Weelde op ’n drafstap

Marnus Hattingh - Suid-Afrika se massiewe verskil in inkomstegroepe is pas weer onderstreep toe BMW sy jongste vlagskip in sy plaaslike portefeulje, die 760Li, na die land gebring het.Teen amper R3 miljoen kan jy vier wiele en ’n bakwerk kry plus die beste wat München se ingenieurs met suiers en turbo’s kon lostoor. Ja, dis 12 suiers wat daar onder die enjinkap kopknik, in die klassieke V-formasie van aanval.Die Beierse V12 bied ’n slagvolume van 6.6 liter en met ’n turbo op elke silinderbank gemonteer, gee dit vir jou jeukerige regtervoet ’n handige 448 kW en ’n trekker-fris 800 Nm wringkrag. Dis duiselingwekkende syfers, wat ook verklaar waarom BMW kan sê as jy die lepel plat trap, sal jy die 100 km/h-merkie in net 3.7 sekondes haal met ’n motor wat meer as 2 ton weeg.Terwyl jy hierdie laaste stukkies feite in jou mond rondrol – 2 ton se metaal, in minder as vier sekondes tot 100 km/h – kan ons die hande saamslaan vir die flinke verloop van moderne tegnologie.DUBBELD DIE KRAGIn 1987, die eerste jaar wat BMW sy 745i aan die wêreld gewys het, het sy V8 220 kW uitgepomp saam met 450 Nm draaimoment. Vandag, 30 jaar later, het ons dubbeld die pret en dubbeld die kragsyfers.Nie dat dit die tipiese eienaar van ’n R3 miljoen-limoesien enigiets gaan skeel nie. Hy sal agter sit, waar daar gelukkig ’n dubbelbed kan inpas. Wel, amper. Dis wel waar om te sê die linkersitplek (agter) kan plat gestel word sodat jy op jou eie enkelbed kan lê op pad na die direksievergadering.Die 760Li is inderwaarheid ’n voertuig in die oortreffende trap, vir mense wat leef in die oortreffende trap.Ek en jy gaan nie R3 miljoen (goed dan, R2,8 miljoen om presies te wees) vir ’n ryding opdok nie. Heng, wie van ons is bereid om R20 000 net vir die koolstofbelasting te betaal? (Nee, dis nie ingesluit by die prys nie.)Maar BMW weet daar is ’n dun lagie welgesteldes vir wie so ’n voertuig ’n nodigheid is. Selfs al ry hy daardie motor nooit self nie.Dis hartseer om te dink dat daardie potensiaal waaraan ’n groep witjasse in ’n skuur in München so hard aan geswoeg het, nooit deur sy eienaar beleef of self benut gaan word nie. Maar vir ons gewone aardlinge is die syfers steeds so goed soos om in die middel van jou dieet verby ’n glaskas te stap met ’n vet sny suurlemoentert daarin uitgestal.4X4-STELSELOm die V12 se 800 Mike Tysons prakties op die teer neer te sit, het BMW ’n 4x4-stelsel ingebou. Dis reg, soos Audi in die 1980’s al besef het, vier wiele wat vastrap is beter as net twee. Die blikbrein hanteer die kragvloei tussen voor en agter, maar, sê BMW, in die meeste gevalle sal die krag na die agterwiele gaan. Wel, of dit so is of nie, maak nie saak nie. In bemarkingsterme is dit soos musiek in daardie direkteur-eienaar se ore. Wat agter sit in sy limoesien.Op die pad het twee dinge dadelik van die groot Sewe opgeval. Eerstens verras die bielie-hou van die 6.6 liter met sy twee turbo’s jou as dit skaars bokant luierspoed inskop. Daar’s baie krag, en dit kom baie vinnig aan boord om saam te speel. So ’n groot motor moet nie so maklik versnel nie, dan nie?Die tweede ding wat jou bekruip, is die gewig. Dit gaan in tandem met die vorige punt. Jy versnel baie maklik in ’n reguit lyn (onthou daardie magiese syfer van 3.7?).Klankdemping maak ook dat daar nie ’n aria iewers in jou ore weerklink as jy 160 km/h of nog vinniger haal in ’n paar asemteue nie (ons het op ’n renbaan gery).Sy opstapel van spoed bekruip jou. En dan moet jy draai. Skerp, en baie haastig.Ja, jy het goeie remme. Maar drie ton is drie ton. Jy kan pluk aan die stuurwiel, maar momentum en Newton wil nog nie hul braaibroodjies met jou deel nie.Die groot 760Li is ’n fantastiese, hartseer stukkie ingenieurswonderwerk. Hoekom het BMW hom gebou? Want hulle kan, op ’n tegnologiese vlak. Hulle kan ’n olifant met ’n jagluiperd kombineer en hom (bykans) op ’n ysskaatsbaan loslaat om te pirouette.Hartseer? Die direkteur koop daardie wete, nie die kar nie. Soos die Spur se reuk jou na binne lok, en die casino se klingel jou die arm net nog een keer laat trek, so trek hierdie soort tegnologiese wonders ryk mense aan.En dan is sy reaksie nie “wow” nie, maar “lughawe toe”.Oukei, ek’s jaloers. - Netwerk24

Weelde op ’n drafstap

Kommentaar

Republikein 2025-12-16

Meld asseblief aan om kommentaar te lewer

Weelde op ’n drafstap

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.