WBO-titelhouers boks in Noorde

Tielman van Lill – Die MTC Nestor Sunshine Tobias-akademie gaan sy jaarlikse boksgeleentheid ter viering van Onafhanklikwording vanjaar met ’n puik bonanza in die noorde van die land verseël.Tobias se Together as One Part 6-toernooi sal voorlopig op 19 Maart by die Helao Nafidi-saal in dié gelyknamige dorp suid van die Angolese grens plaasvind. Drie van Namibië se houers van Wêreldboksorganisasie (WBO) Afrika-titels se gevegte ter verdediging van hul kampioengordels beloof groot opwinding met opponente uit Tanzanië, Demokratiese Republiek die Kongo en Suid-Afrika op besoek aan die Ohangwenastreek.Fillipus (Energy) Nghitumbwa (26) is ’n uitklopmasjien wat sover nege van sy elf gevegte voortydig afgehandel het. Hy het net sy professionele debuutgeveg in Otjiwarongo teen Jonas Matheus in September 2017 verloor, maar is sedertdien op ’n indrukwekkende lopie. Die 28-jarige Tony Rashid (bynaam AK 47 Bad Belle) van Dar es Salaam, Tanzanië, sal oor 12 rondes teen Energy deur die toue klim vir die WBO se globale superkapokgewigtitel. Rashid (13-2-2, tien uitklophoue) is oënskynlik ’n ewe gevaarlike slaner as Energy.Indien Energy die knoop teen Rashid deurhaak, sal hy volgens sy promotor onder die WBO se topvyftien boksers op die wêreldranglys inskuif.“Hierdie is ’n groot geveg vir my. Ek kan nie my titel afstaan nie. Hy is ’n goeie bokser, want hy is ’n voormalike IBO- en is ’n nasionale Tanzaniese kampioen,” het Energy verduidelik.WBO AFRIKA SUPERMIDDELGEWIGIn die hoofvoorgeveg plaas Paulinus (John John) Ndjolonimus (13-0, 11 uitklophoue) sy gordel teen Erick Tshimanga (9-1, 3 uitklophoue) van Kinshasa, DRK, op die spel.John John (34) het dinamiet in beide vuiste en is ’n uitgeslape en meedoënlose vegter, soos hy in sy twee mees onlangse uitklopseges teen Anthony Jarman deeglik uitgestal het. Tshimanga sal sy verdediging deeglik moet opknap alvorens hy op die vliegtuig na Namibië klim. Die veel langer Namibiër se langer arms sal vir menige opponent probleme verskaf.Indien John John ’n oorwinning kan bewerkstellig, sal hy onder die topvyftien vegters op die WBO se wêreldranglys tel. “Ek is tans besig met voorbereiding vir my eerste geveg in 2022, maar ek sal skerper as in my laaste geveg moet wees. Ek het vroeg vandeesmaand reeds begin oefen en daar is nog baie werk wat gedoen moet word.“Vir my ondersteuners beloof ek ’n goeie geveg en ’n positiewe uitslag. Ek sal hulle nie teleurstel nie,” het die Afrika-kampioen gesê.WBO AFRIKA-WELTERGEWIGTITELCharles Shinima (29) en Mziwoxolo Ndwayana van Suid-Afrika het tien rondes in die hoofgeveg om dié gesogte titel te vasgeknoop. Shinima (13-0, 9 uitklophoue) is steeds onoorwonne, maar Ndwayana (19-6-1, 12 uitklophoue) is ’n ervare bokser.Shinima huiwer ook op die randjie van insluiting in die WBO se topvyftien. ’n Sege sal hom ’n stewige hupstoot op die ranglys gee. Promoter Nestor Tobias sê meer boksers sal definitief intussen by die lys gevegte vir die aand gevoeg word, maar selfs net hierdie drie ontluikende Namibiese vooruitsigte maak die toegangsfooi by die hek reeds die moeite werd.Kaartjies is spotgoedkoop teen N$50 vir volwassenes en N$20 vir kinders, terwyl BBP-kaartjies vir die beter sitplekke N$200 kos.Namens die hoofborg MTC het mnr. John Ekongo gesê die verskillende bokspromotors in die MTC-stal het tevore verskeie puik boksgeleenthede buite die hoofstad aangebied en hierdie een sal geen uitsondering wees nie.

WBO-titelhouers boks in Noorde

Kommentaar

Republikein 2025-12-16

Meld asseblief aan om kommentaar te lewer

WBO-titelhouers boks in Noorde

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.