Welkome verligting vir handelsbalans

Jo-Maré Duddy - Namibië se invoere wat verlede jaar net 2,6% hoër as dié van 2015 was, is opnuut 'n bewys dat die ekonomie skerp briek aandraai.Data wat gister deur die Namibië Statistiekagentskap (NSA) vrygestel is, toon invoere het die land verlede jaar bykans N$100,7 miljard gekos. Dit is net N$2,5 miljard meer as in 2015. Van 2014 tot 2015 was invoere sowat N$6 miljard of 6,6% meer. In teenstelling daarmee was die gemiddelde styging in invoere van 2012 tot 2014 sowat N$14,5 miljard of 24,2% jaarliks.Die geringe styging in invoere, tesame met uitvoere wat 21% hoër was, het Namibië in 2016 met 'n handelsbalanstekort van sowat N$29,8 miljard gelaat – ongeveer N$9,8 miljard of 24,8% minder as in 2015. Die land het laas in 2010 só 'n groot daling in sy tekort beleef. Volgens die NSA het Namibië 'n gemiddelde handelstekort van bykans N$13,9 miljard van 2007 tot 2016 gehandhaaf. Die grootste tekort van sowat N$39,6 miljard is in 2015 aangeteken. In 2008 het die land 'n surplus van N$997 miljoen gehad.ChinaAs invoermark was China verlede jaar minder belangrik. Dié land was Namibië se vierde vernaamste invoermark nadat dit in 2015 die tweede plek beklee het. Bykans N$2,9 miljard is in 2016 in totaal van China ingevoer, amper N$3,5 miljard of 55% minder as die vorige jaar. Waar China in 2015 sowat 6,4% van totale invoere verteenwoordig het, was dit verlede jaar net 2,8%.Namibië het in 2016 meer as N$2,4 miljard se goedere na China uitgevoer, sowat 21,1% meer as in 2015. Dié land was verlede jaar Namibië se agtste grootste uitvoerbestemming.In dié proses het Namibië se handelsbalans met China aansienlik verbeter. Aan die einde van 2016 het Namibië 'n handelsbalanstekort van net N$433 miljoen teenoor China gehad, vergeleke met sowat N$4,3 miljard die vorige jaar.Ander markteSwitserland het Botswana verlede jaar as Namibië se grootste uitvoermark verbygesteek. Sowat N$13,3 miljard se plaaslike goedere was vir die Switserse mark bestem, bykans 49% meer as in 2015. Daarenteen het uitvoere na Botswana met amper 24% tot N$9,97 miljard geval.Soos in 2015 was Suid-Afrika verlede jaar Namibië se naasbelangrikste mark. Uitvoere na die buurland was egter 0,7% minder as in 2015 en het bykans N$11,36 miljard beloop.Oudergewoonte was Suid-Afrika by verre Namibië se grootste invoermark. Sowat N$59,1 miljard of bykans 59% van alle invoere in 2016 was uit dié land afkomstig. Die vorige jaar het invoere sowat N$62,5 miljard beloop en het dit bykans 64% van totale invoere verteenwoordig.

Welkome verligting vir handelsbalans

Kommentaar

Republikein 2025-06-17

Meld asseblief aan om kommentaar te lewer

Welkome verligting vir handelsbalans

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie