Weerwaak teen haelstorms uitgereik

Elvira Hattingh – Die Namibiese weerkantoor het ‘n weerwaak teen haelstorms vanaf vanaand in die noorde en ooste van die land uitgereik, terwyl swaar reënstorms ook na verwagting vanaf môre (Vrydag 13 November) in hierdie plekke kan voorkom.

Die weerkantoor se hoofweervoorspeller, mnr. Odillo Kgobetsi, het vanoggend aan Republikein gesê reën word ook vanaf vandag weer in die binneland verwag, behalwe vir die suidwestelike helfte. Die reën kan tot in die naweek voorkom.

Kgobetsi meen verder dat Namibiërs in die binneland teen Saterdag ook koeler dagtemperature kan verwag – dit danksy ‘n wolkbedekking en reën wat verwag word.

Dit volg nadat reën gister op plekke soos Omaruru, Otjiwarongo en Khorixas uitgesak het, waar dit onderskeidelik 18 mm, 11 mm en 5 mm gereën het.

Christine Potgieter het die foto gister geneem van reënwolke oor Windhoek.