Weerkantoor voorspel steeds normale tot ondernormale reën

Elvira Hattingh - Namibië sal na verwagting steeds normale tot ondernormale reënneerslae tussen Januarie en April vanjaar ontvang. Tussen Februarie en April word daar wel ondergemiddelde tot gemiddelde reën in die suide van die land voorspel.Die Namibiese weerkantoor het onlangs weer 'n opgedateerde seisoenale vooruitskouing vir die reën vir 2019 uitgereik, waarvolgens die laat ontwikkeling van El Niño, tesame met sekere toestande in die Indiese Oseaan, 'n geleentheid bied vir verbeterde reëns in Namibië. Hulle meen die kans op beter reën tussen Januarie en Februarie is nou groter is wat vantevore verwag is.Volgens die weerkantoor se jongste vooruitskouing bestaan daar egter 'n 25% kans dat die land in die res van die reënseisoen bonormale reën kan ervaar, 'n 40% kans op normale reën en 'n 35% kans op ondernormale reën. Die weerkantoor meen die Suide sal weer aan die kortste ent trek, met 'n 40% kans op ondernormale reën en 'n kans van 35% dat normale reën sal voorkom. Die weerkantoor sê alhoewel die seeoppervlaktemperature in die ekwatoriale sentrale en oostelike Stille Oseaan naby of bogemiddeld warm was, het dit teen einde November weer afgekoel tot meer neutrale vlakke.Die weerkantoor sê alhoewel 'n El Niño nog nie teen middel Desember gevestig het nie, is daar nog 'n 90% kans dat 'n swak El Niño sal vorm. Die Namibiese weerkantoor het van dinamiese klimaatvoorspellingsmodelle gebruik gemaak om die vooruitsig oor die komende vier maande saam te stel. Om te besluit of reënneerslae in die gemiddelde, ondergemiddelde of bogemiddelde kategorie val, word dit vergelyk met rekords van die afgelope 30 jaar. DROOGTE SLAAN HARDBoere is egter teleurgesteld dat daar tot dusver skynbaar min van enige voorspellings vir reën gekom het en sommige meen die situasie raak nou desperaat. Veral die suide en westelike dele van die land loop reeds swaar deur. Verskeie boere het al foto's op sosiale media gedeel waar hulle probeer om wild soos koedoes en springbokke te red wat besig is om van die honger om te kom. Bella Bok Marais het 'n foto en 'n briefie op die Facebookblad Reën in Namibia gedeel van haar pa, 'n Suideboer, wat by 'n groot koedoebul staan wat te maer en swak is om op te staan. Voor die koedoe staan 'n emmer water en voer. Sy sê al wat haar pa vir haar sê, is “my kind, ons moet bid vir reën”. AUSTRALIESE WEERKENNERSIntussen het die Australiese Buro vir Metereologie ook aangedui dat seeoppervlaktemperature in die tropiese Stille Oseaan na ENSO-neutrale vlakke teruggekeer het, alhoewel dit tussen November en vroeg in Desember op El Niño-vlakke gestaan het. Hulle sê ook dat die atmosfeer nie saamgespeel het om 'n El Niño te kon vorm nie. Die buro is van mening dat die koeler seeoppervlaktemperature dalk aan die beweging van die Madden-Julian-ossilasie (MJO) toegeskryf kan word. Die MJO is egter besig om ooswaarts te beweeg, wat passaatwinde verswak en kan veroorsaak dat die seeoppervlak weer warmer raak. Die buro sê ook die meeste weermodelle dui aan dat seeoppervlaktemperature in die tropiese Stille Oseaan waarskynlik naby El Niño-vlakke sal bly tot ons vroeë herfs, maar voeg by dat die meeste modelle minder akkuraat is wanneer dit in herfstye voorspellings waag. “As die seeoppervlaktemperature egter tydens die somer aanhou warm bly, verhoog dit die kanse dat 'n El Niño wel in 2019 kan vorm,” lui die buro se verklaring.

Weerkantoor voorspel steeds normale tot ondernormale reën

Kommentaar

Republikein 2025-05-02

Meld asseblief aan om kommentaar te lewer

Weerkantoor voorspel steeds normale tot ondernormale reën

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie