Wild- en veediefstal ’n erge ‘epidemie’

Elvira Hattingh - Otavi-boere wie se plase aan die Queen Sophia-hervestigingsplaas grens, sê vee- en wilddiewe is besig om hulle finansieel te ruïneer en uit hul boerderye te dwing. Die bejaarde egpaar *Schmidt van onderskeidelik 70 en 65 jaar oud, wie se familie reeds 70 jaar lank op die plaas boer, sê oor die afgelope vyf jaar is sowat 480 beeste van hulle gesteel – en dit sluit gestroopte wild uit. Daaronder tel ook twee duur Simmentaler-teelbulle. Boonop het die egpaar reeds verskeie doodsdreigemente van stropers ontvang. “Tydens een so geleentheid is my man voor ’n polisieman met die dood gedreig. Tot dusver was daar nie aanslae op ons lewens nie, maar ons wag vir daardie dag. Ons senuwees is klaar,” sê me. Schmidt.Hulle doen ook ’n beroep op die regering om landwyd in te gryp as dit by wild- en veediefstal kom. Die Schmidts is raadop en wil nou ’n brief aan pres. Hage Geingob stuur, wat onder meer vertel van die verliese wat hulle en ander nabygeleë boere ervaar en ook daadwerklike oplossings vir die probleem bevat.Volgens die Schmidts het hulle net in die afgelope twee jaar sowat 100 beeste verloor, terwyl hul buurman wat met wild boer, mnr. Gert Coetzee, ook oor stropery kla. “Die stropers maak my trofeediere dood. Dit het nou al so ver gegaan dat ek ’n sekuriteitsmaatskappy gehuur het om my grensdrade te patrolleer. “Die polisie reageer egter elke keer vinnig as ons hulle nodig het. Hulle doen werklik hulle bes om ons met hul beskikbare hulpmiddele te help en vang dikwels die veediewe. Die diewe gaan egter net voort om te stroop sodra hulle op borgtog vrygelaat word. “Ons doen ’n beroep op die president om in te gryp,” het Coetzee gesê. Hy het die name van nog drie ander nabygeleë boere genoem wat ook kort-kort onder die diewe deurloop. DRAADSTRIKKETerselfdertyd het nog ’n ontluikende boer op ’n plaas wat nader aan die Okoruso-myn geleë is, glo onlangs ook sowat 20 beeste weens veediefstal verloor.“Die stropers maak draadstrikke van ons lyndrade waarmee hulle diere vang. Die afgelope vyf jaar trek ons finansieel baie swaar,” het die Schmidts gesê. “Die polisie het onlangs weer veediewe op die hervestigingsplaas betrap waar hulle tien van ons beeste geslag het. Twee is dadelik in hegtenis geneem, terwyl ’n derde persoon later op Otjiwarongo gevang is,” het hulle gesê.“Vroeër vanjaar het ons een van ons beeste op die hervestigingsplaas dood in ’n draadstrik gevind, terwyl ’n elandbul ook gestroop is.”Die Schmidts vertel dat veediewe op die hervestigingsplaas ook in 2015 betrap is waar hulle vyf van die buurplase se beeste geslag het, maar nie gevang is nie. “Ons het stropers al sewe keer op ons plaas betrap, maar my man het my belowe dat hy nie op hulle sal skiet nie. Ons het respek vir menselewens en sien mos wat met ander boere gebeur wat uit frustrasie knak.“Hoeveel boere wat hul besittings wil beskerm, moet nog in die tronk beland net omdat nie teen kriminele opgetree word nie?” het die die egpaar gesê.Schmidt sê haar man het vandeesweek weer spore van honde en vermoedelik jagters op hul plaas gevind en dat haar man se gesondheid onder die voortdurende stres ly. “Hy het onlangs ’n beroerte gehad.“Ons boer reeds vir 43 jaar op ons plaas nadat ons dit in 1933 by my skoonpa gekoop het. Ons kinders stel egter nou nie meer belang in die familieplaas nie.”Die egpaar vermoed dat die gestroopte vleis langs die pad asook by nabygeleë weermagkampe verkoop word. Coetzee stem saam dat dit as ’n goeie inkomste vir die diewe dien. “Ek het niks teen diegene wat vleis in dorpe verkoop nie, mits dit wettig verkry is. Na bewering verdien diegene wat dit in nedersettings verkoop tot N$200 000 per maand. Betaal die persone belasting?” vra die Schmidts. Die Queen Sophia-hervestigingsplaas is sowat 24 000 ha groot en is naby die grens van die Otavi-Outjo-gebied geleë. Dit is sowat 18 jaar gelede deur die List-familie aan die regering geskenk om as ’n hervestigingsplaas asook ’n opleidingsfasiliteit vir landbou te dien. Die Spaanse regering was in ’n stadium verantwoordelik vir die projek en het onder meer huise gebou vir die dertig families wat aanvanklik daar gevestig is en ook vir hulle vee geskenk. *Die skuilnaam Schmidt is gebruik, weens die feit dat die egpaar reeds doodsdreigemente ontvang het.

Wild- en veediefstal ’n erge ‘epidemie’

Kommentaar

Republikein 2025-06-19

Meld asseblief aan om kommentaar te lewer

Wild- en veediefstal ’n erge ‘epidemie’

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie