Willie Swartz uit sy kantoor gesit

Augetto Graig - Mnr. Willie Swartz is Vrydag uit die kantore van die Rehoboth-munisipaliteit gesit en word nie verwag om vandag weer na sy werk toe te gaan nie.

Dit is Saterdag deur die heraangestelde uitvoerende hoof, mnr. Christoph Uirab, bevestig. Volgens hom moes Swartz Vrydag sy kantoorsleutels oorhandig en al sy persoonlike besittings van die perseel verwyder.

Swartz het jare lank 'n belangrike pos by die dorp se bestuur beklee as hoof van menslike hulpbronne, en het keer op keer in die afgelope maande as waarnemende uitvoerende hoof opgetree.

“Kom ons praat nie van afdanking nie, liewer dat hy opdrag gegee is om die perseel te verlaat. Hy word nie as 'n werknemer van die dorpsraad herken nie,” het Uirab gesê.

Ná 'n dissiplinêre verhoor is bevind dat Swartz nie wettig aangestel is nie. “Niemand is bo Namibië se wette verhewe nie en ná die ministerie van stedelike en landelike ontwikkeling se ondersoek is die hele raad volgens prosedure geskors. Swartz was onwettig aangestel en ná 'n jaar kon die dorpsraad nie die instruksie (om hom te laat gaan) uitvoer nie,” sê Uirab.

Die hoofbeampte se heraanstelling is vroeër die maand deur die nuwe minister van stedelike en landelike ontwikkeling, dr. Peya Mushelenga, bevestig nadat die minister op Donderdag 15 Maart die hele dorpsraad in die pad gesteek het. Mushelenga het sy adjunk, mnr. Derek Klazen, na die dorp gestuur om die boodskap oor te dra. Daar is me. Natalia /Goagoses ook aangestel om in die tussentyd na die belange van die beleërde dorpsraad om te sien.

Dit was ná 'n vergadering met /Goagoses dat Uirab bemagtig is om teen Swartz op te tree.

“Die persoon is onwettig aangestel en ons het die instruksie daaroor Vrydag uitgevoer. Hy het die kantoor ontruim en word nie meer sonder vooraf goedkeuring op die perseel toegelaat nie,” het Uirab Saterdag gesê.

Swartz se pos sal weer geadverteer word, en daar is tans geen rede hoekom Swartz nie weer daarvoor kan aansoek doen as hy wil nie, het Uirab gesê.

MENINGSVERSKILLE

Uirab en Swartz het verskeie kere van mening verskil.

Toe Uirab in September 2016 as uitvoerende hoof aangestel is, was Swartz reeds in dié pos.

Swartz was reeds in Februarie 2016 aangestel nadat hy in Junie 2015 uit dié pos bedank het. Dit is die 2016-aanstelling wat volgens Uirab onwettig is.

In September 2016 het die Rehoboth-gemeenskap 'n optog gehou en na die dorpsraadkantore gemarsjeer waar hulle die munisipaliteit se hekke toegesluit het. Die inwoners was woedend oor wanbestuur van die dorp se sake nadat NamWater toegang tot water weens onbetaalde skulde afgesny het. Swartz se heraanstelling was ook een van hul kwessies gelys in 'n klagskrif wat aan die voormalige burgemeester, me. Christina Blaauw, oorhandig is.

Swartz was ook onder meer daarvan beskuldig dat hy glo N$13 miljoen van die dorp se geld in sy eie rekening inbetaal het. Dié klag was een van 20 oor ernstige wangedrag wat reeds in November 2016 teen hom ingedien is. Op sy beurt het Swartz op verskeie geleenthede gedreig om die dorpsraad hof toe te sleep, omdat hulle glo 'n heksejag teen hom gevoer het en die inwoners aangespoor het om sy familie te teister.