Windhoek het wenresep met die jazzkonsert

JOHN FREDERICKS SKRYF:As daar een iets is wat die Windhoek munisipaliteit oor die jare reggekry en op verbeter het, is dit die jaarlikse Windhoek Jazz Festival.Die Windhoek munisipaliteit is oudergewoonte vir al die verkeerde redes in die nuus, maar ek wil graag krediet gee waar dit toekom.Die groei, kwaliteit en organisering van die Windhoek Jazz Festival wat in die vroeë jare by Vegkop, die sportveld van Windhoek Hoërskool gehou was, het astronomies verbeter. Dit is moontlik die enigste groeipunt waarop die munisipaliteit trots kan wees.Die konserte by Vegkop het ’n ander atmosfeer en gees gehad as by die Onafhanklikheidstadion, maar dit het geen inbraak gemaak op kwaliteit, smaak en verskeidenheid nie. Jazz, met sy verskillende variante, is die tipe van musiek op die maat waarvan ’n mens ander, wie jy nie ken nie, kan ontmoet en saam soos ou vriende kan kuier.Die munisipaliteit maak dit deur middel van die fees moontlik vir Windhoekers om ten minste een keer per jaar met mekaar as vriende van Windhoek te ontmoet. Die afgelope naweek se konsert was weereens so ’n geleentheid. Die organisering was eerstens hoogs professioneel, georden en goed georkestreer. Die veiligheid van konsertgangers het prioriteit geniet. Vanaf die ingangshekke tot op die grasperk van die Onafhankliheidstadion was konsertgangers omvou deur die oorstrelende klanke van jazz.Die uitleg van koskooppunte tot waar jy hardehout en ander Bacchuswater kon vind, het geen oponthoud veroorsaak nie. Daarom kon jy meer jazz geniet en waardeer, eerder as om in lang rye te staan.Die dames wat jou kontantgeld op ’n kaart gelaai het teen ’n fooi van N$20 was vriendelik, mooi, behulpsaam en strategies geplaas naby die ingangshekke. Die kospryse was redelik, en het ’n besondere gees van gelykheid, veral onder Jan Alleman, teweeg gebring.Die musiek en die kustenaars, beide internasionaal en plaaslik, was uit die boonste rakke. Ons eie Suzie het die jazzhonger Windhoekers behoorlik uit haar hand laat eet. Die kustenaars van Portugal, veral die persoon in die rolstoel, het my weerens laat besef dat ’n liggaamlike gebrek nie ’n straf is, maar ’n seëning.Alle dank aan die organiseerders van die Windhoek Jazz Festival, die borge, kunstenaars en jazzliefhebbers vir ’n ongelooflike aand van musiek en mens wees. Die enigste bietjie koue water op die oondwarm jazzkonsert was die kaartjiepryse. . .Dankie, Windhoek munisipaliteit.

Windhoek het wenresep met die jazzkonsert

Kommentaar

Republikein 2025-05-07

Meld asseblief aan om kommentaar te lewer

Windhoek het wenresep met die jazzkonsert

Kommentaar

Republikein 2025-05-07

Meld asseblief aan om kommentaar te lewer

MELD AAN

Advertensie