Vyf persent beter teen Bulle, is al wat Jones vra

Andrew Poolman - Met Pote Human as afrigter kan verwag word dat die Vodacom Blou Bulle komende naweek in Windhoek hul tipiese resep van sterk dryfspel en hoë skoppe gaan lewer – maar daar sal ook van die avontuurlike hardlooprugby wees waarmee sy Tukkies-span die Varsitybeker gewen het.Só voorspel JP Nel, hulpafrigter van die Windhoek Draught Welwitschias, in die aanloop na komende Saterdag se eerste tuiswedstryd in die SuperSport-uitdaagreeks in Windhoek se Hage Geingob-stadion.Nel en die Welwitschias se hoofafrigter Lyn Jones het gisteroggend vir die eerste keer saam die plaaslike media te woord gestaan – ook as 'n terugblik op laas naweek se openingsronde van die kompetisie.Die Welwitschias het op Kemptonpark met 50-33 teen die Hino Valke verloor, nadat die Namibiërs rustyd nog met 20-17 voorgeloop het.Jones en Nel is dit eens dat die Namibiërs eintlik teen rustyd 'n groter voorsprong as drie punte verdien het en dat die eindtelling ook geen ware weerspieëling van die 80 minute se spel was nie.“Ek het vooraf vir Lyn gesê dat ons enkele opwarmwedstryd nie genoeg vir ons wedstrydfiksheid is nie en dat ons net vir 40 minute kompeterend sou wees. Daarna sou ons begin moeg word en deurslaggewende duikslae laat glip. Dit is inderdaad wat gebeur het deurdat ons al die statistiek soos gebiedsvoordeel, balbesit en sukses oor die voordeellyn oorheers het. In die eerste helfte was die Valke net twee keer in ons halfgebied.“Omtrent 12 punte het ook verlore gegaan met Theuns Kotzé wat nie naby sy gebruiklike 90 persent skopsukses gekom het nie. Teen die einde was ons met tien punte agter en het alles in die stryd gewerp om die ekstra bonuspunt vir die nederlaag binne agt punte te bewerkstellig, maar ons het weer die bal verloor en die drie afgestaan wat die vyftigtal teen ons op die telbord gebring het.“Hopelik kan ons laas naweek afskryf as die ekstra opwarmwedstryd wat ons nodig gehad het,” het Nel geskerts. GROTER DOELJones sê die afrigterspan was verheug oor verskeie aspekte van die Welwitschias se benadering en hul reaksie op die omstandighede.“Om teen Suid-Afrika se voltydse beroepspanne te speel, sal altyd vir ons 'n uitdaging wees. Ons is besig om die professionele spel in Namibië te ontwikkel en ek wil almal graag herinner dat ons einddoel is om op te bou na die dag wanneer Namibië in Oktober 2019 in Japan sy eerste wedstryd by 'n Wêreldbekertoernooi wen.“Die SuperSport uitdaagreeks en Curriebeker is 'n uitstekende stap om ons plaaslike afrigters en spelers te ontwikkel. Ons groei fisiek en leer ook om situasies met die regte denkwyse te benader. Wen is die resultaat van beplanning en ons is vasberade om ons beste vir die land te gee.”Die afrigterspan se strewe is dus om soveel as moontlik plaaslike spelers te sien deurbreek om in Junie en Julie vir die Wêreldrugby-toernooi in Uruguay, asook die Afrikabeker-toetse gekies te word.Jones sê die tuisspan is opgewonde om 'n opponent met die geskiedenis, tradisie en hoë profiel van die Blou Bulle te verwelkom.Die afrigterspan se benadering is dat tweede kanse belangrik is om 'n jong spelersgroep toe te laat om as 'n eenheid te groei. Sodoende is doelbewus besluit dat net veranderinge afgedwing weens beserings of persoonlike omstandighede, vir komende naweek aangebring sal word.Vir die stryd teen die Pretorianers is Unam se jong slot Max Katjijeko vanweë 'n familieterugslag nie beskikbaar nie. Die enigste byvoegings is dus Ruan Ludick as slot asook die veelsydige agterspeler Heinrich Smit (beide van Wanderers). Die wedstrydgroep van 22 sal môre bekend gemaak word. VERLORE BALBESIT GESTRAFIn Kemptonpark het die eindtelling van 50-33 die indruk gewek dat die tuisspan onder afrigterskap van Rudy Joubert sake gedikteer het – soos die afgelope twee seisoene die norm was.