Windhoek dié naweek sonder Von Bach-water

Elvira Hattingh – Normale watertoevoer van die Von Bachdam af na Windhoek sal van môre af vir 60 ure onderbreek word.Dít sodat NamWater noodsaaklike instandhoudingswerk by die dam kan doen. Die munisipaliteit voorsien egter nie ernstige probleme om in die vraag na water te voorsien nie, solank Windhoekers steeds die vereiste 5% water bespaar en watertoevoer nie vir langer as twee en ‘n halwe dae onderbreek word nie, het ‘n munisipale bron gister aan Republikein gesê.Daar is egter kommer dat besighede en gemeenskappe noord van die sogenaamde Booster 2-pompstasie naby Bokomo wateronderbrekings kan ervaar. Dit sluit ook die Mix-nedersetting in. Inwoners van dié gebiede word aangeraai om vroegtydig hiervoor voorsiening te maak.Dít volg nadat ‘n kennisgewing laat Dinsdag uitgestuur is waarin aangedui word NamWater sal watertoevoer van môre (Vrydag) 17:00 af tot Maandag 06:00 toe onderbreek. Windhoekers word aangeraai om water spaarsamig oor die naweek te gebruik en besighede word aangeraai om hul werksaamhede aan te pas sodat water optimaal gebruik word. “Windhoekers moet ook kennis neem dat daar veranderinge in die waterdruk asook die kleur van water kan wees omdat water in dié tydperk uit boorgate in die akwifer sal kom. “Die publiek word verseker die munisipaliteit sal watersuiwering steeds op standaard hou, wat waarborg die water is veilig vir menslike gebruik,” lui die kennisgewing wat deur die munisipaliteit se woordvoerder, me. Lydia Amutenya, uitgestuur is.Die kleppe van die twee stelle pype wat in die damwal inloop en daarvoor verantwoordelik is om water vanuit die Von Bachdam na die suiweringswerke te vervoer, moet deur NamWater vervang word. Die pype is sowat 40 jaar oud en indien dit onklaar raak, kan dit ‘n watertoevoerkrisis veroorsaak.Die kontrak vir herstelwerk aan die dam het toevallig só verloop dat die herstelwerk nou gedoen moet word. Dit terwyl November ‘n piektyd vir waterverbruik is. Kenners meen egter dit moet gedoen word voor die reënseisoen in volle swang is.Die munisipaliteit het gesê volgens hul beplanning vir vandeesmaand moet sowat 76 000 m³ water per dag aan die stad voorsien word, terwyl stadsbewoners steeds 5% water moet bespaar. Dit werk uit op sowat 2,139 Mm³ water per maand.Die 76 000 m³ is dus bykans die hoeveelheid water wat daagliks tydens die komende naweek deur die boorgate aan die stad gelewer sal moet word. Terselfdertyd sal alle reservoirs in die stad, asook noodreservoirs wat in krisistye moet werk, teen môre so vol as moontlik gehou word.Enige probleme met watertoevoer kan aangemeld word by die munisipale hulplyn deur (061) 290 2402, (061) 290 2162 of (061) 290 3668 te skakel. Dit kan ook aanlyn by www.cityscada.tk aangemeld word.

Windhoek dié naweek sonder Von Bach-water

Kommentaar

Republikein 2025-08-04

Meld asseblief aan om kommentaar te lewer

Windhoek dié naweek sonder Von Bach-water

Kommentaar

Republikein 2025-08-04

Meld asseblief aan om kommentaar te lewer

MELD AAN

Advertensie