Vyf leeus proe vryheid

Francoise Steynberg - Twee leeuwyfies en drie welpies is gister in N/a'an ku sê se private wildreservaat van 9 500 hektaar vrygelaat. Dit gaan goed met die twee wyfies (Xpl 88 en Xpl 111) en drie welpies - twee wyfies en een mannetjie - wat ná hul verskuiwing van die Erongostreek af eers vir 'n tydperk in 'n kamp van tien hektaar by N/a'an ku sê gemonitor is. "Ons veeartsenyspan meen die leeus is nou gereed om in die Xannier-reservaat met 'n geëlektrifiseerde heining vrygelaat te word waar hulle veilig sal wees. Die welpies was net tien dae oud toe hulle hier aangekom het en is nou so twee maande oud en sterker," het dr. Rudie van Vuuren, stigter van die N/a'an ku sê-stigting, gesê. "Ons visie is dat die leeus 'n rol in die woestyn moet speel, maar hul toekoms lê in die hande van die regering, want hulle bly die eiendom van die regering. Ons bied 'n veilige tuiste vir hulle en sien mooi om na hulle," het Van Vuuren verseker. "Dit is 'n beter manier om mens-leeu-konflik te verminder as wat 'n jagter gekry word om hulle dood te skiet."Hy sê ná ses maande sal N/a'an ku sê weer aan die ministerie van die omgewing en toerisme rapporteer oor hoe dit met die leeus in die reservaat gaan. "Dis baie belangrik om te weet dat die leeus nie in aanhouding is nie. Hulle sal vir hulself jag. Die welpies is ook nooit ná die verskuiwing deur mense hanteer nie," het Van Vuuren gesê. "Jy kan hulle nie hanteer nie; hulle is wilde diere. Ons kon hulle net deur die verkyker dophou," het sy vrou, me. Marlice van Vuuren, bygevoeg.NUWE NEKBAND Een van die leeuwyfies (Xpl 111), wat ses en 'n half jaar oud is, is gister ook met 'n nuwe nekband vir moniteringsdoeleindes toegerus nadat die vorige een afgeval het. Sy is eers verdoof, die nekband aangesit, die verdowing weer omgekeer en die veearts, dr. Kobus Hoffman, het gesorg dat daar so min moontlik trauma was toe sy wakker word.Hy het ook bevestig dat Xpl 111 nie dragtig is nie, "maar wel lakteer en drie welpies drink ook aan haar". Volgens Hoffman was Xpl 111 baie opgeblaas ná die vorige verskuiwing, maar daar was toe geen toetse gedoen om te bevestig dat sy toe wel dragtig was nie. "Die hek van die kamp is met skadunet oorgetrek, 'n deel van die heining is oopgemaak en 'n karkas sal buite gehang word om hulle na die aangrensende reservaat te lok," het Hoffman gesê.Volgens hom sal dit 'n dag of twee neem voor die leeus uit die kamp na die reservaat sal gaan waar hulle hul vryheid gaan proe. "Ons het ook versteekte kameras op die heining gesit om hulle te monitor en die grond gehark om hul voetspore te volg," het Hoffmanse veeartsvrou, dr. Lauren Hoffman, gesê. Die verskuiwing spruit uit mens-leeu-konflik in die Daures-gebied in die Erongostreek toe 'n leeumannetjie (Xpl 110) saam met die twee wyfies amok gesaai het. Volgens die ministerie van die omgewing en toerisme het veral gemeenskappe naby die White Lady Lodge voortdurende veeverliese aangemeld.Die ministerie moes die leeutrop twee keer vang en na die Skedelkuspark verskuif, maar hulle het weer na dié gebied teruggekeer.Die vyfjarige mannetjie was vir 'n ander bestemming as N/a'an ku sê geoormerk en het volgens die ministerie ongelukkig tydens die vangs gevrek.

Vyf leeus proe vryheid

Kommentaar

Republikein 2025-06-19

Meld asseblief aan om kommentaar te lewer

Vyf leeus proe vryheid

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie