Wanbetaling kniehalter talle padprojekte

Augetto Graig Padbouwerke is landswyd gestaak aangesien die Paaieowerheid (RA) vir meer as 70 dae nie kontrakteurs betaal het nie.Die RA-woordvoerder, me. Hileni Fillemon, het dit bevestig.“Ja, dit is korrek dat kontrakteurs werksaamhede by sommige van ons deurlopende padprojekte opgeskort het weens wanbetaling van fakture.”Hierdie projekte sluit in seksie 4A van die uitbreiding van die pad tussen die hoofstad en Okahandja na 'n dubbelpad. Ander paaie wat geraak word, is die dubbelpad tussen Walvisbaai en Swakopmund, die teerpad vanaf Swakopmund deur Hentiesbaai na Uis en Kamanjab, die opgradering vanaf Windhoek na die Internasionale Lughawe Hosea Kutako na 'n dubbelpad, die bou van die pad vanaf Namlubi deur Isize na Luhonono (Schuckmannsburg) en seksie B se teerpad vanaf Gobabis na Aranos en terug na Aminuis, sê sy.Projekte wat nie beïnvloed is nie, sluit in fase 2 van die grondpad in Mangetti-Wes, fase 2A vanaf Windhoek na die Hosea Kutako-pad, herstel van die Mariental na Keetmanshoop pad en verskeie paaie na skole en klinieke in die Omusati- en Ohangwenastreek, sê Fillemon.Ten opsigte van die projekte wat gestaak is, sê sy: “Hierdie is regeringsprojekte; die fondse sal deur die ministerie van finansies beskikbaar gestel word.”Dit sal na verwagting nog in Februarie gebeur, sê sy.“Ons het met ons lynministerie in verbinding getree en die regering werk daaraan om 'n blywende oplossing te vind. Dit word verwag dat finansiering binnekort beskikbaar sal wees en ons beoog om teen einde volgende week of die week daarna met die verwerking van fakture te begin,” het Fillemon gesê.Aangesien die RA ooreenkomste met kontrakteurs aangaan en hulle dan werknemers aanstel, kon sy nie uitbrei oor hoe lank padwerkers nou sonder salarisse oorleef nie.“Van kontrakteurs word verwag om hul werknemers te betaal nadat hul fakture betaal is,” is al wat sy gesê het.“Ek wil dit duidelik stel ons het 'n ooreenkoms met al die kontrakteurs dat die RA 56 plus 'n bykomende 14 dae het om uitstaande fakture te betaal, nadat die maandelikse tydelike betaalsertifikaat uitgereik is en deur die ingenieur op die bouperseel gesertifiseer is. Hierdie fakture is langer as dié tydperk uitstaande,” sê sy.Die gesamentlike onderneming tussen CMC Ravenna en Otesa, wat die dubbelpad na Okahandja teen die einde van volgende jaar wil voltooi, het nie op vrae rakende die wanbetaling gereageer nie. Ander betrokke kontrakteurs is China Railway Seventh Group/ Onamagongwa Trading Enterprises Joint Venture, RCC/Teichmann Joint Venture, UNIK/Thohi Joint Venture en Nexus Civils.“Ons konsulteer met ons regering om 'n blywende oplossing te vind om soortgelyke insidente in die toekoms te vermy. Dit is wel die moeite werd om by te voeg dat die meerderheid van hierdie projekte in hul laaste fase is en in die volgende finansiële boekjaar voltooi sal word. As 'n organisasie bly ons verbind om ons finansiële pligte na te kom en te verseker padbouprojekte word sonder verdere vertragings voltooi,” het Fillemon gesê. - augetto@republikein.com.na

Wanbetaling kniehalter talle padprojekte

Kommentaar

Republikein 2025-10-23

Meld asseblief aan om kommentaar te lewer

Wanbetaling kniehalter talle padprojekte

Kommentaar

Republikein 2025-10-23

Meld asseblief aan om kommentaar te lewer

MELD AAN

Advertensie