Vroue, kinders bloei in Namibië

Jo-Maré Duddy Diep wonde, gebreekte bene én tande – dís een uit elke vier getroude vroue in Namibië se beserings ná hul mans hulle onsedelik aangerand het. Sowat 24% doen snye, kneusings, oogbeserings, verstuitings, ontwrigtings en brandwonde tydens soortgelyke aanrandings op.Dié syfers is vervat in 'n 2013-opname deur die Namibië Statistiekagentskap (NSA) en die ministerie van gesondheid en maatskaplike dienste. Fokus het op dié studie geval ná die Instituut van Openbare Beleidsnavorsing (IPPR) verlede week 'n verslag oor geslagsgeweld in die land uitgereik het waarin hulle opnuut vir 'n omvattende gesprek oor dié euwel vra.Die beskikbaarheid van tydige en breedvoerige data oor die omvang van geslagsgeweld is uiters noodsaaklik, sê die IPPR.VerkragtingIn sy 2017-jaarverslag sê die Verenigde Nasies se Kinderfonds (Unicef) gemiddeld twee kinders jonger as agt word weekliks deur maatskaplike werkers by die polisie se beskermingseenheid teen geslagsgeweld in Windhoek hanteer.Een uit elke vier kinders van skoolgaande ouderdom is die slagoffer van onsedelike geweld.Die Regshulpsentrum (LAC) het verlede jaar 'n ontleding oor geslag in Namibië vir die Europese Unie (EU) gedoen waarin polisiestatistiek van 2003 tot 2015 aangehaal word. Hiervolgens word meer as 1 000 mense, meestal vroue, jaarliks in die land verkrag. Dit is gemiddeld bykans drie mense elke dag.Sowat 41% van alle verkragtings wat van 2003 tot 2012 aangemeld is, was kinderverkragtings. In dieselfde tydperk was kinders onder 18 die slagoffers van gemiddeld 35% van alle verkragtings, pogings tot verkragting en aanranding met die doel om te verkrag, volgens die LAC.Luidens polisiestatistiek was gemiddeld 39% van alle verkragtings van 2004 tot 2012 kinderslagoffers.Die laaste omvattende studie van verkragtingsake in Namibië is in 2006 gedoen, sê die LAC. Dit het bevind net 40% van sake wat by dié studie ingesluit is, het die volle regsproses voltooi. 'n Derde van die klaers het hul sake teruggetrek. Net 16% van beskuldigdes in sake van verkragting en poging tot verkragting is skuldig bevind.Die NSA se 2013-studie toon 31% van vroue van 15 tot 49 jaar in stede en 32% op die platteland was aan geweld onderworpe. Bykans 32% was werkloos en amper 43% het geen onderrig ontvang nie. Die helfte is deur hul mans of metgeselle aangerand, terwyl eksmans of –kêrels in bykans 20% van alle voorvalle die aanvallers is. Die prentjie vir verkragting lyk min of meer dieselfde.Sowat 10% se mans of lewensmaats slaan hulle dikwels of soms met die vuis of ander voorwerpe. Ses persent word dikwels of soms gedwing om seks te hê.Bykans 68% van vroue wat die slagoffer van fisieke en onsedelike geweld is, vrees die man in hul lewe die meeste van die tyd.Sowat 28% van mans of metgeselle wat hul vroue aan fisieke en seksuele geweld onderwerp, het net laerskool voltooi. Bykans 12% beskik oor meer as sekondêre onderrig.Bykans 53% van mans is baie dikwels dronk, terwyl 15% glad nie drink nie.Volgens die LAC blyk die politieke wil om geslagsgeweld te bekamp duidelik uit vele toesprake, konferensies en planne wat op dié kwessie fokus. Implementering bly egter steeds agterweë. “Die meeste (mense) sal saamstem geen beduidende vooruitgang is in die voorkoming of vermindering van geslagsgeweld gemaak nie en die regering se reaksie op slagoffers is steeds onvoldoende,” sê die LAC.In Februarie 2014 het die kabinet 14 aanbevelings oor geslagsgeweld gemaak. Die meeste is volgens die LAC nie geïmplementeer nie.

Vroue, kinders bloei in Namibië

Kommentaar

Republikein 2026-08-05

Meld asseblief aan om kommentaar te lewer

Vroue, kinders bloei in Namibië

Kommentaar

Republikein 2026-08-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.