“Die gemene faktor in al die drieë wat ons teen die Valke afgestaan het, was dat ons die bal in die hand gehad het en te hard probeer het om bewegings aan die vloei te hou. Die besit het verlore gegaan en die opposisie kon 'n teenaanval loods,” het Jones gesê.Die lostrio van Leneve Damens, Thomasau Forbes en Rohan Kitshoff het behoorlike inklimspel gelewer en die ondervinding van die skakelpaar Eugene Jantjies en Kotzé, asook binnesenter Darryl de la Harpe het goeie rigting gegee, sê hy.Op die vleuels het Lesley Klim en Gino Wilson ook hul aandele verder laat styg. Max Katjijeko het as vyfslot ook uitstaande spel gelewer.“As ons in Windhoek ons prestasie met vyf persent kan verbeter, sal dit beslis vir ons vrugte afwerp. “Ons verwag nie om vanjaar of selfs in 2018 die Curriebeker te wen nie, maar daar is geen rede hoekom ons nie reeds dié seisoen wedstryde kan wen en teen 2019 'n baie sterk aanspraak kan maak nie. Dit is waartoe beroepsport homself leen – namate jy sterker en fikser word en reg beplan en die gesamentlike einddoel in die oog hou, al kom dit nie oornag nie.” BLOEDNEUSDie Bulle het laas naweek op Loftus Versfeld met 23-31 bloedneus gekry teen hul buurunie, die Pumas.Die span van Pretoria het drie drieë afgestaan aan die doeltreffende lynstaandrywe van die besoekers.'n Boorvat deur die Bulle se vleuel Rabs Maxwane – hul beste agterspeler op die dag – het sy span straks die wedstryd gekos. Die Pumas het twee drieë gedruk terwyl hy in die koelkas was.“Pote Human was ook Tuks se afrigter in die Varsitybeker en 'n mens kan dus verwag dat 80 persent van die Bulle se span hieruit kan kom, met die res van die unie se gekontrakteerde talent wat ook sal deursyfer. Die Bulle sal dus 'n jong span bring wat nie bang is om rugby te speel nie,” voorspel JP Nel, wat natuurlik self vir nege seisoene op die topvlak vir die Ligbloues gespeel het.Jones het toegegee dat die Bulle met groot selfvertroue hierheen sal kom omdat hulle tevore meestal maklike sukses in Windhoek behaal het, terwyl Namibië dit nog weinig reggekry het om behoorlike respek in die kompetisie af te dwing.“Ons sal alles gee wat ons het om die wedstryd te wen en ook om die respek van die opposisie af te dwing.”Die Blou Bulle het intussen hul Namibiese buitesenter van Tuks, Divan Rossouw, na heelagter verskuif. Renaldo Botha (agtsteman en toetskaptein van Namibië) het teen die Pumas wedstrydkans gekry nadat hy 'n skorsing uitgedien het, maar bly eintlik meerendeels aan die Superrugby-oefengroep verbonde.Vodacom Blou Bulle: 15 Divan Rossouw, 14 Jade Stighling, 13 Ulrich Beyers, 12 Franco Naude, 11 Rabs Maxwane, 10 Tony Jantjies, 9 Ivan van Zyl, 8 Clyde Davids, 7 Abongile Nonkontwana (kapt), 6 Marco van Staden, 5 Aston Fortuin, 4 Freddy Ngoza, 3 Andrew Beerwinkel, 2 Corniel Els, 1 Njabulo Gumede.Reserwes: 16 Alandre van Rooyen, 17 Matthys Basson, 18 Brian Leitch, 19 Chris Massyn, 20 André Warner, 21 Joshua Stander, 22 Duncan Matthews.

Vyf persent beter teen Bulle, is al wat Jones vra

Kommentaar

Republikein 2025-08-05

Meld asseblief aan om kommentaar te lewer

Vyf persent beter teen Bulle, is al wat Jones vra

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie