'Waarde van welstandsprogramme beduidend'

Henriette Lamprecht – Dit sal nie help om te spekuleer oor of die kansellering van uitbetalings vir gimlidmaatskap tot ’n toename in eise sal lei nie.Volgens mnr. Stephen Tjiuoro, uitvoerende hoof van die Vereniging vir Namibiese Mediese Fondse (Namaf), kan dinge wel verander wanneer welstandsprogramme gekanselleer word.“Die toegevoegde waarde van welstandsprogramme is beduidend en is wetenskaplik bewys deur beheerde studies. Die kansellasie kan tot ‘n verhoogde siektelas lei weens ’n gebrek aan bewustheid van basiese risikofaktore soos bloedsuiker- en cholestrolvlakke,” sê hy.Tjiuoro het gereageer op die Namibiese waghond oor finansiële instellings in Namibië, Namfisa, se opdrag aan geregistreerde mediese fondse om terugbetalings aan lede vir gimlidmaatskap en ander weldstandsprogramme teen die einde van volgende jaar te staak. Volgens Tjiuoro het die ministerie van gesondheid en maatskaplike dienste ’n holistiese benadering tot leefstyl wat onder meer voorkoming, vroeë diagnose en behandeling insluit.“’n Gelukkige en gesonde nasie is ’n produktiewe nasie. Gesondheid kan nie in kompartemente geplaas word nie en is net so sterk soos die swakste skakel.”Hy sê “enige mediese fonds wat sy sout werd is” moet ’n interne program hê wat algehele gesondheid bevorder. “Jy kan nie net op die behandeling (reaktiewe, duur medisyne) fokus en die oorsake ignoreer nie.”Sou Namfisa se opdrag deurgevoer word, sal die benadering van ’n holistiese leefstyl in die slag bly, sê Tjiuoro. Sou geen alternatiewe oplossings vir die probleem gevind word nie, is die uitbetalings dus volgens die Mediese Fondse-wet onwettig.“Sou Namaf en die fondse nie ’n alternatief vind nie, sal die Nasionale Gesondheidsbeleidsrigtings se doelwitte gedeeltelik in die gedrang kom.”Tans bied die meeste mediese fondse terugbetalings vir gimlidmaatskap aan akute, chroniese siek en gewone lede wat kies om ’n aktiewe en gesonde leefstyl te volg.Geen onderskeid word getref in die vlak van terugbetaling tussen dié drie kategorieë nie. Die meeste van die welstandsprogramme word deur gekwalifiseerde en geregistreerde diensverskaffers aangebied.“Die programme is proaktief en ontwerp om lede te bemagtig en in te lig met betrekking tot hul eie gesondheid,” het Tjiuoro gesê.Volgens hom wissel die presiese bedrag van terugbetalings per lid volgens die aantal kere wat per maand geoefen is. Hy sê mediese fondse gaan teen die einde van volgende jaar nie toegelaat word om dié terugbetalings te maak nie - tensy die wet aangepas word om die betrokke dienste by die definisie van "mediese dienste" in te sluit. Hy het erken die fondse wat op Namfisa se opdrag gereageer het, het nie ’n algemene posisie oor die presiese finansiële voordele vir fondslede met gimlidmaatskap nie.“Van die respondente het data voorgelê wat vir die afgelope vier jaar ’n afname van 5% toon in hospitaaleise van gesinne wat ’n gim besoek en hiervoor beloon word.” Sommige respondente gebruik volgens Tjiuoro ook ’n program vir die risikobestuur van begunstigdes (BRM) as deel van hul welstandsinisiatiewe. Lede wat die meeste by ’n fonds eis, word deur die BRM-program geïdentifiseer en deur vooruitskouingsmodelle volgens hul gesondheidsrisikoprofiel gekategoriseer.“Dié lede word aangemoedig om ’n aktiewe en gesonde leefstyl te lei met vrywillige deelname. Die hoërisikoprofiele en koste van eise van dié lede word voor die aanmoediging en weer ’n jaar later gemeet.”Tjiuoro sê besparings word deur die BRM-program gemeet en dit verteenwoordig 0,8% van die koste van eise in ’n spesifieke voordelejaar vir die respondent.Ander fondse het egter erken hulle het nog nie die presiese finansiële voordeel van terugbetalings bereken nie.Tjiuoro wou nie spekuleer oor of die staking van terugbetalings tot groter eise sal lei nie. Hy het gesê nie Namaf of enige van die mediese fondse hoef te vergoed vir ’n verlies aan voordele as die verskaffing van dié spesifieke voordele van die begin af onwettig was nie. “Mediese fondse het die afgelope paar jaar beduidende verhogings in die koste van eise ervaar. Dit is weerspieël in die jaarlikse verhogings van bydraes.”Volgens Tjiuoro bied van die respondente aan lede ’n voordeel wat oorgedra kan word as aansporing om hul voordele oordeelkundig te gebruik, eerder as om dit te misbruik bloot omdat dit bestaan.“Die publiek moet verstaan dat ’n konfronterende houding met betrekking tot enige aangeleentheid waar daar verskille tussen partye is, nie gaan help nie. Dit is daarom uiters belangrik dat alle rolspelers beleefd optree wanneer verskille hanteer word.”Hy het beklemtoon dit sal ook die gees wees waarin Namfisa en Namaf die verskillende standpunte oor uitbetalings vir gimlidmaatskap en welstandsprogramme sal takel.

'Waarde van welstandsprogramme beduidend'

Kommentaar

Republikein 2026-03-10

Meld asseblief aan om kommentaar te lewer

'Waarde van welstandsprogramme beduidend'

Kommentaar

Republikein 2026-03-10

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.