Wat toe bly, bly heel

Liewe Gerda,Groot drama hier by ons. Seker by jou ook, want ek hoor niks van jou nie. Moet ek die briewe eerder vir Charlize stuur? Met respekte sal die mense by die poskantoor mos eerder weet wie sy is as jy? Maar was julle nie al saam in People nie, dis mos soos julle Huisgenoot? My man sê altyd jy weet jy het dit gemaak as jy in Huisgenoot se blokkiesraaisel is. Is glo hoekom hy die Huisgenoot lees, vir die blokkiesraaisels. Maar ek het hom al ’n paar keer gevang dat hy die agterblaaie met die skindernuus oor sterre soos jou Charlize in die toilet sit en lees. Volgens hom glo goed vir die konstipasie.Groot drama weer gehad met Marnus. Sy sokkies en onderbroek oor die asbesverwarmer loop hang en toe vergeet. Hy en sy pa doen dit altyd, glo nie goed vir ’n man om met ’n koue onderlyf te loop nie, dit slaan glo binnetoe en kan jou nasate tot enkelgetalle verminder. Sê hulle. Nou ja, toe slaan die hele affêre toe nou brand. Dis nou die onderbroek en die sokkies. Ek was in die kamer besig om Klaradyn se hare te vleg toe ek die rook ruik. Gedurig rook wat uit Marnus se kamer kom, jy weet, “groen” rook, sê hy. Pure dagga, dink ek. Maar sy pa sê ek moet onthou Marnus is ’n sensitiewe kunstenaar en ouens soos Elvis het ook ’n zol gegryp om hul senuwees te kalmeer en die lig te sien. As ek stry, sê hy hy het dit so in die Huisgenoot gelees. Die feitetydskrif, noem Marnus dit. Elk geval, daar is die onderbroek en die sokkies én die verwarmer daarmee heen. Sy pa sê hy moet nou maar met ’n koue onderlyf loop tot dit weer somer is, daar is nie nou geld vir ’n nuwe verwarmer nie. My skoonma kuier al weer hier, weet nie of ek dit in die vorige brief gesê het nie. Dis wel goed vir alles wat gehekel en gestop moet word. Ons het darem nou ook weer ’n gehekelde toiletstelletjie, hoewel dit ook maar neuk om dit aan die toiletklap te hou. Ek en Klaradyn is baie dankbaar vir ’n warm toiletsitplek in die winter, maar Marnus en sy pa brom gedurig oor hulle op ’n doilie moet sit. Sê manne sit koud en klaar.Met ons Klaradyn gaan dit goed, het jy geweet sy het die hoofrol in ’n toneelstuk by die kerk gekry? Is een met ’n lessie, sê Klaradyn. Onthou jy Die Winter van 14 Julie, ons het dit nog op Kombat gaan kyk met die rolle film en die projektor en die laken teen die muur! Het vir jare nog Martin Dreyer se plakkaat op my spieëlkas gehad, ai, hy was darem vir jou ’n mooi man! Elk geval, dit klink vir my die kerkopvoering gaan nou ook oor ’n meisie en haar kêrel en toe tree daar nou komplikasies in. Klaradyn het dit vir my so verduidelik, die komplikasie wat toe nou insluip, is ’n babatjie en die arme kinders is nog op skool. Klaradyn leef haar vreeslik in die storie in, as ons hoor is sy in die kamer voor die spieël besig om haar in die meisie se skoene in te oefen. Haar pa het eers gesê dis nou net om slapende honde te loop wakker skud. Dis nadat Klaradyn vir hom van method acting verduidelik het, blykbaar is dit so ernstig soos om te wees asof jy die karakter is. “Wat toe bly, bly heel,” is al wat haar pa heeltyd van die kerkkomplikasie sê.Ek het ’n video op my selfoon gemaak, van Klaradyn aan die oefen voor die spieël, as jy jou nommer vir my stuur, kan Klaradyn dit vir jou WhatsApp.Groete,Klaradyn se ma

Wat toe bly, bly heel

Kommentaar

Republikein 2026-05-06

Meld asseblief aan om kommentaar te lewer

Wat toe bly, bly heel

Kommentaar

Republikein 2026-05-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.