Wilde perde: Drie hiënas geskiet

Tanja Bause - Die ministerie van die omgewing en toerisme het in ’n nuusverklaring gesê hulle het drie van die hiënas in die Garub-omgewing van kant gemaak. Mnr. Romeo Muyunda, woordvoerder van die ministerie, het gesê herhaalde pogings om die hiënas te vang, was nie suksesvol nie en daar is toe besluit om dié diere van kant te maak.“Ons het drie geskiet, onder andere die volwasse wyfie wat ons glo die hoofrede vir die hoë dodetal onder die vullens was,” het hy gesê. Volgens Muyunda is daar nog drie probleemhiënas in die Garub-omgewing, wat die ministerie steeds sal probeer vang.“As ons hulle nie gevang kry nie sal ons hulle as ’n laaste uitweg ook van kant maak,” het hy gesê.Mnr. Piet Swiegers van Namibia Wild Horses Foundation het bevestig drie hiënas is geskiet. “Mense moet verstaan ons het nie ’n probleem daarmee as gevlekte hiënas in die gebied bly nie. Dit is net die hiënas wat tans daar is en die vullens van die wilde perde vang, wat ’n probleem is. As ’n nuwe trop hiënas in die gebied intrek, sal hulle weer, soos voor die droogte, volstruise en gemsbokke vang. Hiënas het ook ’n plek in die ekologie van die plek, maar hulle moet dopgehou word,” het hy gesê. Die ministerie het ’n Wild Horses Action Plan, wat onder meer roofdierbestuur, watervoorsiening, toerismeontwikkeling en aanvullende voeding as ’n langtermynstrategie vir die bestuur van die perde ontwikkel. “Die perde is baie belangrik omdat hulle deel van Namibië se erfenis is. Hul uitwissing sal nie net nadelig vir die Suide wees nie, maar vir die toerismesektor in die geheel, en die ministerie sal dit nie toelaat nie,” lui die verklaring. Intussen het Swiegers gesê die vul leef nog, wat ’n paar dae gelede deur die hiënas gebyt is. “Ons het die vul gister gesien en dit lyk of die wond gesond word.”

Wilde perde: Drie hiënas geskiet

Kommentaar

Republikein 2026-05-05

Meld asseblief aan om kommentaar te lewer

Wilde perde: Drie hiënas geskiet

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.