Windhoek lê vesel, nie 5G
Dokumente uit die laaste stadsraadvergadering gee duidelikheid te midde van beskuldigings van omkopery.
Augetto Graig
Duidelikheid oor die verhouding tussen die Chinese internettegnologiereus Huawei en die Windhoek-munisipaliteit het eindelik uit dokumente van die stadsraadsvergadering van afgelope Donderdag na vore gekom.
Die munisipaliteit het gereageer op vrae gestel deur die stadsraadslid vir die RDP, me. Brunhilde Cornelius, wat beweer dat omkopery in die verband geskied. Ná Cornelius se uiting van die korrupsieklagte het sy weens die gebrek aan ondersteuning en beskerming uit die RDP bedank en by die RP aangesluit.
“Die RDP het in werklikheid bygedra tot die gevaar van die situasie, afgesien van die feit dat hulle my geensins ondersteun het nie,” sê sy.
Die munisipaliteit het gereageer op vrae wat Cornelius amptelik op 17 April en 12 Mei gestel het, gemik op duidelikheid in verband met 'n ooreenkoms van verstandhouding tussen Windhoek en Huawei, asook oor die gesamentlike onderneming waardeur die hoofstad sy inligtingkommunikasienetwerk wil kommersialiseer.
Oor Huawei sê die munisipaliteit die stadsraad het 'n ooreenkoms om 5G-tegnologie in Windhoek bekend te stel in Februarie oorweeg en vir meer inligting teruggestuur. Sedertdien het die kabinet betrokke ministeries opdrag gegee om 'n strategiese omgewingsevaluering te doen en die Regulerende Owerheid vir Kommunikasie in Namibië (Cran) is die taak gegee om 'n 5G-strategie vir Namibië uit te werk.
Volgens die munisipaliteit is daar geen bewyse dat Huawei sy tegnologie gebruik om Namibiërs af te luister nie, en die internasionale verbod teen Huawei is bloot 'n handelsoorlog tussen die Westerse wêreld en die Ooste. Nog 'n belangrike verwikkeling is die toekenning van 'n omvattende netwerk- en elektroniese diensleweringlisensie aan Windhoek, sê hulle.
Kornelius meen egter die munisipaliteit se aanvanklike reaksie dat haar versoeke om inligting “deur werklike gebeure verbygesteek” en nutteloos was, toon institusionele mislukking binne Stad Windhoek.
Sy het in haar verklaring op 9 Oktober die gebrek aan opvolg op haar klagte van omkopery uiteengesit. “Gedurende Mei 2020 het mnr. Nicanor Ndjoze – 'n senior lid van my party die RDP – in samewerking met minstens een senior uitvoerende lid van die Windhoek-munisipaliteit, mnr. Reckliff Kandjoramuine, my probeer omkoop om my teenstand teen Windhoek en Huawei se verhouding, en spesifiek die ooreenkoms van verstandhouding te staak,” skryf sy.
“Ek het dié voorvalle aan die Namibiese polisie gerapporteer en kommissaris Cornelius Becker het my gehelp om die bewyse van hierdie korrupsie in te samel, insluitend 'n opname van 20 Mei 2020 toe ek met Recliff Kandjoramuine vergader het, op versoek van en met vervoer van mnr. Ndjoze, om die omkoopgeld te bespreek.”
Kornelius sê: “Kommissaris Becker is hierna uit sy posisie verwyder, enkele dae nadat ek my beëdigde verklaring aan die polisie voorsien het.”
Volgens Kornelius het die nasionale polisiehoof lt.genl. Sebastian Ndeitunga op haar versoek op 2 Julie haar verseker die bewyse is veilig en die saak is aan die Teenkorrupsiekommissie (ACC) oorhandig. Die ACC erken volgens Kornelius egter nie besit van die bewyse nie en ondersoek eerder vir Kornelius op grond van 'n verklaring wat haar van korrupsie beskuldig. Kornelius sê dié verklaring is vervals en dat haar geloof dat ACC of Nampol korrupsie kan ondersoek nou baie min is.
Die Windhoek-munisipaliteit dring aan dat dit die volle reg het om 'n veseloptiese netwerk op te stel en te kommersialiseer en dat dié stap nodig is om Windhoek in 'n “slimstad” te omskep. Omdat die stadsraad geen goedkeuring vir enige 5G-projek gegee het nie, is geen 5G-toerusting aangekoop nie, volgens die munisipaliteit.– [email protected]
Duidelikheid oor die verhouding tussen die Chinese internettegnologiereus Huawei en die Windhoek-munisipaliteit het eindelik uit dokumente van die stadsraadsvergadering van afgelope Donderdag na vore gekom.
