Wanderers verloor, maar bly tweede

Andrew Poolman - 'n Onsuksesvolle reis na Narraville en nederlaag teen Kudus het vir die eerste rugbyspan van FNB Wanderers beteken dat drie van sy agtervolgers op die puntelys nou aan sy agterent begin hap.Wonder bo wonder bevind die Wit Hingste hulle steeds in die tweede posisie op die puntelys ná naweek 12 van die Namibië Rugby-unie se premierliga.Kudus het 'n waardevolle drieëbonuspunt ingepalm toe hy Wanderers Saterdag met 34-11 verslaan het. Buitesenter Lloyd Jacobs het twee drieë vir die wenspan gedruk en losskakel Ivo Croza en agtsteman Anthony Jevu elkeen een.Die Walvisbaaiers se heelagter Aurelio Plato kon net een keer verdoel, maar met vier strafdoele bygetel het hy 14 punte vir die dag bygedra.Wanderers se enigste drie is gedruk deur flank Sam Kuvare, wat normaalweg as 'n stut bekend is. Vleuel Rudie Pretorius het twee strafdoele bygevoeg.Dit was die eerste keer vanjaar dat Wanderers nie 'n enkele verloor- óf 'n drieëbonuspunt kon behaal nie. Kudus het in die liga se eerste ronde ook 'n naelbytwedstryd op Wanderers se veld met 26-25 beklink, ondanks twee drieë teen vyf.“Dis nooit maklik op Walvisbaai nie, maar Kudus het beslis beter aangepas by die omstandighede en die westewind waaraan hulle so gewoond is. Ons het ons kanse op hul doellyn gehad, maar kon op die deurslaggewende oomblikke nie afrond nie. “Kudus se taktiese spel en die plasing van hul skoppe was baie presies en met goeie opvolgwerk het hulle ons agterste drie onder groot druk geplaas en ons in ons eie gebied vasgepen. Dan was Kudus ook dadelik by om drieë te gaan druk wanneer ons aangeë in die agterlyn laat val het,” sê Wanderers se ondervoorsitter, Willem van Zyl.• Afgesien van Kudus was die naweek se groot begunstigde FNB Western Suburbs, wat twee bonuspunte verseker het toe hy tien drieë in sy sege met 66-33 teen Reho Falcon op Rehoboth behaal het.Senter Nikin Cloete en slot Uno Katjiuongua het elkeen twee drieë vir die Khomasdallers gedruk. Die agtsteman en kaptein Ryan Garoeb, slot Fidel Micolleney, vleuels Dumarcho Hartung en Japhet Tjindjo, losskakel Justin Nel en senter Ricardo Swartz was die ander driedrukkers.Suksesvolle doelskoppe is deur Justin Nel (4), Ricardo Swartz (2) en skrumskakel JC Winkler (2) deur die pale gestuur.Reho Falcon se vyf drieë was sy meeste nóg in enige wedstryd vanjaar en het vir die jong span onderaan die puntelys hul tweede bonuspunt ingebring. Stut Roland Renton (2), die senterpaar Diego Loubser en Armando Dentlinger en die vleuel Anthony Januarie het drieë vir Reho Falcon gedruk, terwyl doelskoppe deur Dentlinger (2) en vleuel Damian van Wyk (2) ook hul telling laat aanskuif het.“Ons moes die wedstryd sonder 'n erkende voorry begin en moes noodgedwonge hakers op stut gebruik, nadat ons gereelde stutte weens werkverpligtinge en ander redes moes onttrek,” sê Falcon se afrigter, Gerald Loubser.“My span het dapper teruggeveg om in die tweede helfte 'n agterstand van 42-7 te probeer uitwis. Reho Falcon was sonder twyfel die beste span in die tweede helfte.”• Trustco United kon ondanks sy tuisoorwinning met 29-24 teen Rehoboth Rugbyklub nie sy plek in die topvier terugwen nie.Die flank Niël van Vuuren het drie drieë vir United gedruk en sy flankmaat Morné Blom een drie. Die kaptein Winmar Rust het as skopper drie doelskoppe en 'n strafdoel deur die pale gestuur. Rust het dié keer op agtsteman gesak, met Lionel Nantes en die terugkerende Jandre Lamprecht as die slotpaar.Aan die Rooi Bulle se kant was Johann Wohler (flank), Xavier van Wyk (vleuel) en die plaasvervanger-agterspeler Julian Afrikaner hul driedrukkers. Howard Titus (skrumskakel) het met al drie doelskoppe en een strafdoel geslaag.• Net twee rondes bly vir elke span oor voordat die halfeindstryde op 28 Julie geskeduleer is. Die groot geelwortel is dat die span wat die eindstryd haal (afgesien van FNB Unam, wat nie kwalifiseer nie) sal deurdring om die land in SA Rugby se Gold Cup-reeks te verteenwoordig. Elke provinsie se voorste oop klub (nie universiteitspanne nie) ding in die kompetisie mee.Die oorblywende NRU premierligawedstryde is:Saterdag 30 Junie: Western Suburbs tn Kudus.Saterdag 6 Julie: Unam tn United; Wanderers tn Rehoboth.Saterdag 21 Julie: Unam tn Wanderers; Kudus tn Reho Falcon; Rehoboth tn Western Suburbs.Die premierliga se huidige puntestand:1 Unam nege uit tien gewen, 50 punte2 Wanderers vyf uit tien gewen, 35 punte3 Western Suburbs ses uit tien gewen, 33 punte4 Kudus ses uit tien gewen, 30 punte5 United vyf uit tien gewen, 29 punte6 Rehoboth vier uit tien gewen, 20 punte7 Reho Falcon nul uit tien gewen, 2 punte

Wanderers verloor, maar bly tweede

Kommentaar

Republikein 2025-12-19

Meld asseblief aan om kommentaar te lewer

Wanderers verloor, maar bly tweede

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.