Werk by Neckartal staan oor wanbetaling

Ronelle Rademeyer - Die laaste meganiese, elektriese en ander afrondingswerk aan die Neckartaldam is gestaak aangesien die regering nie die Italiaanse kontrakteur, Salini SpA, betaal nie.Die ministerie van landbou, water en bosbou het dit gister bevestig.Belanghebbende partye ontvang die afgelope twee weke reeds kennisgewings dat die weeklikse aktiwiteitsvergadering, waartydens die kontrakteur terugvoering gee oor sy werksaamhede en vordering, afgestel is. Dit is gedoen aangesien geen werk tans geskied nie.Die terreinvergadering wat die week van 25 Maart sou plaasvind, is ook gekanselleer.Bouwerk aan die dam is volgens ’n bron “sowat 98%” voltooi. “Die siviele werk is afgehandel en die pypleiding is gedoen. Die groot taak nou is om die meganiese en elektriese werk af te handel en toetse te doen om seker te maak die turbines wat krag opwek, werk reg,” sê die bron.Die dam, waarvan die koste nou sowat N$6 miljard beloop, bestaan uit drie komponente, naamlik die hoofdam, die keerwal en die balanseerdam.Die hoofdam vang die water op, vanwaar dit vrygelaat word om sowat 10 km stroomaf tot by die keerwal te vloei. Vandaar word dit na ’n pompstasie herlei, wat dit na die balanseerdam naby Slangkop pomp. Dit is water uit dié dam wat vir besproeiing by die beoogde landboukleinhoewes aangewend sal word.Die werk om hierdie kleinhoewes te diens en vir landboubeleggers lewensvatbaar te maak, moet nog geskied.Die tender is aanvanklik vir ’n bedrag van sowat N$3 miljard aan Salini toegeken, met Knight Piésold as die ingenieurskonsultante. ’n Groot rede waarom die dam die land uiteindelik dubbel soveel kos, is die boetes wat die regering ingevolge die konstruksiereëls moet opdok, sê die bron.NamWater het einde 2017 vir ’n lening van N$600 miljoen by die Ontwikkelingsbank van Namibië (DBN) pa gestaan toe die regering se betalings aan Salini ook ver agterstallig geraak het.Nie al dié geld is al aan Salini oorbetaal nie, is gister verneem.Die minister van landbou, water en bosbou, mnr. Alpheus !Naruseb, het kort voor druktyd bevestig die regering skuld Salini geld.Hy het gesê hy is nie op hoogte van die feite nie, maar weet daar was ’n dispuut oor bedrae wat geëis is en dit is nou aan ‘n arbitrasieproses onderhewig. Die uitvoerende direkteur van dié ministerie, mnr. Percy Misika, het in reaksie op ‘n skriftelike navraag gesê “kwessies van betaling is ‘n kontraktuele aangeleentheid en kan ongelukkig nie in die media bespreek word nie”.“Die regering is in gesprek met die kontrakteur oor die kwessie,” het hy geantwoord.

Werk by Neckartal staan oor wanbetaling

Kommentaar

Republikein 2025-12-25

Meld asseblief aan om kommentaar te lewer

Werk by Neckartal staan oor wanbetaling

Kommentaar

Republikein 2025-12-25

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.