik veelsydige kunstenaar – die Belgiese sanger, liedjieskrywer, digter, akteur en regisseur Jacques Brel. Brel het as komponis en kunstenaar baie en toegewyde volgelinge gehad – aanvanklik in België en Frankryk, en later oraloor die wêreld. Hy staan bekend as die meester van die moderne chanson wat vir tallose kunstenaars as inspirasie gedien het. Sy liedjies is al in ten minste 95 tale vertaal, en Jannie du Toit sing in hierdie produksie weergawes in Afrikaans, Engels, Frans en Nederlands. Ook in hierdie produksie word hy deur Susan Mouton en Chanie Jonker begelei.Die Afrikaanse vertalings, wat uiters gunstig vergelyk met vertalings in ander tale, verteenwoordig 'n verrassende nuwe blik op Brel se tekste. Bekende treffers is natuurlik op die spyskaart, maar ook van sy meer onbekende, ewe briljante werk.Resensies sluit die volgende in: “ . . . een van die blinkste Brel-aanbiedinge wat tot nog toe in Suid-Afrika op die planke was. Ons het lank vir so 'n gehalte-aanbieding gewag. Ervaar die grensloos magiese daarvan.” – Paul Boekkooi“Jannie is een van die min Afrikaanse sangers wat die Nederlandse taal en kabarettradisie lewend hou op ons verhoë; sy oortuigende Nederlandse aksent en die selfvertroue waarmee hy die klein dramas vergestalt wat in 'n goeie Brel-chanson afspeel, is ook die resultaat van gereelde besoeke aan en konserttoere in Nederland en Vlaandere. Brel knik sekerlik sy kop goedkeurend.” – Naòmi MorganKom reis op 1 Augustus om 20:15 deur die briljante dromer Brel se ideewêreld op Swakopmund by Namib Primary Aula en op 3 Augustus om 20:00 in Windhoek by De Kayak, in Tennisstraat. CD's sal verkoop word en 'n kontantkroeg en verversings is beskikbaar.

Windhoek Woordfees verwelkom Jannie du Toit

Kommentaar

Republikein 2026-02-05

Meld asseblief aan om kommentaar te lewer

Windhoek Woordfees verwelkom Jannie du Toit

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.