Werk 45 m bo die grond

Tanja Bause - Net buite Windhoek by die Auas-substasie hang vier mans 45 meter bo die grond en werk aan 400 000 volt-kragkabels wat nie afgeskakel is nie. “Dit is die eerste keer dat Namibiërs aan dié hoogspanningskabels van 400 000 volt werk,” vertel mnr. Laurens Kuün, eienaar van Lomar Electro Services.Lomar Electro Services is die afgelope drie maande met herstelwerk aan NamPower se kragdrade besig. “Ons het einde Februarie by die Kokerboom-substasie by Keetmanshoop met ’n span van agt mense begin en ons eindig vandag by die Auas-substasie buite Windhoek op die Dordabispad,” het Kuün gesê. Mnre. Andreas Erastus en Paulus Yenna dra spesiale oorpakke terwyl hulle op die kragdrade sit en werk. Die pakke laat die 400 000 volt oor hulle liggaam vloei. “As jy nie die pakke aan het nie, dan ‘prikkel’ die elektrisiteit jou, of soos ons dit stel ‘die elektrisiteit byt jou’,” het Kuün gesê. Die mans kan ongedeerd op die kragdrade sit, omdat hulle nie aan die kragdraad en die grond gelyktydig raak nie. Elke keer wanneer die mans of hul gereedskap naby die drade kom word, word hulle ‘gelaai’ sodat die werkers, die drade en die krag een is, het hy verduidelik. Volgens Kuün is dit net in Suid-Afrika en Namibië waar dié tipe herstelwerk en opgraderingswerk aan die kragdrade gedoen word terwyl dit nie afgeskakel is nie. “NamPower doen die instandhouding om te verseker dat hul verbruikers altyd krag het en ook om die ekonomie van die land aan die gang te hou,” het hy gesê. Volgens mnr. Andreas Erastus is dit die beste werk in die wêreld, want hy het “’n fantastiese uitsig, die beste hoofde” en het hy die beste opleiding gekry om die werk te doen.“Ek is glad nie bang om so ver van die grond af te hang en te werk nie, want my opleiding was van so ’n aard dat ek presies weet wat ek doen. Ek weet ook dat dit baie veilig is, dus is ek hier bo en geniet die uitsig!” het Erastus gesê.

Werk 45 m bo die grond

Kommentaar

Republikein 2025-11-05

Meld asseblief aan om kommentaar te lewer

Werk 45 m bo die grond

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.