Wind ontneem Masilingi van rekord

Andrew Poolman – Wanneer die wêreldklas Beatrice Masilingi in die naellope haar treë gerek het, was daar niemand wat bygebly het nie.Atletiek Namibië se nasionale kampioenskap Vrydag en Saterdag het die kaf van die koring geskei – en Masilingi het gewys hoekom sy boaan die wêreldlys van beste 400-hardlopers in hierdie kalenderjaar (beide die o.18- en o.20-lyste) verskyn.Saam met Ryan Williams, wat sy Namibiese diskusgooirekord vanaf 53.92 meter tot 56.06 verbeter het, was sy een van die groot individuele uitblinkers. Williams, QSB-atletiekklub se yster uit Gobabis se wêreld, het enkele weke gelede selfs effens verder gegooi, hoewel sy beste merk toe nie erken is nie omdat 'n plastiekmaatband gebruik is.Masilingi, die boorling van Katima Mulilo wat deesdae onder mentorskap van mnr. Henk Botha by Agri Kollege op Grootfontein gebrei word, het ook vir kykers in die hoofstad kom wys waartoe sy in staat is.Hoewel sy vanweë die uitstel van die kwalifiserende periode vir die 2021 Olimpiese Spele in Tokio nie deurgaans voluit meegeding het nie, is sy as Namibië se kampioen in die 100, 200 en 400 bekroon.Voormalige titelhouers soos Jolene Jacobs (geopereer sewe weke gelede) en Jesse Urikhob (dyspier beseer in die onlangse Grand Prix op Oshakati) was blote toeskouers op die pawiljoen, wat die kampioenskap van broodnodige mededinging ontneem het.Tog was daar ’n stewige kwota hoogtepunte – ondanks die teleurstellende afwesigheid van prysgeld vir enige van die podiumposisies.Masilingi het op dag twee in die 200-meterfinaal haar persoonlike beste tot 22.81 verbeter – een honderdste van ’n sekonde buite die Olimpiese kwalifiserende merk. Vanweë die windmeting van agter (2.8 m/s) sal dit egter nie erken word as ’n verbetering op die Namibiese nasionale rekord van 23.34 wat Globine Mayova in 2013 in Gauteng opgestel het nie.Vrydagaand se 100- en 400-eindwedlope was skaars twintig minute uitmekaar, wat vir die topaanspraakmakers allesbehalwe ideaal was.Masilingi het die 400-finaal in ’n baie bedaarde 58.46 sekondes gewen, maar het minute later in die 100 puik versnel vir ’n indrukwekkende wentyd van 11.52 sekondes.Ernst Narib moes die tweede posisies in beide eindwedlope aanvaar toe hy in die 400 deur Ivan Danny Geldenhuys geklop is (47.15 teen 47.66) en daarna in die 100 m ook deur Sandro Diergaardt (10.80 teen 10.93) verslaan is.Die volgende dag in die 200-finaal het Narib egter uitstekend weggespring en los onder Geldenhuys en die res uitgenael (20.94 teen 21.31).Sandro Diergaardt het kort tevore ook sy nasionale verspringtitel behou, hoewel hy in die nat weer en met die verdeelde fokus van sy naellope nie juis met sy beste sprong van 7.26 meter tevrede was nie.Emmanuel Samantu het in die afwesigheid van sy sterkste mededinger Wencuslaus Klaasman die hoogspring op 2.10 meter gewen.Die talentvolle Christine Mboma van Grootfontein het in die middelafstande oorheers deur beide die 800 en 1500 in tye van onderskeidelik 2:11.65 en 5:03.84 te wen.• Meer oor die atletiek binne in Sport Wrap.

Wind ontneem Masilingi van rekord

Kommentaar

Republikein 2025-12-17

Meld asseblief aan om kommentaar te lewer

Wind ontneem Masilingi van rekord

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.