Wilde perde moontlik verskuif

Tanja Bause - Die ministerie van die omgewing en toerisme gaan van die wilde perde van die Namib verskuif. Dié perde is in 'n stryd om oorlewing gewikkel, met 'n jarelange droogte,'n tekort aan voer en hiënas wat die diere se getalle drasties laat krimp het, en kan veroorsaak dat die perde teen die einde van die jaar uitsterf. Volgens die ministerie se woordvoerder, mnr. Romeo Muyunda, het die ministerie voorlopig ingestem dat van die perde verskuif word. Waarheen, moet egter nog aangedui word.Muyunda sê voorts die ministerie werk nou saam met nieregeringsorganisasies (NGO's) wat die perde beskerm. Dié NGO's moet ook die plase of grond identifiseer waarheen die perde verskuif word. “Ons gaan sommige van die perde verskuif sodat die ekostelsel nie versteur word nie. Ons wil ook verseker die perde sterf nie uit nie. “Hulle word na 'n plek geneem waar genoeg kos vir hulle is en waar hulle kan aanteel,” het Muyunda gesê. Volgens hom is dit net 'n tydelike verskuiwing en sal die perde na Garub teruggeneem word sodra hul bevolking weer stabiel is. “Die hiënas is ook afhanklik van die perde vir hul voortbestaan en sal nie oorleef as ons al die perde verwyder nie. Daarom gaan ons net sommiges wegvat,” het Muyunda gesê. VOLLEDIGE ONTLEDINGVolgens hom moet daar nog 'n volledige ontleding van die situasie gedoen word en sal daarvolgens 'n meer permanente oplossing gevind word. “Ons moet na die toestand van die perde en die hiënas kyk en 'n besluit neem. In die toekoms mag dit dalk nodig wees om die hiënas te skuif,” het hy gesê. Dr. Telané Greyling van die Namib Wild Horses Foundation (NWHF) sê egter die stigting is nie bewus van enige reëlings of van die beplande verskuiwing van die perde nie. “Dit is nie geneties lewensvatbaar om net sommige van die perde te verskuif nie. Net 33 merries is oor en almal sal verskuif moet word. “Ook moet 33 hingste verskuif word, een vir elke merrie om te verseker dit is geneties lewensvatbaar. Net 81 perde is oor, so ons los dan 15 perde sodat die hiënas hulle kan opvreet?” het Greyling gevra. Volgens haar is dit 'n vermorsing van tyd en geld om net sommige perde te verskuif. Mnr. Piet Swiegers van die Aus/Lüderitz Tourism and Business Action Group het ook bevestig die groep is nie oor die ministerie se besluit ingelig nie. “Weens die stadige tempo en die besluiteloosheid van die ministerie sal die perde teen die einde van die jaar uitsterf, sou niks gedoen word nie. Hulle kan egter nog gered word as die ministerie besluit om die bevolking van die gevlekte hiëna te bestuur. “As dit nie gedoen kan word nie, kan die perde as 'n tydelike oplossing na nabygeleë plase toe verskuif word. Ons ondersteun beide opsies. Maar die perde moenie verder as 'n radius van 30 km van Garub verskuif word nie. So kan die diere steeds as toerisme-aantreklikhede vir Aus en ook toeriste wat van Lüderitz af kom, dien” het Swiegers gesê. Volgens hom maak dit nie sin om 'n paar van die perde te verskuif nie, omdat die genepoel te klein is.“Om die huidige bevolking op te deel, sal net hul uitsterwing vertraag.” Met die dreigende krisis in sig, het die ministerie sedert 2013 aan die NWHF toestemming gegee om die perde in Oktober 2015 te begin voer. In Junie 2017 is toestemming verkry om die hiënas te voer. “As dit nie vir die NWHF en hul vriende was nie, het die perde lankal uitgesterf. “Dit is die enigste neutrale en niewinsgewende organisasie wat geskik is om eienaarskap van die diere te aanvaar as die ministerie hulle nie meer in die Namib Naukluftpark wil hê nie. “NWHF kan later hul eie grond naby Aus kry en die perde permanent daarheen verskuif,” het Swiegers gesê.

Wilde perde moontlik verskuif

Kommentaar

Republikein 2025-05-02

Meld asseblief aan om kommentaar te lewer

Wilde perde moontlik verskuif

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie