Wilde perde: Hoop kwyn

font face="Verdana" >Tanja Bause - Die vreugde, hoop en verligting wat Namibiërs en diereliefhebbers oraloor die wêreld ervaar het toe aangekondig is die Namib se wilde perde is sedert September vier vulletjies ryker, was van korte duur.Dié diere staar weens die teenwoordigheid van hiënas weer eens uitwissing in die gesig. Volgens ’n verklaring van die Namibië Wild Horses Foundation (NWHF) is spore en sleepmerke na ’n hiëna-kuil die afgelope naweek ontdek – ’n duidelike teken dat die laaste vul deur hiënas gevang is. Die afgelope vyf jaar was weens droogte en gevlekte hiënas vir dié perde ’n groot uitdaging. “Die hiënas het in 2013 na die wilde perde se gebied getrek. Die perde se getalle het sedertdien drasties afgeneem. Hul getalle het van 300 tot 80 gekrimp,” lui die verklaring. Volgens dr. Telané Greyling, wat die perde die afgelope 20 jaar bestudeer en nou saam met die stigting werk, het nie ’n enkele vul sedert 2012 oorleef nie.Dit beteken die jongste perd is ses jaar oud. “In 2013 alleen het die hiënas sowat 100 perde doodgemaak, waarvan 50 vulletjies was,” het Greyling gesê. Die droogte is vanjaar verbreek en die lang verwagte reën het die perde van genoeg gras voorsien. Die NWHF kon ophou om die perde te voer en die perde se toestand het drasties verbeter. Van die merries het dragtig geraak en die hiënas het die gebied verlaat. “Die eerste vullens is gebore en ons het gedink die wilde perde het vir die eerste keer in ‘n lang tyd ’n kans op oorlewing. Maar die verligting was van korte duur. Die hiënas het teruggekeer en al vier vullens doodgemaak wat sedert September gebore is.” Die NWHF glo die perde staan op die rand van uitwissing.“Selfs met die onlangse goeie reën is daar geen kans op oorlewing solank die hiënas in die omtrek is nie. Die bevolking het net 33 merries oor en sy genetiese suiwerheid is in die gedrang.”Volgens mnr. Mannfred Goldbeck, NWHF-voorsitter, wag die stigting op die ministerie van die omgewing en toerisme se terugvoering oor die krisis.“Ons wag angstig dat die ministerie op ons versoek reageer om kuratorskap oor die perde te kry. Ons moet nou optree om hul toekoms te verseker. Ons probeer al verskeie jare om die ministerie te betrek – sonder sukses. Ons versoek die ministerie om met 'n plan van aksie vorendag te kom sodat ons die oorblywende bevolking kan red,” het Goldbeck gesê.Die stigting onderhandel sedert 2015 met die ministerie, wat die hiënas nie wil verskuif nie, omdat hulle glo ’n beleid van geen inmenging met wild in nasionale parke volg. Hulle wil dus hê die perde moet in die Namib Naukluft Park bly, waar hulle sonder ingryping gedoem is. Die ministerie is ook nie bereid om kuratorskap oor die perde aan die NWHF toe te staan nie.Dit sou die stigting is staat stel om geskikte grond te vind om die perde te verskuif sodat hul voortbestaan verseker kan word. Dié onwilligheid om die omstandighede te bestuur of om kuratorskap toe te staan, voorspel algehele uitwissing vir die wilde perde, sê die stigting. “Ons wil die perde baie graag help, maar ons hande is afgekap – tensy die ministerie kuratorskap aan ons toestaan.” Oor die laaste drie dekades is miljoene deur duisende Namibiërs en buitelanders geskenk sodat die NWHF die perde tydens droogtes kon voer. Die stigting het die voer aangery en verseker die perde oorleef die droogte, maar dit was oënskynlik tevergeefs, sê die stigting – gegewe die ministerie se onvermoë om die omstandighede te beredder.Volgens hulle het die ministerie 'n verantwoordelikheid teenoor die perde en is hy aanspreeklikheid teenoor weldoeners, Namibië en sy mense.“Die wilde perde is een van die land se toptien-toeristeaantreklikhede. Hulle is ’n belangrike deel van Namibië se geskiedenis en erfenis. Talle dokumentêre flieks is oor die perde gemaak, wat gebruik word om Namibië as gewilde toeristebestemming te bemark. Die verlies van hierdie bevolking sal ongetwyfeld Namibië as handelsnaam skade berokken.“Indien die ministerie nie optree nie, sal die wêreld Namibiërs skeef aankyk, wat hul bevolking van wilde perde laat sterf het, terwyl eenvoudige oplossings geredelik beskikbaar was,” sluit die verklaring af.

Wilde perde: Hoop kwyn

Kommentaar

Republikein 2025-07-23

Meld asseblief aan om kommentaar te lewer

Wilde perde: Hoop kwyn

Kommentaar

Republikein 2025-07-23

Meld asseblief aan om kommentaar te lewer

MELD AAN

Advertensie