Vrou verloor been ná Karibib-ongeluk

Ronelle Rademeyer - Die jong ma van Swakopmund wat verlede Vrydag veelvuldige, ernstige beserings opgedoen het toe ’n vermeende dronkbestuurder soos ’n “maniak” gejaag en ’n ongeluk buite Karibib veroorsaak het, se linkerbeen is Woensdag by die knie geamputeer.Me. Izanne van Deventer (32), se man, Johan, het gister aan Republikein gesê dit is ’n wonderwerk dat sy leef. Benewens die veelvuldige frakture wat sy in die ongeluk opgedoen het, was haar aorta ook geskeur. Dit is Vrydagaand in die Rooms-Katolieke hospitaal in Windhoek tydens ’n noodoperasie herstel. Sy was in ’n sedanvoertuig onderweg na Swakopmund toe ’n ander voertuig teen ’n geweldige hoë spoed van agter verskeie voertuie verbygesteek het terwyl ’n luukse sedan van voor af in aantog was. Die bestuurder van dáárdie sedan moes uitswaai en het trompop teen haar voertuig gebots.Me. Elzeth Harmse van Windhoek, wat in een van die voertuie was wat deur die “maniak”-bestuurder verbygesteek is, het vroeër vertel die bestuurder het “soos ’n maniak gejaag”. Hy het boonop nie eens stilgehou nadat die twee voertuie weens sy toedoen gebots het nie, maar is kort daarna op Usakos deur die polisie in hegtenis geneem.Van Deventer sê dit is moeilik om nie verbitterd te wees as jy vir jou kinders moet verduidelik waar hul ma is nie. Hulle het twee dogters, Nina (3) en Jani (10 maande). Hy sê Izanne het in hierdie stadium nog nie haar bewussyn volledig herwin nie. Sy is nog aan ’n ventilator gekoppel en die dokters gaan ook met nierdialise begin. “’n Mens kan net hoop dat wetstoepassing op die paaie verbeter. Volgens ooggetuies het hierdie man glo selfs links van die geel sperstreep ’n voertuig verbygesteek.”Hy sê die staat kan miljoene dollar per jaar spaar as teen sulke bestuurders opgetree word nog voordat hulle ongelukke veroorsaak. Intussen het mnr. Vaino Tangeni Shigweda, bestuurder van die gewraakte voertuig met die registrasiemerk N108 829W, vroeër die week voor landdros Jorene Jagger op vier klagte, waaronder dronkbestuur, in die landdroshof op Usakos verskyn.Die ander klagte is roekelose en nalatige bestuur, versuim om gehoor te gee aan die bevel van ’n wetstoepasser en versuim om by die toneel van ’n ongeluk stil te hou. Jagger is borgtog geweier en sy verhoor tot 18 Augustus vir verdere ondersoek uitgestel. Hy sal tot dan in aanhouding bly, tensy hy voor dit ’n formele aansoek om borgtog indien.

Vrou verloor been ná Karibib-ongeluk

Kommentaar

Republikein 2026-05-12

Meld asseblief aan om kommentaar te lewer

Vrou verloor been ná Karibib-ongeluk

Kommentaar

Republikein 2026-05-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.