Whisky-fees aan die kus

Sheena Schwartz - Die eerste Whisky-fees in Namibië vind hierdie naweek by The Dome in Swakopmund plaas.
Dié twee dag lange gebeurtenis sal whisky-entoesiaste en -uitstallers onder een dak verwelkom en die tema is “Connoisseur or Non-Connoisseur . . . How you enjoy it is up to you”.
Verskeie gesogte whiskies sal geproe kan word maar die geleentheid het ook ? groot lewenstylelement. Die veelsydigheid van whisky sal deur kosparing, skemerkelkies gekombineer met die bittersoet smaak van sjokolades en koffie gedemonstreer word. Lewendige vermaak word ook aangebied.
Kaartjies vir die fees is beskikbaar by www.namibiawhiskyfestival.com.na en vir meer inligting stuur ‘n e-pos na [email protected].
Hier is ? paar agtergrondfeite van hierdie drankie wat glo ? gunsteling van die Britse Koninginmoeder was.
Die storie van whisky
Volgens wikipedia.org whisky is ? gedistilleerde alkoholiese drank wat van gegiste graanpulp gemaak word. Verskeie graansoorte (wat gemout kan wees) word vir verskillende whisky-variëteite gebruik, insluitende gars, mielies, rog en koring. Whisky word in houtvate verouder, gewoonlik in wit eikehoutvate wat effens gebrand is.
Whisky is wêreldwyd ? streng gereguleerde drank met baie klassifiserings en tipes. Die tipiese verenigende eienskappe van die verskillende tipes is die fermentasie van graan, distillasie en veroudering in houtvate.
Dit is moontlik dat distillering deur die Babiloniërs in Mesopotamië in die tweede millennium v.C. beoefen is, maar weens ? dispuut oor die getuienis kan dit nie vir seker gesê word nie. Distilleringstegnologie is in die Middeleeue van die Arabiere na die Romeine oorgedra. Daar is rekords van die distillering van alkohol van wyn in Italië in die 13de eeu. Die kuns van distillering het in die 15de eeu na Ierland en Skotland versprei.
Whisky of whiskey?
Binne die breë kategorie van whisky is daar vele sub-kategorieë, insluitende bourbon, Tennessee, Skotse, Ierse en Kanadese styl whiskies. Die vervaardiging van elkeen van hierdie tipes whisky word deur die drank se land van oorsprong gereguleer. Die gevolg is dat Kanadese whisky byvoorbeeld heeltemal verskil van Skotse, Ierse of Amerikaanse styl whiskies soos Tennessee of bourbon. Die verskillende spellings van whisky/whiskey word deur www.thekitchn.com/whiskey-vs-whisky soos volg verduidelik:
In lande wat ? e in hul name het (Verenigde State van Amerika en Ierland) is mense geneig om die spelling “whiskey” (meervoud whiskeys) te gebruik. In lande sonder ? e in die naam (Kanada, Skotland en Japan) is die verkose spelling “whisky” (meervoud: whiskies). (Miskien is dit ? goeie tyd om ? glasie te drink ongeag van hoe dit gespel word.)
Watter whisky by watter kos?
Dit is moeilik om sekere kos soos byvoorbeeld Italiaanse of Indiese kos saam met ’n glas whisky voor te stel. Daar is egter uitsonderings en hier is ’n paar aanbevelings deur koskenner Fiona Beckett:
Belangrik om te onhou is hoe ouer die whisky, hoe meer prikkelend en kompleks die kombinasie met kos is.
Ligte, geurige whiskies met ’n tikkie soet gaan goed saam met sushi, gerookte salm, krap, hoender- en preisop en sagte, romerige kase.
Mediumsterkte whiskies met ’n turfagtige ondertoon komplementeer gerookte kos soos makriel, mossels, oesters, eend en wildsvleis. Dit gaan ook goed saam met gebraaide kammossels, spek en wildsvleis met ’n romerige sampioensous
Volronde en ryk whiskies wat in kersiehoutvate verouder is, is ’n goeie metgesel vir gebraaide biefstuk en varkvleis, geroosterde wildsvleis met gekaramelliseerde wortelgroentes, ryk vrugtekoeke, pekanneuttert, toffiepoeding, donker sjokolade, gemmerkoekies en verouderde Cheddarkaas
Sterk turfagtige whiskies: Met hierdie sterk geure behoort ’n mens met dominerende smake te eksperimenteer. Geniet dit saam met geregte met ansjovis of warm gerookte salm, Bottarga, gerookte hoender, verouderde boere-cheddarkaas en sterk bloukase, veral Roquefort.
Hou ook in gedagte dat sommige whiskies, veral die sterker tipes, beter saam met kos werk as dit ’n skeutjie water by het.
Whisky en gesondheid – matigheid is die wagwoord!
Liefhebbers van whisky glo aan die gesondheidsvoordele daarvan, wat blykbaar gewigsverlies, die vertraging van die aanvangs van dementia, verbeterde hartgesondheid, voorkoming en beheer van diabetes, die bevordering van goeie cholesterol, beskerming teen kanker, eliminering van bloedklonte en die versterking van die immuunstelsel insluit.
Hierdie gesondheidsvoordele klink wonderlik, maar daar is ook ’n gevaarlike kant aan sterk drank verbonde. Alkoholisme en oormatig drankverbruik is katastrofaal vir jou algehele gesondheid en kan enige positiewe effek van matige hoeveelhede whisky ongedaan maak.
Geniet klein hoeveelhede vir die beste en gesondste resultaat. Bronne: www.thekitchn.com/whiskey-vs-whisky; www.wikipedia.org; www.matchingfoodandwine.com; organicfacts.net