Werk ‘blou fieterjoel’ regtig?

Liewe Gerda,Ek hoop jy het raad. Dalk kan jy sommer my brief vir Oprah ook aanstuur, gee sy nog karre weg? Gesien in Huisgenoot sy sê hoe lief is sy vir brood en ons kan dit maar eet, ons boude en blaaie gaan niks oorkom nie. Klaradyn se pa sê sy eet eintlik net ryskoekies, maar toe betaal hulle vir haar om te sê brood is eintlik haar ding en nou is sy nog ryker en kan sy nog meer karre weggee.Eintlik sê Klaradyn se pa miskien moet Jerry Springer eerder help, hierdie is ’n saak vir ’n man, Oprah ken nie van dié tipe goed nie. Leef Jerry nog? Ons het altyd sy programme getape.Dis Marnus wie se hormone hom so pla. Blykbaar was sy oupa en dié se pa ook stoetbulle. Dis nou as jy Klaradyn se pa se spoggery by die buurtbraai kan glo. Jy weet die mans koek mos so saam om die vuur asof hulle daar geplant is. Al wanneer jy in die kombuis van hulle hoor en sien, is wanneer hulle roep: “Mamma, kom skep tog vir Pappa ’n bordjie!”Klaradyn se pa sê dis net oor ons vrouens jaloers is omdat ons moet aartappelslaai maak en hulle tjops vinnig braai.Dié dink natuurlik nie die hele affêre met Marnus is ’n voorbladstorie vir Huisgenoot nie. Maar dis van affêre wat Klaradyn nou te skaam is om te sê Marnus is familie, al is dit nou ook ’n aangestikte lappie.Ek het mos vir jou Marnus se CD met sy Bles-liedjies aangestuur, het jy al geluister? Bles draai ook drie keer in sy goue graf om as hy hoor wat Marnus nou alles aanjaag. Eintlik was Bles mos ook maar ’n bul, onthou jy hoe het hy en Marietjie in Huisgenoot geposeer? As ek reg onthou, was hulle in Mauritius ook en arme Leonie sit vingeralleen by die huis. Iewers was ook ’n foto waar Marietjie nog Bles se valletjieshemde stryk. Miskien moes Leonie maar eerder ook vir Bles gestryk het, dan was sy ook in Mauritius, sê Klaradyn se pa.Die hele affêre met Marnus het by die skool van alle plekke begin. Hy speel mos nou skielik rugby en die kinders moes geld insamel vir ’n toer Weskus toe. Plekke soos Springbok en Garies en daai rigting op Saldanha se kant toe. Dis nou ’n ander liga as die kinders wat op Stellenbosch en in die Paarl gaan speel. Marnus was vreeslik geheimsinnig oor wat hy gaan doen om geld in te samel. Ons kan nie help nie, want Klaradyn moet in Suid-Afrika gaan dans en dié keer is dit by Sun City en dit kos ’n plaas se prys.Klaradyn se pa en Marnus het net so in die verbygaan elke keer vir mekaar ooggeknip as ek vra wat gaan hy doen om sy toer te betaal. Dis vir my swaar, Gerda, ek is ’n vrou van beginsels en die sameroeper van ons bid- en teeskinkgroepie by die kerk. Die skaamte.Marnus-hulle het besluit om karre te was. Wat natuurlik alles binne die beleid van die skool en die waterbeperkings was, want hulle gebruik mos emmers. Sommer so by die skool langs die busloods gewas. Ek moes al lont geruik het toe ons hoe lank in ’n tou karre beland op pad skool toe om darem net vir Marnus te ondersteun. Het gelyk soos daardie jare lange rye karre as ’n Hans Strydom- of Sybil Coetzee-fliek by die inry gewys het. Later het ons gedink dalk is dit een of ander hoë ou se begrafnis en almal wil gaan gesig wys, en ons het per ongeluk in die stoet beland. Marnus en sy pelle het toe al bloedrooi en blase gebrand, kaal bolyf. En toe die meisies. In hempies wat ek nou nie eers as ’n vatlap kan gebruik nie. Wriemel oor windscreens en bonnets, Hentiesbaai se Miss Wet T-shirt-kompetisie, maar net met karre by. Geil, sê ek jou. Was dit nie vir al die geld wat hulle ingesamel het nie, glo die meeste nog ooit in die bestaan van die skool en toere, was Marnus nou geskors. Dié lyk soos ’n kat wat room gesteel het. Sies. Dink jy “blou fieterjoel” werk regtig? GroeteKlaradyn se ma

Werk ‘blou fieterjoel’ regtig?

Kommentaar

Republikein 2025-05-29

Meld asseblief aan om kommentaar te lewer

Werk ‘blou fieterjoel’ regtig?

Kommentaar

Republikein 2025-05-29

Meld asseblief aan om kommentaar te lewer

MELD AAN

Advertensie