Vrydag is D-dag oor die Delta-variant

Henriette Lamprecht en Augetto Graig – Uitslae oor of die hoogs aansteeklike Delta-variant wat in Indië ontstaan het en ander, onbevestigde variante van Covid-19 ook in Namibië teenwoordig is, word teen Vrydag verwag.Volgens die uitvoerende direkteur in die ministerie van gesondheid en maatskaplike dienste, mnr. Ben Nangombe, is weefselmonsters na die Universiteit van Namibië en ook die Nasionale Instituut vir Siektes in Johannesburg vir genoomtoetsing gestuur.Epidemioloë is volgens hom ook besig om die derde golf van infeksies te bestudeer sodat bepaal kan word of die piek op hande is of nog hoër gaan wees.Nangombe was aan die woord toe die presidentsvrou, me. Monica Geingos, gisteroggend haar eerste dosis van die AstraZeneca-entstof ontvang het. ENTSTOWWEVolgens Nangombe word beskikbare entstowwe steeds herlei na waar aanvraag groter is. Dit is volgens hom ook belangrik om te verhoed dat entstowwe dalk verval.'n Bykomende 100 000 dosisse van die Sinopharm-entstof word volgens Nangombe “baie vroeg volgende week” verwag. Die proses om Johnson & Johnson-entstowwe aan te koop, is aanvanklik gekniehalter deur die 15% van US$350 000 wat Namibië as nie-oordraagbare deposito moes betaal. Reëlings is intussen volgens Nangombe met 'n plaaslike bank getref om 'n rekening hiervoor te open en 'n brief van krediet aan die verskaffer uit te reik. Dié entstowwe word in Augustus verwag. Die hoof van die immuniseringstaakspan, me. Petronella Masabane, het intussen by navraag gesê sy en haar span wag vir inligting oor die beskikbaarheid van entstowwe in die land se 35 gesondheidsdistrikte.GEINGOS: INENTING DIE ANTWOORDDie eerste dame het inenting gister as die oplossing bestempel vir die krisis waarin Namibië tans verkeer.“Ek moes myself vroeër laat inent het,” het sy ná die blitsige inspuiting herhaal.Geingos het gesê entstowwe laat 'n keuse aan die individu. “Dit is nie een grootte pas almal nie. Ek het my eie, breedvoerige navorsing gedoen oor Sinopharm en AstraZeneca.“Ek kan julle sê daar is geen mense in ons huis wat nie aan entstowwe glo nie. “Vir my man (pres. Hage Geingob) is spesifiek gesê vir hom is dit beter om nog te wag. Ek moes lankal die besluit vir myself geneem het en ek moes nie vir my man gewag het nie.“Ek is baie bly dat ek dalk ander mense kan oortuig om hulle te laat inent,” het Geingos gesê.“Jong mense dink hulle sal nie siek raak nie, en ander dink hulle kan die Covid weg bid, maar dit gaan nie net oor jouself nie, dit gaan oor almal om jou. “Van die siekes oorleef, en van hulle nie, terwyl die stres en trauma dit moeilik maak om ons kosbare gesondheidswerkers te beskerm.“Die land kan nie bekostig om nog deur 'n vierde of 'n vyfde golf, met inperkings en streng reëls, te gaan nie. Die enigste manier waarop ons dit kan doen, is deur inenting,” het die eerste dame gesê. “Ek moet ook my medeburgers beskerm.” HORTE EN STOTENá onsekerheid sedert laat verlede week het immunisering gister op plekke in die land met horte en stote hervat.Die presidentsvrou was een van 'n gelukkige handjievol wat by die sentrale staatshospitaal in Windhoek inentings kon ontvang. Die immuniseringsentrum is gisternamiddag gesluit in afwagting op entstowwe.Verslaggewers van Namibia Media Holdings het as volg uit die streke gerapporteer.By die Welwitschia Hospitaal in Walvisbaai is met eerste en tweede doserings van beide entstowwe hervat, maar op plekke was die opkoms skraal weens die weersprekende boodskappe van die afgelope dae.By Medipark in Ongwediva was daar later in die dag min mense in die rye. Volgens mnr. Eric Shilongo het chaos gisteroggend geheers omdat talle mense wat hul tweede spuit wou ontvang na die hospitaal opgeruk het.Volgens Shilongo het hulle aanvaar dat eerste inentings nou voorkeur moet kry om so veel as moontlik inwoners te beskerm totdat nuwe bestellings entstof arriveer.By Oshakati se staatshospitaal is ook mense weggewys wat vir hul tweede inenting gekom het. Volgens verpleegsters was dit nie aangenaam nie om mense huis toe te stuur wat in gevalle baie ver gereis het.Teen gisternamiddag is net 26 persone hier geïmmuniseer.Op Otjiwarongo is ook steeds eerste en tweede entstowwe toegedien.– Bykomende verslaggewing deur Leandrea Louw, Tuyeimo Haidula, Ester Kamati en Elizabeth JosephFOTODie presidentsvrou, me. Monica Geingos, het gister ’n eerste dosis AstraZeneca-entstof teen Covid-19 by die Windhoek Sentrale Hospitaal ontvang. By haar is die verpleër mnr. Esley Katima. Ná onsekerheid oor die naweek, het immunisering gister op plekke in die land met horte en stote hervat. Lees meer op bladsy 2. Foto Katharina Moser, Allgemeine Zeitung

Vrydag is D-dag oor die Delta-variant

Kommentaar

Republikein 2025-11-05

Meld asseblief aan om kommentaar te lewer

Vrydag is D-dag oor die Delta-variant

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.