Warmbad: Los ons myn uit
’n Gemeenskapvergadering word vir Saterdag op Warmbad beplan waar kommer oplaai oor eise om die tantalietmyn te sluit.
Ronelle Rademeyer - ’n Gees van vrees het Warmbad in die verre Suide beetgepak waar bekommerde inwoners nou met ’n petisie probeer keer dat die Mynwerkersvakbond van Namibië (MUN) sy sin kry en die regering oorreed om die Tantalite Valley-myn se lisensie op te skort.
Dié vakbond eis dat die ministerie van myne en energie die tantalietmyn naby die dorp sluit nadat 94 werkers op 31 Augustus afgelê is.
Mnr. Larry Johnson, die myn se uitvoerende hoof, het in Junie vanjaar aangekondig hy is genoodsaak om 94 van sy 105 werknemers weens ’n watertekort en swak produksie by die myn af te dank.
Die plan is om werksaamhede te hervat sodra water vanaf die Oranjerivier aangelê is.
Mnr. Mathew Veldskoen, senior tradisionele leier van die Bondelswarts-gemeenskap, sê die myn is die dorp se lewensaar.
“Die vakbond is kortsigtig. As die myn se lisensie teruggetrek word, help dit nie Johnson los die waterprobleem op nie. Ons moet aan die toekoms dink. Warmbad se mense krepeer; ons hét die myn nodig.”
Volgens Veldskoen word ’n gemeenskapsvergadering vir Saterdag beplan. Hoewel sowat 100 van die dorp se nagenoeg 900 inwoners al die petisie aan die regering onderteken het, hoop hy en ander gemeenskapsaktiviste om ná die vergadering die hele dorp se steun te hê.
“Van die werkers draai nou ook teen die vakbond, want hulle sê hulle het nooit ingestem om druk op die regering te sit om die myn toe te maak nie,” sê hy.
Veldskoen het laat verlede week in ’n verklaring wat aan die minister van myne en energie, mnr. Tom Alweendo, gestuur is, gesê daar “hang ’n gees van vrees, moedeloosheid en vooruitsigloosheid oor die gemeenskap” aangesien die vakbond se optrede tot die sluiting van die myn kan lei.
Die vakbond se assistent algemene sekretaris, mnr. Paulus Situmba, het Maandag intussen in ’n verklaring gesê die MUN het met teleurstelling van Veldskoen se uitlatings namens die Warmbad-gemeenskap in die media kennis geneem.
Hy sê verder dit is duidelik die eienaar van die myn is “’n swak belegger” en sy voorneme is net om van die werkers ontslae te raak en armoede en werkloosheid te bevorder.
Volgens hom glo die vakbond as ’n ander belegger gevind word, kan tot 180 mense by die myn in diens geneem word.
Die myn word grotendeels deur Kazera Global besit, wat ’n 75%-aandeel in African Tantalum (Aftan) het.
Laasgenoemde besit weer twee filiale, Namibia Tantalite Investments (NTI) en Tameka Shelf Company.
Eersgenoemde is die eienaars van die operasionele bates en die aanleg en laasgenoemde besit die mynlisensie.
Tantaliet is ’n mineraal wat die oorgangselement tantaal bevat. Dit word in elektronika gebruik.
Warmbad is in 1805 gestig en is die oudste dorp in Namibië.
Dié vakbond eis dat die ministerie van myne en energie die tantalietmyn naby die dorp sluit nadat 94 werkers op 31 Augustus afgelê is.
Mnr. Larry Johnson, die myn se uitvoerende hoof, het in Junie vanjaar aangekondig hy is genoodsaak om 94 van sy 105 werknemers weens ’n watertekort en swak produksie by die myn af te dank.
Die plan is om werksaamhede te hervat sodra water vanaf die Oranjerivier aangelê is.
Mnr. Mathew Veldskoen, senior tradisionele leier van die Bondelswarts-gemeenskap, sê die myn is die dorp se lewensaar.
“Die vakbond is kortsigtig. As die myn se lisensie teruggetrek word, help dit nie Johnson los die waterprobleem op nie. Ons moet aan die toekoms dink. Warmbad se mense krepeer; ons hét die myn nodig.”
Volgens Veldskoen word ’n gemeenskapsvergadering vir Saterdag beplan. Hoewel sowat 100 van die dorp se nagenoeg 900 inwoners al die petisie aan die regering onderteken het, hoop hy en ander gemeenskapsaktiviste om ná die vergadering die hele dorp se steun te hê.
“Van die werkers draai nou ook teen die vakbond, want hulle sê hulle het nooit ingestem om druk op die regering te sit om die myn toe te maak nie,” sê hy.
Veldskoen het laat verlede week in ’n verklaring wat aan die minister van myne en energie, mnr. Tom Alweendo, gestuur is, gesê daar “hang ’n gees van vrees, moedeloosheid en vooruitsigloosheid oor die gemeenskap” aangesien die vakbond se optrede tot die sluiting van die myn kan lei.
Die vakbond se assistent algemene sekretaris, mnr. Paulus Situmba, het Maandag intussen in ’n verklaring gesê die MUN het met teleurstelling van Veldskoen se uitlatings namens die Warmbad-gemeenskap in die media kennis geneem.
Hy sê verder dit is duidelik die eienaar van die myn is “’n swak belegger” en sy voorneme is net om van die werkers ontslae te raak en armoede en werkloosheid te bevorder.
Volgens hom glo die vakbond as ’n ander belegger gevind word, kan tot 180 mense by die myn in diens geneem word.
Die myn word grotendeels deur Kazera Global besit, wat ’n 75%-aandeel in African Tantalum (Aftan) het.
Laasgenoemde besit weer twee filiale, Namibia Tantalite Investments (NTI) en Tameka Shelf Company.
Eersgenoemde is die eienaars van die operasionele bates en die aanleg en laasgenoemde besit die mynlisensie.
Tantaliet is ’n mineraal wat die oorgangselement tantaal bevat. Dit word in elektronika gebruik.
Warmbad is in 1805 gestig en is die oudste dorp in Namibië.
Kommentaar
Republikein
Geen kommentaar is op hierdie artikel gelaat nie