Waar bederf nuwe afmetings aanneem

Sophienhof Lodge is slegs 12 km buite Outjo op die C39-pad na Khorixas geleë en is dié plek waar “bederf” ’n heel nuwe definisie kry.Behalwe dat dit die ideale laaste stilhouplek op pad na die Etosha Nasionale Park is (die Andersonhek is maar sowat 100 km van hier), is daar soveel vrede (vir die moeë siele) en dinge om te geniet (vir die aktiewer siele) by dié oord dat dit totaal onnodig is om verder te reis.Sophienhof is die ideale plek waar Namibië se uitsonderlike veldlewe geniet en wild besigtig kan word. Ywerige fotograwe sal nie weet wat hulle hier getref het nie: jagluiperds, sebras, swart- en blouwildebeeste, kameelperde, koedoes, elande, duikers, selfs die pikante dik-dik, vlakvarke, ystervarke, skilpaaie en verskeie voëlspesies.Diegene wat daarvoor lus het, kan begeleide staptoere in die veld onderneem en sodoende die plantegroei en diere van naderby ervaar. En as dít nie genoeg is nie, kan gaste hul vaardigheid met pyl en boog op die proef stel. Boogskiet is juis bekend daarvoor dat dit jou laat ontspan en terselfdertyd konsentrasie verhoog.As al hierdie dinge na te veel werk klink, of jy reeds al jou energie daaraan bestee het, is die koel, blou swembad net die regte plek om af te koel. Verskeie daguitstappies, byvoorbeeld na Etosha, die bekende Vingerklip of die Ugab-terasse kan ook gereël word.Ná so ’n lang dag bied die akkommodasie in hetsy die standaardhuisies, die Belina-plaashuis óf die luukse BBP-huis heerlike slaap-weelde. Vir die avontuurlustige is daar ook netjiese, gerieflike kampeerplekke of eenvoudige kamers vir dié wat net met ’n rugsak reis.Maar die lekkerste bederf bly die smaaklike aandetes of vullende ontbyt in die hart van die lodge waar Bertie en sy span die gerieflike kuierplek in ’n ware tuiste weg van die huis omskep.

Waar bederf nuwe afmetings aanneem

Kommentaar

Republikein 2025-06-17

Meld asseblief aan om kommentaar te lewer

Waar bederf nuwe afmetings aanneem

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie