Windhoek wil Burger stadshoof maak

Augetto Graig - Die woordvoerder van die Windhoek-munisipaliteit, me. Lydia Amutenya, het gister geweier om mediaberigte oor die stad se nuwe hoof uitvoerende beampte te bevestig. “Ons het nog geen amptelike reaksie daarop nie,” het sy geantwoord toe Republikein haar vra of dit waar is dat mnr. Riaan Burger dié belangrike pos sal oorneem. Windhoek is sonder ’n hoof uitvoerende beampte sedert die termyn van die vorige stadshoof, mnr. Niilo Taapopi, op 16 Desember 2014 geëindig het.Die munisipaliteit se hoof van kommunikasie, mnr. Joshua Amukugo, het egter verduidelik dat ’n paneel aangestel is om die beste kandidaat vir die pos te identifiseer. Die paneellede is die Ohlthaver & List-groep se voorsitter, mnr. Sven Thieme; Namport se uitvoerende hoof, mnr. Bisey /Uirab; die presidensiële adviseur, me. Inge Zaamwani-Kamwi; mnr. Clement Mwafila van die Khomasstreekraad en die permanente sekretaris in die ministerie van finansies, me. Ericah Shafudah.KortlysDie paneel het hul voorstelle aan die stadsraad deurgegee en volgens Amukugo is die voorstelle aanvaar, met Burger as die beste kandidaat. Die ander kandidate wat die paneel se topvier-lys gehaal het, is mnre. Robert Kahimise, Tega Shiimi ya Shiimi en Kenandai Tjivikua, het Amukugo bevestig, alhoewel hy nie seker is wie spesifiek tweede, derde en vierde was nie.Amukugo het benadruk dat die proses nog ver van afgehandel is. Die hoofstad se munisipaliteit moet volgens hom nou eers vir Burger kontak en oor die kontrak, diensvoorwaardes en vergoedingspakket onderhandel. As Burger nie onmiddellik met iets tevrede is nie, kan die raad weer daaroor besluit en die aanbod aanpas of andersins besluit om die pos vir een van die ander kandidate aan te bied. “Dis nou nog net te vroeg om te sê,” sê Amukugo.Die stadsraad moet ook eers die ministerie van stedelike en landelike ontwikkeling inlig van hul besluit en goedkeuring kry vir hul keuse. Die minister, me. Sophia Shaningwa, het die finale sê oor die aanstelling van die stadshoof.Burger is tans die hoofbestuurder van Namdeb. Hy is ook gekwalifiseer as ’n meganiese ingenieur en het ’n meestersgraad in besigheidsadministrasie van die Universiteit Stellenbosch. Hy werk sedert 2006 vir die diamantreus waar hy bevorder is van ingenieursbestuurder tot sy huidige pos. Algemene bestuur, strategiese beplanning en projekbestuur tel onder sy spesialiteitsgebiede. Kahimise is tans die uitvoerende hoof van Erongo RED, Shiimi ya Shiimi is die hoof uitvoerende beampte van Sanlam Namibië terwyl Tjivikua voorheen die hoof uitvoerende beampte van die Maatskaplike Voorsorgkommissie (SSC) was.

Windhoek wil Burger stadshoof maak

Kommentaar

Republikein 2025-11-06

Meld asseblief aan om kommentaar te lewer

Windhoek wil Burger stadshoof maak

Kommentaar

Republikein 2025-11-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.