Wi-Fi sónder internet

Augetto Graig - Nuwe tegnologie bring talle Namibiërs wat nie toegang tot die wêreldwye web en ander inligtingsbronne het nie, nader aan dié droom.Met die gebruik van ’n klein boksie wat as Wi-Fi-sender dien, kan slimfone en soortgelyke persoonlike kommunikasietoerusting voorafgelaaide inligting binne ’n gebied van 200 m gratis opvang. Dokumente kan afgelaai word en video's kan gekyk word sonder data of die gebruik van enige ander diensverskaffer. Meer as 50 mense kan met een van dié boksies gelyktydig toegang tot inligting hê. Die boksies kan ook saamwerk om meer dekking en toegang aan meer mense te verskaf. Me. Angelica Bergmann, entrepreneur en eienaar van WiFree Namibië, bring Mr. Signal-tegnologie en die WiFree-geleentheid na Namibië met die ondersteuning van die voormalige eerste dame, me. Penehupifo Pohamba, en in vennootskap met die Duitse vervaardigers mnre. Claus Jobst en Markus Schollmeyer. Volgens Bergmann kos elk van dié boksies tussen N$25 000 en N$35 000, maar die opsie om dit af te betaal, bestaan ook. Die patent en fabriek vir die boksies is in Duitsland, maar die sagteware vir die stelsel word na bedienerrekenaars in Namibië verplaas, sê Bergmann. Tans volg sy alle toepaslike regulasies en is in die proses om ’n bedryfslisensie vir werksaamhede in Namibië aan te skaf, sê sy. “Namibië sal die vlagskip wees om hierdie projek in Afrika van stapel te stuur,” sê sy. Namibië is die eerste land in Afrika waar dié innoverende tegnologie beskikbaar gaan wees.Die oprigting van ’n komponentlaboratorium en fabriek en die uiteindelike uitvoer van die tegnologie na die res van die vasteland word beoog. Aanvanklik gaan 20 Mr. Signal-boksies ter waarde van N$700 000 en ’n aantal slimfone beskikbaar gemaak word aan die ministerie van geslagsgelykheid en kinderwelsyn, die Khomasstreeksraad, die enkelouervereniging, Laerskool Elongo en hul opleidingsentrum, welsynorganisasies betrokke by vroeë kinderontwikkeling, en verskeie ander organisasies, sê Pohamba. Sy sê volgens die Regulerende Owerheid vir Kommunikasie van Namibië (CRAN) besit 99% van Namibië se bevolking selfone, maar net 25% het internettoegang. “Ons het onmiddellike oplossings vir die nasionale inligtingsgaping nodig,” sê sy. Volgens haar kan die Mr. Signal-toestelle gebruik word om inligting op ’n verantwoordelike manier met almal te deel - “van die regering tot die privaat sektor, asook individue op grondvlak in afgeleë gebiede”. “Die Mr. Signal-toestelle is nuttig vir vertroulike interne kommunikasie en administrasie sowel as vir die beskerming van hoogs sensitiewe inligting waartoe geselekteerde individue toegang het. Dít danksy die ontledingstelsel wat toegang foutloos kan monitor en 'n onverbeterlike en ondeurdringbare inligtingsnetwerk kan skep,” sê Pohamba.Schollmeyer sê hy was twee jaar gelede vir die eerste keer in Namibië om aan die nasionale innovasiefees deel te neem, “toe Namibië my hart gesteel het”. Daarna het hy geleenthede ondersoek om opvoedkundige inligting toeganklik vir almal in die land te maak. Jobst, wat die afgelope vyf jaar daaraan wy om dié tegnologie te ontwikkel, het gesê die inhoud van elke Mr. Signal-boksie word daarop gelaai en kan maklik óf deur die internet, óf met ’n skootrekenaar aangepas en opgedateer word.Die boksie gebruik min krag, wat beteken daar kan van sonkrag of ander hernubare bronne gebruik gemaak word, sê hy. Normaalweg stuur dit tot 54 MB per sekonde uit, maar dié spoed kan verhoog word, en die toepassing van hierdie tegnologie is verenigbaar met ander tegnologieë, sê Jobst.Belangstellendes kan uitsien na ’n voorsmakie van dié nuwe tegnologie tydens die feestelike installasie daarvan op Groot Aub op 16 Oktober.

Wi-Fi sónder internet

Kommentaar

Republikein 2025-11-05

Meld asseblief aan om kommentaar te lewer

Wi-Fi sónder internet

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.