Wapens: 'Kim lieg vir Trump'

Pres. Donald Trump dink dalk Noord-Korea se kernprogram is nou danksy diplomasie onskadelik gestel, maar Amerikaanse intelligensie-agentskappe glo die Noord-Koreane het die afgelope maande aangehou om brandstof vir kernwapens by veelvuldige geheime persele te vervaardig.NBC News berig Amerikaanse amptenare het aan Trump gesê Kim Jong-oen, Noord-Koreaanse leier, probeer dalk dié plekke wegsteek omdat hy meer toegewings wil hê in ontwapeningsgesprekke met die Trump-administrasie.Trump het op 13 Junie, ná sy beraad met Kim, getwiet almal kan nou baie veiliger voel as die dag toe hy president geword het.“Daar is nie meer 'n kernbedreiging van Noord-Korea nie. Vergadering met Kim Jong-oen was 'n interessante en 'n baie positiewe ervaring.”Maar analiste by die CIA en ander agentskappe sien dit nie so nie, het meer as 'n dosyn Amerikaanse amptenare aan NBC gesê. Hulle sien 'n “regime” wat homself posisioneer om elke toegewing moontlik uit die Trump-administrasie te kry, terwyl dit klou aan kernwapens as 'n noodsaaklikheid om te oorleef.Die Withuis het nie dadelik gereageer op versoeke om kommentaar nie. VERRYKTE URAAN SE PRODUKSIE VERHOOGNoord-Korea het die afgelope maande sy produksie van verrykte uraan vir kernwapens verhoog, het vyf amptenare gesê.Hoewel Noord-Korea missiel- en kernwapentoetse beëindig het, “is daar geen bewyse dat hulle hul voorraad verlaag of hul produksie gestaak het nie”, het een gesê. “Daar is absoluut ondubbelsinnige bewyse dat hulle probeer om die VSA te mislei.”Nog 'n amptenaar sê: “Daar is baie dinge wat ons weet Noord-Korea al 'n lang tyd van ons probeer wegsteek.”Joel Wit, voorheen 'n amptenaar van die Clinton-administrasie en wat die 1994-kernwapenooreenkoms met Noord-Korea beding het, sê Amerika het nog altyd geglo Noord-Korea het twee aanlegte om kernmateriaal te verryk: By Jongbion en 'n tweede terrein waarvan die VSA weet, maar waarvan die naam nie bekend gemaak is nie.“Mense is oop vir die moontlikheid dat daar meer kan wees,” sê Wit.In die jongste Amerikaanse intelligensie-evaluering is die gevolgtrekking dat daar meer as een geheime terrein is, het die amptenare aan NBC gesê. Die vraag is of Kim dit sal erken.Bruce Klingner, 'n voormalige CIA-ontleder en 'n deskundige oor Noord-Korea, sê die feit dat Noord-Korea sy kerngerief by Jongbion aanhou verbeter, strook skynbaar nie met die land se plan om van sy kernwapenprogramme ontslae te raak nie.'n Ander amptenaar sê weer Kim se besluit om die kernwapen- en missieltoetse op te skort, was onverwags en 'n positiewe stap. Dié amptenaar erken egter ook dat intelligensie-analiste dink die Kim-regime probeer die VSA mislei. “Ons word om die bos gelei oor die getal aanlegte, wapens en missiele. Ons hou dinge fyn dop,” sê hy. – Netwerk24

Wapens: 'Kim lieg vir Trump'

Kommentaar

Republikein 2025-11-04

Meld asseblief aan om kommentaar te lewer

Wapens: 'Kim lieg vir Trump'

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.