Vrou verander voorkoms van Outjo-toerisme

“Wat ek nou doen, maak my baie gelukkig en tevrede,” sê Anastasia (Ansta) Gabathuler, toe Noorderlig haar ontmoet terwyl sy tussen twee restaurante wat sy tans bestuur, hardloop. Ansta het in 2010 die bekende Farmhouse omskep in ’n restaurant, gastehuis en biertuin, en sy bestuur op die oomblik ook die Culinarium Restaurant wat by die nuwe toeristesentrum van die Namibiese Ontwikkelingskorporasie (NDC) in die middel van die dorp geleë is. Haar toetrede tot die toerismesektor was nederig, sê sy. In 1996 het sy as skoonmaker by Kamp Setenghi (nou die nuwe Sâsâ Lodge) buite Outjo begin werk. Omdat sy meer belang gestel het in die lodge se kombuis, het die destydse eienaar haar gevra om daar uit te help. Hier het sy begin as aartappelskiller en vinnig geleer hoe om groente te kook. Sy onthou 1996 ook as die jaar wat sy haar eerste kaaskoek gebak het. Drie kort maande daarna het sy vir gaste begin kook, en ses maande later is sy alleen gelaat om die hele spyskaart se disse vir gaste voor te berei. Sy onthou hoe sy toe slegs N$300 per maand verdien het, maar omdat sy gretig was om te leer en die werk geniet het, het sy daarmee voortgegaan. In 1999 is sy met ’n groter salaris na Berg Plaas gelok waar sy as bestuurder, kok, kelnerin en skoonmaker gewerk het. Sy het vinnig by die eienaar geleer hoe om die besigheid se finansies te bestuur, en ’n jaar later het sy hom na Suid-Afrika gevolg waar sy ook by ’n lodge gewerk het. Dit was in daardie tyd wat sy haar toekomstige man, Urs Gabathuler, ontmoet het. Hy was toe ’n Switserse toeris in Suid-Afrika. Die paartjie is in 2003 in Switserland getroud en het in Oktober daardie jaar hulle daar gaan vestig. In Switserland het sy eers as skoonmaker by ’n pizzeria begin werk en later opleiding as fyngebaksjef ontvang. “As jy nie ’n Switserse burger is nie, word jy nie sommer erken as ’n sjef nie, dus moes ek baie hard leer,” onthou Ansta. Die paartjie het in 2005 besluit om na Namibië te verhuis toe sy met hul eerste kind swanger was, en sy het begin uitkyk om ’n bed-en-ontbyt-onderneming te begin. Omdat sy nie ’n plek kon koop nie, het sy by lodges uitgehelp. Nadat sy in 2009 geboorte aan haar tweede baba geskenk het, het Gabathuler ál besiger op lodges begin word. ’n Ondenkbare tragedie het die jong gesin getref toe haar twee seuns Leon-Ndele (drie jaar) en Simon-Nandume (vier maande), en haar jonger suster, me. Bertina !Uwu-//Khaes in die oggendure van 4 Mei 2009 deur laasgenoemde se kêrel vermoor is. Ansta sê die verskriklike persoonlike verlies het haar lank lamgelê, maar later in daardie jaar het sy uit die skadu van haar hartseer opgestaan en haar belangstelling in die Farmhouse Restaurant aan die voormalige eienaars bekend gemaak. Sy en haar man het begin om die gebou op te knap en ná maande se gepleit by plaaslike banke is sy ’n lening toegestaan en kon sy die inhoud koop en die besigheid huur. Sedert die Farmhouse Restaurant in September 2010 in haar naam geregistreer is, het sy dit aanvanklik as ’n koffiewinkel bestuur en mettertyd begin om koeke te bak. Ansta onthou dat sy baie kritiek van veral wit inwoners op die dorp gekry het. “Hulle het gesê ek sou dit nie maak nie, maar ek is nie ’n hoender nie en Afrika is nie vir hoenders nie,” skerts sy. Sy het begin met aggressiewe bemarking en het met haar uitsonderlike bakvernuf skeptiese inwoners in getroue kliënte verander. “Ons bied iets anders aan die dorp en sy gaste,” sê Ansta nou.Vroeër het Outjo se kuierplekke al vyfuur in die middag gesluit. Ansta het die logiese ding gedoen en haar besigheidsure van 06:30 tot 22:00 verleng en het onmiddellik ’n treffer by ’n ieder en ’n elk geword. Op 12 September dié jaar het Ansta die NDC-restaurant begin bestuur. Vir dié geleentheid het sy op eie koste vir 450 bejaardes van die dorp ’n groot partytjie gehou “om hul seën te kry”. Die Bistro Culinarium Restaurant bied wegneemetes, kunswerke van die plaaslike gemeenskap en daaglikse tradisionele toere aan. Op Saterdag 25 Oktober het die Calinarium begin met ’n maandlange handelskou om geld in te samel om kos aan straatkinders te voorsien. “Ons het genoeg dorpsmense en toeriste om die lewe vir almal beter te maak,” sluit sy af.

Vrou verander voorkoms van Outjo-toerisme

Kommentaar

Republikein 2025-06-09

Meld asseblief aan om kommentaar te lewer

Vrou verander voorkoms van Outjo-toerisme

Kommentaar

Republikein 2025-06-09

Meld asseblief aan om kommentaar te lewer

MELD AAN

Advertensie