Vroue duisend

Tanja Bause - Vandag word Wêreldvrouedag, soos elke jaar op 8 Maart sedert die vroeë 1900’s, gevier. Dié dag fokus op vroue se prestasies en bevorder bewustheid van geslagsgelykheid. In 1908 het 15 000 vroue aan ’n optog deur New York in die VSA deelgeneem om stemreg, beter betaling en korter werksure te eis.Die oorspronklike doel van die dag was om volkome geslagsgelykheid vir vroue oraloor die wêreld te bewerkstellig, wat vandag steeds nie ’n werklikheid is nie. Mans verdien steeds meer as vroue vir dieselfde hoeveelheid en vlak van werk, en vroue word steeds nie gelyk in die sake- of politieke wêreld verteenwoordig nie. Republikein het met Namibiese vroue oor hul uitdagings as vroue gesels.Me. Ina Cramer is oorspronklik van Duitsland, maar woon al die afgelope 20 jaar in Namibië. Sewe jaar gelede het sy kaas en roomys op haar plaas begin maak, en vier jaar gelede ’n roomyskafee in Windhoek se hoofstraat geopen. Sy verskaf restaurante en uitgesoekte kettingwinkels ook van haar tuisgemaakte roomys. Cramer verkoop roomysmasjiene en lei sjefs op lodges oraloor die land in die kuns van roomysmaak op. “Ek is oortuig daarvan baie mense neem my nie ernstig op nie omdat ek ’n vrou is,” sê sy.“Ek het in ’n gesin grootgeword waar dit altyd duidelik gemaak is meisies is net so slim, sterk en bevoeg soos seuns. Daar was nooit ’n verskil tussen die twee geslagte nie. Ek het ook met ’n man getrou wat dieselfde siening het en nooit twyfel aan my vermoë om ’n sukses van my besigheid te kan maak nie. “Ek dink dit sou wonderlik wees as vroue nie meer met stereotipiese denkwyses gekonfronteer word nie. As hulle hulself nie meer moet bewys nie, en as waardig aanvaar sou word. Maar dit is waarskynlik 'n ietwat onrealistiese idee – selfs vir die volgende 50 jaar.“Ek hoop vroue sal hul krag en potensiaal in die toekoms besef, en verstaan dit is nie selfsugtig nie, maar noodsaaklik dat hulle van hul idees en menings tot die samelewing bydra. Omdat dit vroue uiteindelik nie net nuwe moontlikhede bied nie, maar vroue se idees, oplossings en aanslag, wat dikwels fundamenteel van mans s’n verskil, is uiters belangrik in die bemeestering van hedendaagse uitdagings.”Me. Jaquiline Vemunikapi Pack is sedert September 2016 Bank Windhoek se uitvoerende beampte van bemarking en korporatiewe kommunikasie. Dié posisie behels dat sy verantwoordelik vir die implementering en bestuur van Bank Windhoek se algehele bemarking-, korporatiewe kommunikasie-, reputasie- en gemeenskapsbeleggingstrategieë is. “In 'n oorwegend manlike omgewing in die finansiële sektor kies ek om uitdagings as geleenthede te sien en ek gebruik dit tot my voordeel om deur my eie kommunikasiestyl te verseker dat my stem gehoor word,” sê Pack.“Wat geslagsgelykheid betref, dink ek ons is baie beter af as 'n paar jaar gelede. Daar is groter begrip van die verskillende vaardighede wat vroue na ’n organisasie bring en daarom word ons ernstiger opgeneem en ons insette word waardeer. Ek is vol vertroue dat meer geleenthede aan vroue toegewys sal word wanneer ons blind word vir geslag en op vaardighede, talent en bydraes tot die bou van volhoubare en tersaaklike organisasies en sterker ekonomieë fokus.“Ek dink nie sukses vir vroue moet gemeet word aan die aantal vroue in topposisies nie, maar eerder aan bemagtiging in terme van vaardighede en geleenthede sodat hulle aktief tot die ekonomie kan bydra. Ek wil graag 'n spanpoging van beide vroue en mans sien in die bou van 'n volhoubare Namibië.”Me. Anschen Kisting, oorspronklik van Keetmanshoop, is tans ’n derdejaarstudent aan die Namibië Universiteit van Wetenskap en Tegnologie (Nust). Sy is ’n aandeelhouer in Anne Pads in Windhoek, en die skakel tussen die gemeenskap en Anne Pads. Anne Pads vervaardig herbruikbare sanitêre doekies. Deur middel van borge word die doekies aan meisies geskenk, wat dit nie kan bekostig nie. “As vrou is daar nog altyd die opvatting dat ons die swakker geslag is en van mans afhanklik is. Dit is hoekom ek so vasberade is om onafhanklik te wees. Ek het gesien hoe meisies skool misloop wanneer hulle menstrueer. Daardeur loop hulle hul opvoeding mis. Ek het besluit om ’n oplossing te vind en seker te maak hulle kry ’n opvoeding en kan onafhanklik wees. Dit is hoe ek by Ann Pads betrokke geraak het. Ek moes ‘n manier vind om vroue ‘n gelyke kans op sukses te gee,” sê Kisting. “Ek hoop om in die volgende 10 jaar te sien dat meer meisies aan universiteite en kolleges gradueer. Ek wil meer gelykheid in die werkplek sien en meer vroue wat nie vir mans terugstaan nie en vir hulle regte veg.”

Vroue duisend

Kommentaar

Republikein 2026-08-04

Meld asseblief aan om kommentaar te lewer

Vroue duisend

Kommentaar

Republikein 2026-08-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.