Weermag jag rebelle

Venezuela se top-militêre leiers het laat Maandagnag op staatstelevisie verskyn om steun aan pres. Nicolas Maduro te betoon. Intussen is die owerhede op soek na rebelleleiers wat 'n weermagbasis aangeval het en met wapens ontsnap het.

Omring deur drie tenks en honderde soldate, het die minister van verdediging en hoof van die weermag, genl. Wladimir Padrino, volgehou dat die gewapende magte “verenig is en 'n hoë moraal het.”

Twintig gewapende mans in uniform het Sondag die weermagbasis in die noordwestelike stad, Valencia, aangeval. Hierdie voorval het vrese laat ontstaan dat die land se verergerende krisis op die rand is om in gewapende geweldpleging oor te gaan.

Padrino sê 'n voormalige kaptein van die nasionale wag, Juan Carlos Caguaripano, en 'n oud-luitenant, Jefferson Gabriel Garcia, was agter die aanval. Hy sê die twee aanvallers is dood en drie soldate is gewond.– Nampa/AFP