Die munisipaliteit het gereageer op vrae gestel deur die stadsraadslid vir die RDP, me. Brunhilde Cornelius, wat beweer dat omkopery in die verband geskied. Ná Cornelius se uiting van die korrupsieklagte het sy weens die gebrek aan ondersteuning en beskerming uit die RDP bedank en by die RP aangesluit.
“Die RDP het in werklikheid bygedra tot die gevaar van die situasie, afgesien van die feit dat hulle my geensins ondersteun het nie,” sê sy.
Die munisipaliteit het gereageer op vrae wat Cornelius amptelik op 17 April en 12 Mei gestel het, gemik op duidelikheid in verband met 'n ooreenkoms van verstandhouding tussen Windhoek en Huawei, asook oor die gesamentlike onderneming waardeur die hoofstad sy inligtingkommunikasienetwerk wil kommersialiseer.
Oor Huawei sê die munisipaliteit die stadsraad het 'n ooreenkoms om 5G-tegnologie in Windhoek bekend te stel in Februarie oorweeg en vir meer inligting teruggestuur. Sedertdien het die kabinet betrokke ministeries opdrag gegee om 'n strategiese omgewingsevaluering te doen en die Regulerende Owerheid vir Kommunikasie in Namibië (Cran) is die taak gegee om 'n 5G-strategie vir Namibië uit te werk.
Volgens die munisipaliteit is daar geen bewyse dat Huawei sy tegnologie gebruik om Namibiërs af te luister nie, en die internasionale verbod teen Huawei is bloot 'n handelsoorlog tussen die Westerse wêreld en die Ooste. Nog 'n belangrike verwikkeling is die toekenning van 'n omvattende netwerk- en elektroniese diensleweringlisensie aan Windhoek, sê hulle.
Kornelius meen egter die munisipaliteit se aanvanklike reaksie dat haar versoeke om inligting “deur werklike gebeure verbygesteek” en nutteloos was, toon institusionele mislukking binne Stad Windhoek.
Sy het in haar verklaring op 9 Oktober die gebrek aan opvolg op haar klagte van omkopery uiteengesit. “Gedurende Mei 2020 het mnr. Nicanor Ndjoze – 'n senior lid van my party die RDP – in samewerking met minstens een senior uitvoerende lid van die Windhoek-munisipaliteit, mnr. Reckliff Kandjoramuine, my probeer omkoop om my teenstand teen Windhoek en Huawei se verhouding, en spesifiek die ooreenkoms van verstandhouding te staak,” skryf sy.
“Ek het dié voorvalle aan die Namibiese polisie gerapporteer en kommissaris Cornelius Becker het my gehelp om die bewyse van hierdie korrupsie in te samel, insluitend 'n opname van 20 Mei 2020 toe ek met Recliff Kandjoramuine vergader het, op versoek van en met vervoer van mnr. Ndjoze, om die omkoopgeld te bespreek.”
Kornelius sê: “Kommissaris Becker is hierna uit sy posisie verwyder, enkele dae nadat ek my beëdigde verklaring aan die polisie voorsien het.”
Volgens Kornelius het die nasionale polisiehoof lt.genl. Sebastian Ndeitunga op haar versoek op 2 Julie haar verseker die bewyse is veilig en die saak is aan die Teenkorrupsiekommissie (ACC) oorhandig. Die ACC erken volgens Kornelius egter nie besit van die bewyse nie en ondersoek eerder vir Kornelius op grond van 'n verklaring wat haar van korrupsie beskuldig. Kornelius sê dié verklaring is vervals en dat haar geloof dat ACC of Nampol korrupsie kan ondersoek nou baie min is.
Die Windhoek-munisipaliteit dring aan dat dit die volle reg het om 'n veseloptiese netwerk op te stel en te kommersialiseer en dat dié stap nodig is om Windhoek in 'n “slimstad” te omskep. Omdat die stadsraad geen goedkeuring vir enige 5G-projek gegee het nie, is geen 5G-toerusting aangekoop nie, volgens die munisipaliteit.– [email protected]
Kommentaar
Republikein
Geen kommentaar is op hierdie artikel gelaat nie