Welkom in Okuryangava

Thusie Gamibes

Jy kan sê wat jy wil van hoe onooglik die informele nedersettings noord van Windhoek lyk, maar wat mense nie raaksien nie is hoe kleurvol en vindingryk die mense van daardie blikkieshuisies is.

Dit is dáár waar jy die vindingrykste entrepreneurs kry.

Nie die Vaseline-blink-langpuntskoen-tenderpreneurs wat met miljoene in die sak niks anders as blink gesigte en spoggerige motors het om mee te pronk nie.

Nee, ek praat hier van mense wat met hul koppe en hande self goed maak en verkoop.

As jy een dag niks het om te doen nie, gaan besoek gerus ons mooi, onooglike lokasie Okuryangava.

Die naam Okuryangava beteken “waar die renosters gewei het”.

Daar kry jy van die kleinste ding wat jy al ooit gesien het tot die grootste.

Die klein huisies of opslaanafdakkies is ons Fruit & Veg, ons Ackermans, ons Pep Stores waar ons groente, meubels, motordele en lokasie-specials kan koop.

Ek wonder wanneer laas ek groot dorp toe was. Ons kry alles in die lokasie – of die Kasie, soos ons sê – met vriendelike diens.

Service-on-wheels kry jy met die mans wat rondry met winkeltrollies en groente en vrugte verkoop, net vir die Kasie se mense.

Jy kry alles wat jy nodig het; van tradisionele kos, medisyne, drank, en selfs westerse kosse.

Natuurlik kry jy die Namibiese smiley (of die bokkop), maar ook lekker smulgoed van ander Afrikalande.

Wat kultuur en musiek betref, kry jy ’n mengsel van alles van oraloor die vasteland.

Ons praat ons Nama, Damara, Ovambo, Herero, en ook Afrikaans en Namlish, natuurlik.

Ons kom van oral en saam bly ons veilig in hierdie plakkerskamp. Dit is ook veilig om rond te beweeg, so ons vat skaars ’n taxi om êrens heen te ry.

Dit is die goedkoopste woonbuurt in Windhoek, dus spaar ons geld.

Ons huise is met sinke gebou, lyk soos sinkhuise van buite, maar in die binnekant lyk dit soos enige ander huis in die stad. Sommige sinkhuise het sommer twee of drie verdiepings, en het ’n praguitsig van Windhoek van bo-op die dak.

Ek het my kollega oortuig om net daar te gaan koop. Nou is dit al ’n gewoonte vir haar om elke Saterdag haar inkopies daar te gaan doen.

Ons is so gemaklik wanneer dit kom by die betaling van water en krag. Ons het koopwater en -krag. Alles wat jy in Okuryangava kry, is N$10, ook ’n taxi huis toe.

As jy vinnig kos wil maak, koop jy gou N$10 se groente en 'n stukkie vleis dan is jou maag klaar vol.

Ons dienste word nie afgesny soos mense wat in meer gegoede woonbuurte in Windhoek woon nie, want ons koop ons dienste met kontant. Ons betaal self want ons zula self. Dit is ’n naam wat nie by die huidige omstandighede in die omgewing pas nie, maar die teenoorgestelde pas presies omdat renosters kwaai diere is.

Vir ons is dit die plek waar vriendelike renosters in hul hoedanigheid as mense nes geskrop het.

Welkom in die woonbuurt van vriendelike Okuryangavas.