Windhoek se dae van gratis water getel

Augetto Graig – Die nuwe burgemeester me. Sade Gawanas het die kwessie van die koste van die water en die misbruik daarvan op sosiale media uitgelig toe sy Dinsdag op Twitter ’n video van ’n man wat sy kar met ’n tuinslang by ’n kommunale kraan was, gedeel het.“Liewe inwoners,” skryf sy, “dis nou waarmee ons te kampe het. Ons het die opdrag van die sentrale regering gekry om ons krane oop te hou en gratis water te voorsien weens die pandemie. (Inwoners se uitstaande) skuld staan op sowat N$90 miljoen en daar is geen verpligting om te betaal nie? Maak ons die water toe?” wou sy weet.Volgens die burgemeester het die stadsraad reeds op die laaste vergadering van 2021 besluit om voor einde Februarie in te gryp.“Volgens die munisipale raad van Windhoek se notule van 2021/11/30, resolusie 240/11/2021, is besluit om die voorsiening van kostelose water in informele nedersettings soos vervat in die ministerie se opdrag, te staak aangesien dit ’n ernstige finansiële las veroorsaak,” het sy later bygevoeg.By navraag het sy bevestig die resolusie is vir uitvoering teen einde Februarie.Stad Windhoek se hoofwoordvoerder, mnr. Harold Akwenye, sê sedert die opdrag deur minister Erastus Uutoni van stedelike en landelike ontwikkeling in April 2020 gegee is dat water kosteloos aan kwesbare stedelike gemeenskappe voorsien moet word, het die sentrale regering net vir die eerste drie maande se verbruik sowat N$12 miljoen betaal.Akwenye sê die uitstaande skuldbedrag klim steeds en kan teen Februarie tot N$100 miljoen aangroei.Hy sê die stadsraadslede sal met die ministerie praat oor ’n moontlike oplossing. Amptelik is daar reeds aan die ministerie geskryf, maar geen terugvoering is tot dusver ontvang nie, sê hy.Bronne in die munisipaliteit, wat anoniem wil bly, sê dit word oorweeg om die skuld direk van die ministerie te verhaal. Ministeriële kantore in die hoofstad sal afgesny word totdat die skuld gedelg is.Daar was verskeie reaksies op Gawanas se uitlating op sosiale media, met die kommentaar wat oorwegend teen die afsny van toegang tot water gekant was. Water is ’n mensereg, hou sommige mense vol, terwyl ander meen verbruikers moet bloot soos almal hul betaalverpligtinge nakom, en nog ander sê die regering moet die skuld delg.Teen Julie verlede jaar het die hoofstad weekliks sowat 32 000 liter per week water kosteloos aan sy informele nedersettings verskaf.Akwenye kon nie onmiddellik aandui of die gratis waterverbruik intussen toegeneem het nie. Talle kommentare op die burgemeester se stellings wys daarop misbruik en vermorsing is altyd die gevolge wanneer iets verniet beskikbaar gestel word.Akwenye sê die munisipaliteit tref voorbereiding om dalk reeds teen volgende week met ’n hernude veldtog van bewusmaking en aanmoediging vir die besparing van water te begin.– augetto@republikein.com.naFOTO’s Tanja Bause

Windhoek se dae van gratis water getel

Kommentaar

Republikein 2025-12-16

Meld asseblief aan om kommentaar te lewer

Windhoek se dae van gratis water getel

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.