‘Windhoek sal nie droogloop’

Jessica Botes Die driedamnetwerk bestaande uit Von Bach, Omatako en Swakoppoort wat die sentrale gebied van die land van water verskaf, sal moontlik teen die einde van die jaar droogloop.Hierdie verklaring is Vrydag deur dr. Vaino Shivute, die hoof uitvoerende beampte van NamWater, gemaak tydens ’n mediakonferensie op Swakopmund. Volgens hom word daar dus gewerk aan ’n langtermynplan om Windhoek en die sentrale gebiede van die land van water te verskaf. “’n Komitee wat bygestaan word deur ’n tegniese komitee, is reeds gestig om na die land se watervoorsiening te kyk. Soos wat die situasie nou is, sal damme in die sentrale gebied volgende jaar droog wees; die Omatakodam is reeds droog. Hierdie komitee kyk na oplossings om te verseker dat Windhoek nie sonder water sal wees nie,” het Shivute gesê.Volgens Shivute sal NamWater op ondergrondse water (die Windhoek-akwifer) staatmaak. Die minister van landbou, water en bosbou, mnr. John Mutorwa, het verlede week saam met amptenare van NamWater, die direktoraat van Watervoorsiening en Sanitasiekoördinasie (DWSSC) en die direktoraat van Waterhulpbronne-bestuur (DWRM) ’n besoek aan verskeie waterbronne oral oor die land gelewer. Hy het tydens die mediakonferensie die waterkrisis in die land bespreek en oor oplossings gesels.BoorgateVolgens hom word Windhoek se akwifer aangevul met water van die driedamnetwerk sodat daar altyd watervoorsiening tydens ’n droogtenoodtoestand is. NamWater is besig om verskeie boorgate in en rondom Windhoek te sink om toegang tot hierdie water te kry. “Mense moet verstaan dat hierdie nie ’n nuwe bron van water is nie, maar dat ons nou van Windhoek se reserwewater gebruik maak. Ek wil egter ook beklemtoon dat Windhoek nie sal droogloop nie,” het Mutorwa gesê.Volgens Shivute sal hierdie akwifer, wat normaalweg vir 10 tot 13 jaar water aan Windhoek sou verskaf, binne twee tot drie jaar leeggetap word. Hy het ook gesê water sal van die Kombat- en Berg Aukas-myn na die Omatakodam gepomp word.“Ons sal die hoeveelheid water vermeerder wat ons van hierdie twee bronne kry. Met hierdie bronne, saam met die rioolwater wat gesuiwer word, sal Windhoek nie sonder water wees nie. Indien die waterbesparingsmaatreëls gehandhaaf word, sal dit ons help om deur hierdie droogtetydperk te kom. Dit is baie belangrik dat mense moet weet dat ons nie water kan mors nie,” het Shivute gesê.Mutorwa het gesê daar is twee langtermynoplossings vir die land se waterkrisis. Die regering oorweeg om die Kavangorivier-pyplyn te bou om meer water met die kanaal na Windhoek te lei. Konsultante werk volgens hom sedert verlede jaar aan hierdie plan. Volgens Mutorwa is die Kavangorivier egter ’n waterbron wat deur drie lande gedeel word en moet besprekings dus eers met die betrokke partye gevoer word voordat die pyplyn gebou kan word. Volgens Mutorwa is die tweede en beste oplossing om water van die see af te pomp. ‘Ons het ’n baie lang kuslyn en hoewel die ontsouting van seewater ’n baie duur proses is, sal dit ’n bron van water wees waarmee ons die hele land van water kan voorsien,” het hy gesê.

‘Windhoek sal nie droogloop’

Kommentaar

Republikein 2026-02-03

Meld asseblief aan om kommentaar te lewer

‘Windhoek sal nie droogloop’

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.