Vrou sleep ekskêrel hof toe oor MIV-status

Marc Springer – In 'n ongewone vergoedingseis dagvaar 'n vrou haar ekskêrel vir N$5,3 miljoen in skadevergoeding. Sy beweer hy het haar met die MIV-virus geïnfekteer en 'n belofte van 'n huwelik, wat hy byna vyf jaar gelede aan haar gemaak het, verbreek.In haar hofdokumente beweer die klaer sy en die verweerder was tussen November 2016 en Desember 2017 in 'n romantiese verhouding betrokke. Sy beweer die respondent het haar gedurende dié tydperk onregmatig en onwettig gedwing om onbeskermde seks met hom te hê terwyl hy oneerlik was oor sy positiewe MIV-status.Die klaer voer aan hy het haar óf met opset geïnfekteer, óf met haar seksuele omgang gehad sonder om sy MIV-status bekend te maak, óf versuim om 'n mate van beskerming te gebruik “wat normaalweg onder die huidige omstandighede van 'n redelike persoon in 'n romantiese verhouding verwag word”. Gevolglik is sy ook geïnfekteer en sy is geregtig op vergoeding vir die skade wat sy gely het.Hieronder lys die klaer vorige en toekomstige mediese uitgawes van N$155 000 en N$500 000 vir pyn en lyding wat sy na bewering verduur het weens die MIV-infeksie. Daarbenewens eis sy skadevergoeding van N$1 miljoen vir 'n vermeende skending van haar grondwetlike reg op menswaardigheid en vir 'n verlies aan lewensgehalte.Sy beweer verder die verweerder het haar rondom 14 Desember 2016 gevra om te trou en sy het die huweliksaanbod aanvaar. Die troue sou glo op 17 Desember 2017 in Windhoek plaasvind. Sy sê verder hy het in Augustus 2017 dié aanbod teruggetrek en haar vir 'n ander vrou verlaat. Volgens die klaer is daar ingevolge die huweliksaanbod ooreengekom dat sy uit haar pos as kliëntedienskonsultant sou bedank en 'n studierigting in openbare betrekkinge sou volg.Om dié rede het sy glo op 28 Februarie 2017 bedank en sodoende haar maandelikse inkomste van N$8 500 verbeur en gevolglik tot op hede 'n verlies van N$684 000 gely, waarvoor die respondent aanspreeklik was. As 'n verdere gevolg van die beweerde kontrakbreuk eis sy ook N$3 miljoen vir die “verlies aan finansiële voordele van die huwelik” en N$6 000 as terugbetaling vir “geld wat onnodig op strooimeisierokke bestee is”.In sy pleitverduideliking voer die verweerder aan seksuele omgang met die klaer was altyd konsensueel en dat hulle nooit sy MIV-status bespreek het nie. Verder beweer hy hy was gedurende die verhouding nie bewus van sy MIV-status nie en dat hy nooit vir die klaer gesê het hy is MIV-negatief nie. Hy ontken verder dat hy die virus aan haar oorgedra het of ooit dié bedoeling gehad het.Hy voer verder aan hy het nooit die klaer gevra om te trou nie en kon dus nie onregmatig optree deur die verhouding met haar te beëindig nie. Hy sê ook hy het nooit van die klaer verwag om te bedank nie en kan dus nie aanspreeklik gehou word vir haar verlies aan inkomste nie. Verder hou hy vol die eis vir die verbreekte belofte van 'n huwelik is nie geldig nie en moet dus ingevolge die Namibiese Grondwet van die hand gewys word.Die saak is Woensdag deur hoërhofregter Hannelie Prinsloo aangehoor en is tot 29 Julie uitgestel vir 'n verdere statusverhoor. Mnr. Mbushandje Ntinda van Sisa Namandje & Co. verteenwoordig die eiser, en mnr. Norman Tjombe die verweerder.- republikein@republikein.com.na

Vrou sleep ekskêrel hof toe oor MIV-status

Kommentaar

Republikein 2025-09-02

Meld asseblief aan om kommentaar te lewer

Vrou sleep ekskêrel hof toe oor MIV-status

Kommentaar

Republikein 2025-09-02

Meld asseblief aan om kommentaar te lewer

MELD AAN

Advertensie