Wiese het al 3de van sy belang in Shoprite verkoop

Nellie Brand-Jonker - Die beleërde sakeman Christo Wiese het sedert Desember omtrent ’n derde van sy aandele in die Shoprite-groep teen altesame R7,8 miljard verkoop.

Bloomberg het Woensdagoggend berig Wiese het vandeesweek in ’n private plasing 17 miljoen aandele verkoop. Hy het die aandele teen R220 elk verkoop, wat beteken hy het omtrent R3,7 miljard ingesamel daarmee.

Dit kom nadat hy in Desember sowat 19 miljoen aandele in Shoprite verkoop het teen omtrent R4,1 miljard.

Wiese het by navraag bevestig dit is omtrent ’n derde van sy belang in Shoprite wat sedert Desember verkoop is. Hy wou nie verder kommentaar lewer nie en het gesê hy volstaan by ’n verklaring wat uitgestuur is.

In die verklaring is gesê geen verdere transaksies in Shoprite-aandele word oorweeg nie. Investec het egter in ’n kennisgewing aan beleggers gesê die mark is versigtig gegewe dat dit ’n derde is wat verkoop is sedert Steinhoff se ineenstorting.

Shoprite se aandeelprys het teen 10:30 met 5% tot R213,34 geval nadat die nuus bekend geword het.

Verkope in Desember

So het Wiese aandele in Desember verkoop in Shoprite:

· 2 miljoen aandele teen R431,9 miljoen op 14 Desember

· 3,6 miljoen aandele teen R769,6 miljoen op 15 Desember

· 4,4 miljoen aandele teen R960,4 miljoen op 18 Desember

· 5 miljoen aandele teen R1,107 miljard op 19 Desember

· 4,2 miljoen aandele teen R868,6 miljoen op 21 Desember

Bloomberg het berig Wiese het in ’n private plasing aan instellings die aandele verkoop. Die aandele is in ’n versnelde boekbou geplaas wat deur Morgan Stanley, Rand Merchant Bank en Absa gereël is.

Die aandele is deur Titan, die beleggingsbeheerfirma waarin Wiese van sy bates hou, verkoop. Titan het omtrent 79 miljoen aandele in Shoprite oorgehou voor die plasing, wat omtrent ’n belang van 14% beloop het.

Nog niks is op Sens aangekondig deur Shoprite nie.

Wiese het gesê dis ’n transaksie in afgeleide instrumente wat hy gedoen het.

Dit is bekend dat hy sedert die Steinhoff-debakel in Desember van sy bates moes verkoop om sy balansstaat te balanseer.

Steinhoff se aandeelprys het sedert vroeg Desember ineengestort nadat die maatskappy aangekondig het sy jaarstate kan nie uitgereik word nie en ’n forensiese ondersoek kom oor sy boeke.

Wiese was die grootste aandeelhouer in Steinhoff, maar sy aandele is deur banke van hom vervreem omdat lenings met die aandele as sekuriteit aangegaan is. Die ineenstorting van Steinhoff se aandeelprys het meegebring dat die lenings opgeroep is.

Einde Julie 2017 het Wiese ’n belang van 16,8% of 101,3 miljoen aandele in Shoprite gehou. Netwerk24 se berekening toon hy het nou altesaam 36,2 miljoen aandele sedert Desember verkoop, wat op 35% van sy aandele neerkom. Hy het dus nou ’n belang van omtrent 11% oor.

Shoprite het drie aankondigings in Desember gedoen vir aandele wat hy verkoop het. Dit is in vyf transaksies verkoop. - Netwerk24