Westair 'wil plaaslike bedryf beskerm'

Augetto Graig - Westair Aviation het gister bevestig dat hulle wel die 4 Embraer ERJ 135-vliegtuie wat Air Namibië gebruik vir plaaslike en streeksroetes van hul vorige eienaars, Air France / HOP!, aangekoop het. Volgens me. Desireé Willemse, Westair se besturende direkteur se persoonlike assistent, wil Westair graag “alle belanghebbers en reisigers verseker dat die vliegtuie vir Air Namibië beskikbaar sal bly". Volgens Willemse is die enigste aspek wat verander dat die betrokke vliegtuie nie meer in buitelandse besit sal wees nie.“Afgesien daarvan bied dié onderneming die huidige binnelandse en plaaslike vloot die geleentheid om op te gradeer. Dit sal kwessies van betroubaarheid aanspreek, wat reisigers op die lang termyn negatief kan beïnvloed. Westair onderneem om alle voorwaardes van die vliegtuie se huidige huurkontrak na te kom en sodoende alle belanghebbendes se regte te beskerm,” het sy gesê.Willemse het gesê Westair is ’n suiwer Namibiese maatskappy wat die bevordering en ondersteuning van sake binne die land se grense ondersteun. “In die afgelope 50 jaar van Westair Aviation se bestaan, het ons voortdurend die maatskappy se kernbesigheidsareas uitgebrei. Dit sluit in die verkryging, herstel en huur van vliegtuie, en direkte vliegtuig-bedrywighede. Hierdie nuwe onderneming strook met Westair se kernwaardes van sake doen in Namibië,” het sy gesê.“Die huidige instroming van vyf streeksvlugte en ses internasionale lugrederye het baie min wedersydse voordeel. Dit het getoon dat daar ’n behoefte is aan die bevordering van lugvaartbesigheid in die land deur plaaslike ondernemings soos Air Namibia te ondersteun. Dis ’n eerste vir ’n Namibiese onderneming en 'n groot stap in die versekering van die Namibiese lugvaartbedryf,” het sy gesê.Air Namibia kry reeds swaar en is verlede week nóg ’n slag toegedien toe die ministerie van werke en vervoer hulle ingelig het daar is nie vandeesmaand geld vir hul subsidie nie. Verlede Woensdag het mnr. Willem Goeiemann, die permanente sekretaris van die ministerie, ’n brief aan Air Namibia gerig om hulle in kennis te stel dat die verwagte subsidie nie betaal gaan word nie.“Weens beperkte fondse van die tesourie wat vir Julie toegeken is, is die ministerie nie in staat om jul regeringsubsidie te betaal nie. Die ministerie moedig Air Namibia aan om ander reëlings te tref om Julie se huur, onderhoud en brandstof te betaal,” lees die brief. Terselfdertyd vra Goeiemann ook Air Namibia moet alle finansiering wat hulle van die regering ontvang het, asook betalings wat in die 2017-'18-boekjaar gemaak is, op skrif stel en aan hulle verskaf. Hy het gesê die ministerie en Air Namibia bespreek die saak nog, en hy wou nie subsidiebedrag bevestig nie. Oor die vier vliegtuie sê Air Namibia se woordvoerder, mnr. Paul Nakawa: “Air Namibia verwag dat die bedrywighede sal voortgaan soos altyd - sonder onderbrekings. As gevolg van vertroulikheid kan die lugredery nie verder uitbrei nie. Ons doen 'n beroep op lede van die publiek om kalm te bly,” het hy gesê.

Westair 'wil plaaslike bedryf beskerm'

Kommentaar

Republikein 2026-03-19

Meld asseblief aan om kommentaar te lewer

Westair 'wil plaaslike bedryf beskerm'

Kommentaar

Republikein 2026-03-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.