Wet slaan toe op wapenlisensies

Denver Kisting – Op die oomblik hoef iemand wat om ’n wapenlisensie aansoek doen, nie bewys te lewer dat hulle in staat is om ’n wapen te hanteer of met vuurwapens handel te dryf nie.Boonop was daar in 2004 sowat 97 262 wapenlisensies in omloop, terwyl dié syfer tans op 210 000 staan – meer as 100% meer.In die derde kwartaal van 2018 alleen is 4 870 aansoeke ingedien om wapens te besit. Die helfte hiervan was vir handwapens om na bewering vir selfverdedigingsdoeleindes te gebruik.Die adjunkminister van veiligheid en sekuriteit, mnr. Daniel Kashikola, het die afgelope week in die Nasionale Vergadering (NV) toegegee die huidige wet is vrot van die leemtes “wat die beheer van vuurwapens en ammunisie betref”.Hy sê 80% van gesteelde vuurwapens is handwapens waarvan sommige vir misdaad gebruik word.Hy het gesê dié werklikheid het die ministerie genoop om die afgelope twee jaar met ander regeringsinstellings, wapenhandelaars, ’n professionele jagliggaam, tradisionele leiers en streekgoewerneurs te beraadslaag.Hierdie samesprekings het tot die totstandkoming van ’n nuwe wetsontwerp oor wapens en ammunisie gelei.Kashikola het die wetsontwerp die afgelope week onder die Huis se aandag gebring.Enigiemand wat voortaan om ’n wapenlisensie aansoek doen, moet eers ’n bevoegdheidsertifikaat bekom.Die bepaling geld vir enigiemand wat ’n wapen wil besit, in wapens handel wil dryf of dit vervaardig.Eweneens is ’n bevoegdheidsertifikaat ook ’n vereiste vir iemand wat wapens wil versamel of sake wil doen as ’n wapensmid of -tussenhandelaar.Aansoeke om bevoegdheidsertifikate moet op ’n voorgeskrewe vorm aan die inspekteur-generaal van die Namibiese polisie gerig word.Die dokument sal net uitgereik word as daar aan ’n aantal vereistes voldoen word. Dit moet elke vyf jaar hernu word.Onder meer moet enigiemand wat vir ’n wapenlisensie of ’n bevoegdheidsertifikaat in aanmerking wil kom, ’n Namibiese burger wees of oor ’n permanente verblyfpermit beskik.Sodanige persoon moet ook minstens 18 jaar oud wees.Iemand wat aan ’n geestesongesteldheid ly of na bewering aan een ly, sal nie in aanmerking kom nie.Sou die wetsontwerp ’n wet word, gaan mense wat aan drank en dwelms verslaaf is, eweneens nie vir ’n bevoegdheidsertifikaat oorweeg word nie.Diegene, wat onder die nuwe beplande wet aan ’n oortreding skuldig bevind word en tronkstraf opgelê word sonder die opsie van ’n boete, sal ook nie geskik geag word nie.Iemand wat in Namibië of elders skuldig bevind is aan die onwettige gebruik of hantering van wapens sal ook voortaan die kanse op ’n wapenlisensie verbeur.Die beoogde wet verbied die owerhede ook om ’n bevoegdheidsertifikaat uit te reik aan enigiemand wat, hetsy in Namibië óf elders, aan ’n geweldsmisdaad, insluitend huishoudelike geweld en seksuele mishandeling, skuldig bevind is.Iemand wat op enige plek ter wêreld aan ’n misdaad skuldig bevind is aan die misbruik van alkohol en tronkstraf sonder die opsie van ’n boete opgelê is, sal ook van ’n bevoegdheidsertifikaat moet vergeet.Dieselfde geld oortredings wat met die nalatige of roekelose hantering van ’n vuurwapen verband hou.

Wet slaan toe op wapenlisensies

Kommentaar

Republikein 2025-10-28

Meld asseblief aan om kommentaar te lewer

Wet slaan toe op wapenlisensies

Kommentaar

Republikein 2025-10-28

Meld asseblief aan om kommentaar te lewer

MELD AAN

Advertensie