WAD maak vroue geldslim

Maria Eiseb - “Begin klein- en mediumsakeondernemings sodat julle nie finansieel van mans afhanklik is nie.”Dit was die raad van die minister van geslagsgelykheid en kinderwelsyn, me. Doreen Sioka, tydens die onlangse gradeplegtigheid van sowat 90 vroue by Vroue-aksie vir Ontwikkeling (WAD). Die vroue het opleiding in finansies en hiegiëne ontvang. Die geleentheid is in Windhoek met die ondersteuning van Coca-Cola Namibia Bottling Company (CCNBC) gehou. Volgens Sioka is vroue se finansiële afhanklikheid van mans in die meeste gevalle die oorsaak van geslagsgeweld. “Jy is afhanklik van een man vir Brasiliaanse (geweefde) hare, en van nog een vir ander materiële dinge soos huurgeld en lugtyd. Wanneer gaan dit ophou? As jy weens onvoorsiene omstandighede die verhouding wil beëindig, maak die man jou dood omdat hy in jou belê het,” het die minister gesê.Met verwysing na 'n 2016-opname van die ministerie van arbeid, nywerheidsbetrekkinge en werkskepping, het Sioka gesê werkloosheid in Namibië tref vroue meer as mans, aangesien 38,8% van vroue werkloos is teenoor 29,8% van mans.Tydens die geleentheid het die CCNBC se bestuurder van openbare sake en kommunikasie, me. Enid Johr, gesê: “Daar is nie 'n beter ding om te doen as vroue te ondersteun nie. As jy 'n vrou steun en opvoeding gee, voed jy die nasie op.”Die uitvoerende beampte van WAD, mnr. Salatiel Shinedima, het gesê as 'n maatskaplik verantwoordelike maatskappy het Coca-Cola vir WAD gevra of hy vroue met klein ondernemings kan ondersteun deur aan hulle die basiese opleiding vir beter bestuur te gee.Me. Dorrett Tseitseimou, wat meer as tien jaar haar eie onderneming besit, sê sy het baie by die opleiding gebaat. “Die opleiding het ons meer finansiële kennis gegee,” het sy gesê. “Al is die inkomste hoe klein, moet jy spaar, en al het jy nie genoeg geld nie, moet jy nie tou opgooi nie.” Volgens Tseitseimou is hulle onder meer ook geleer oor spaargewoontes en gehalte kliëntediens.Me. Pelgrina Ndumba, 'n siggestremde sakevrou met 'n graad in volwasse onderwys en gemeenskapsontwikkeling van die Universiteit van Namibië, het gesê:“Ek het 'n graad, maar kon nie werk kry nie. Ek is dankbaar vir die geleentheid wat Coca-Cola en WAD vir my geskep het. Ek kon weens stres oor werkloosheid nie slaap nie, maar nou kan ek,” het sy gesê.

WAD maak vroue geldslim

Kommentaar

Republikein 2025-05-15

Meld asseblief aan om kommentaar te lewer

WAD maak vroue geldslim

Kommentaar

Republikein 2025-05-15

Meld asseblief aan om kommentaar te lewer

MELD AAN

Advertensie