Werkers knap Greiters op

Ronelle Rademeyer – Die eienares van Greiters-konferensie- en -rehabilitasiesentrum by Brakwater, waar die 35 terugkerende Namibiërs tans in kwarantyn is, sê sy buig agteroor om hul verblyf so gerieflik moontlik te maak.Me. Cynthia Martin-Haihambo, wat Hebhiziba Holdings besit aan wie dié lodge behoort, sê sy is Vrydag eers van hul koms ingelig en het “tot vieruur die oggend gewerk om die plek skoon te maak”. Die KLM-vlug uit Amsterdam het Saterdag omstreeks 10:00 geland.Van die mense in kwarantyn het sedert hul aankoms in plasings in die sosiale media gekla oor die onhigiëniese en vuil toestande by die lodge. Van hulle was ook ontevrede met die kos wat aan hulle voorgesit word.Martin-Haihambo het gister in ’n lang telefoniese onderhoud gesê sy het tans ’n span werkers daar wat die nodige opknappings- en instandhoudingswerk doen, maar ontken die lodge is nie in ’n leefbare toestand nie.Op ’n vraag of die span werkers se teenwoordigheid daar nie ’n gesondheidsrisiko is nie, aangesien hulle saans na hul huise terugkeer, het sy gesê hulle dra maskers, handskoene en beskermende klere.Volgens haar is van die foto’s oor die toestande by die lodge wat op Facebook en Instagram verskyn het, geneem van ’n ander gebou en nie dié deel waar die groep gehuisves word nie.“Hier is ’n gim, stoomkamer, sauna en biblioteek vir die mense. Van die jongmense het reeds begin om in die biblioteek te studeer.”Sy sê hoewel die ministerie van gesondheid en maatskaplike dienste die groep van etes voorsien, het sy uit haar eie ander spyseniering gereël. “As jy salm gewoond is, sal jy nie boerewors en spaghetti eet nie,” is haar verduideliking oor die ongelukkigheid.“Die mense is gefrustreerd omdat hulle in kwarantyn is. Hulle gebruik alles wat hulle kan teen ons.” Martin-Haihambo ontken dat die lodge die laaste tyd nie operasioneel was nie.Oor ’n faktuur vir die aankoop van 200 stelle linne, duvets, kussings en handdoeke ter waarde van N$626 515,40, sê sy dit is gedoen omdat sy graag vir die groep splinternuwe beddegoed en handdoeke wou gee.Die aankope is deur Global Mandate Consulting Namibia gedoen, met die besturende vennoot me. Marcelina !Gaoses wat op die faktuur as die kontakpersoon aangedui word.!Gaoses, ’n bekende in sakekringe, het aan Republikein gesê “sy help die regering as ’n korporatiewe burger”, en het gesê Martin-Haihambo moet oor die transaksie gekontak word.Intussen het mnr. Hassan Engelbrecht van Williams Legal Practitioners kort voor druktyd gister ’n verklaring namens Martin-Haihambo uitgereik waarin “die media en/of enige individu wie se voorneme dit is om die goeie naam en reputasie van sy kliënt sonder grondige bewyse aan te tas” teen regstappe gewaarsku word. Engelbrecht voer aan klagtes in die sosiale media “deur ’n paar” van die terugkerende Namibiërs en lede van die media “is vir die grootste deel oordrewe, ongelukkig en heeltemal onwaar, gegewe die krisis waarin ons verkeer”.Dr. Bernhard Haufiku, die nasionale Covid-19-koördineerder en voormalige minister van gesondheid en maatskaplike dienste, sou laat gister ’n besoek aan Greiters gebring het om na klagtes te luister en kommunikasie tussen die groep en die ministerie te bevorder. – ronelle@republikein.com.na

Werkers knap Greiters op

Kommentaar

Republikein 2026-02-03

Meld asseblief aan om kommentaar te lewer

Werkers knap Greiters op

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.