Walvisbaai en Gimmies bespreek finaal

Andrew Poolman Vir die eerste keer sal die eerste rugbyspanne van Ricoh Windhoek Gimnasium en Namib Diesel Walvisbaai Privaat Hoërskool mekaar komende Saterdag in die eindstryd van die Momentum onder 19 Superliga ontmoet.Beide spanne het laas naweek dramatiese oorwinnings in die semifinale rondte behaal. Die Gimmies se wedstryd teen JCC/KMC Windhoek Affies het besonder gelykop verloop, totdat eersgenoemde oor die laaste agt minute weggebreek het om met 48-32 te wen.Die sterbelaaide voorloper en kampioenspan, Samsung Windhoek Hoërskool, het hom in ’n onkeerbare terugvegpoging van die vierde geplaaste Walvisbaai vasgeloop, wat op sensasionele wyse ’n agterstand van 0-16 met rustyd in ’n oorwinning met 20-16 omskep het.Gimnasium was in 2014 en 2015 die nasionale kampioenskool. Hierteenoor was Walvisbaai se laaste vorige triomf in 2002, toe hulle ook vir WHS in die halfeindstryd uitgeskakel het (8-3) en daarna die finaal teen Otjiwarongo met 29-6 oorheers het.WHS en Windhoek Affies sal dié week hul wonde kan lek voor hulle mekaar komende naweek in die tradisionele uitspeelwedstryd vir die derde plek ontmoet. Vir nie een van laasjaar se finaliste sal dié eer in 2017 weer beskore wees om in die hoofwedstryd betrokke te wees nie.GIMNASIUM 48-32 AFFIESDié eindtelling weerspieël geensins hoe ’n gelykopstryd dit vir langer as ’n uur se spel was nie.Gimnasium was net ná die halfuurmerk en teen rustyd met 16-15 voor; tien minute in die tweede helfte het Affies met 20-19 die voortou geneem en met agt minute speeltyd oor was Affies al weer met een punt voor (32-31).’n Duidelike keerpunt laat in die wedstryd was toe Affies se losskakel Johan Zaayman junior ’n geel kaart gekry het terwyl sy span met 25-19 voorgeloop het.Dit was oënskynlik die gevolg van ’n oorhoofse waarskuwing aan die span nadat skeidsregter Oscar Lambert hulle ’n paar maal tevore vir oortredings op die grond teruggejaag het.Op omstrede wyse is spel egter toegelaat om voort te gaan terwyl drie Affies-spelers met beserings op die grond was en het Gimnasium se wakker losskakel Denzo Bruwer maklik vir twee deurslaggewende drieë binne drie minute deurgedraf. Skielik was die damwal gebreek en het drieë deur vleuel Rudi Pretorius, stut Jürgen Schmidt en senter Chrischen Olivier die telling laat weghardloop.Bruwer was nie op sy heel akkuraatste nie en enkele van sy stelskoppe het skeef getrek, maar met vier strafskoppe, twee drieë en twee doelskoppe was hy vir sy span 26 punte werd.Gimnasium se vleuels Morgan Esterhuizen en Rudi Pretorius, senter Chrischen Olivier en stut Jurgen Schmidt was sy ander driedrukkers, terwyl die plaasvervanger Keanu Engelbrecht ook een doelskop bygevoeg het.Aan Affies se kant het sy skrumskakel Danie van der Merwe twee soortgelyke drieë van naby die doellyn gedruk om as speler van die wedstryd aangewys te word. Die regtervleuel Gerweino Benade (2) en Handeon Morkel het ook hul kanse aangegryp om drieë te druk, terwyl Zaayman een strafdoel en ’n doelskop bygevoeg het.Gimnasium het op buitesenter vir Nico Horn teruggekry wat lank met ’n kniebesering buite rekening was. Afrigter Jaco Engels het egter reeds met ’n lang krukkelys te kampe, waarvan JJ Richter, Tertius Lambrechts, Archie Norval, Henry Olivier, Kieron Diergaardt, Carl Schmidt en Wiks Tromp onder die langtermyn beserings vir bykans die hele seisoen tel.WALVISBAAI 20-16 WHSDie ligblou Koedoebulle het die ligaseisoen onoorwonne afgesluit en toe hulle aan die einde van die eerste helfte ook met 16-0 voorloop, sou min waarnemers seker so ’n roemryke oorwinning vir Walvisbaai sien kom het.Afrigter Henry Kemp se span het immers soveel bewese wedstrydwenners in sy geledere. Delron Brandt (hetsy losskakel of heelagter) en die agtsteman en kaptein Oderich Mouton is van die beste in hul posisies wat WHS in jare gehad het en Justin Muir word as binnesenter nie agter die voordeellyn gekeer nie.’n Dinamiese lopie deur Mouton het WHS in posisie gebring vir Brandt se eerste maklike strafskop ná vyf minute. Brandt se tweede poging was ’n skuins een, maar het ook deur die pale geseil om die bloues met 6-0 voor te plaas.’n Netjiese agterlynbeweging waarin Brandt met voetwerk sy opponent aan die binnekant geklop en deur die agterlyn gebreek het, het hom in staat gestel om die buitesenter Elmarco Beukes vir ’n drie in die hoekie deur te jaag.Brandt se doelskop het ook sekuur getref en sy span was ná 17 minute met 13-0 voor. Dit het tot rustyd so gebly.Beide spanne het nie teruggedeins om ondernemende rugby van diep in hul eie helfte te speel nie. WHS én Walvisbaai het soms van ’n skrumvoer op hul eie doellyn ’n vlak aangee vir ’n sterk hardloper gebruik om die verdediging eerlik te hou en dalkies ’n gaping in ’n wyer kanaal te skep.Nog ’n Brandt-strafdoel sowat agt minute ná rustyd was egter WHS se laaste punte. Walvisbaai se losskakel Juvan Pitout het sy rekening met ’n strafdoel geopen.Die WHS-heelagter Brandt was egter ook kort daarna die sondaar toe hy die aangee laat val het wat in die hande van Walvisbaai se senter Darryl Wellmann gewip het om by die pale te gaan druk. Met Pitout se doelskop was Walvisbaai op 16-10 terug binne trefafstand.’n Meedoënlose aanval deur verskeie fases het die kans vir Walvisbaai se vaskopstut Patrick Schickerling geskep om deur ’n laagvat te breek en langs WHS se pale oor te duik.Pitout se doelskop het die Naartjies met 17-16 voor geplaas en toe Brandt kort daarna binne die kwartgebied met ’n strafskop mis korrel, het WHS se ondersteuners hoorbaar gesug.Nog ’n Walvisbaai-aanval met sy vindingryke agterspelers wat byna op ’n drie uitgeloop het, het nogtans die laaste strafskop opgelewer vir Pitout om drie punte by te voeg.Hoewel WHS in die laaste minute sterk aangeval en hulself tot in ’n goeie posisie gebring het, het aanslane onder druk die beweging laat skipbreuk ly. Met skeidsregter Danie Koen se eindfluitjie was daar nie keer aan Walvisbaai se vreugde nie.

Walvisbaai en Gimmies bespreek finaal

Kommentaar

Republikein 2025-12-16

Meld asseblief aan om kommentaar te lewer

Walvisbaai en Gimmies bespreek finaal

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.