Vrou ernstig beseer ná koei haar aanval

Tanja Bause - ’n Vrou van Windhoek sterk in ’n hospitaal aan nadat sy deur ’n melkkoei aangeval en ernstig beseer is. Me. Diana Kaufmann is op 27 Augustus op ’n plaas naby Nina aangeval waar sy en haar man, Fritz, vir die naweek gekuier het. Volgens Fritz is die koei sowat 13 jaar oud en het sy ’n kalf wat met die bottel grootgemaak word, omdat sy nie genoeg melk het nie. Die Saterdagoggend is die egpaar saam met vier werkers na die kraal wat langs die huis geleë is om oudergewoonte die kalf te voer. Volgens Fritz het die koei rustig met haar kalf in die kraal gelê. Die werkers het die kalf by die koei gaan haal en dit na ’n skaduplek geneem om te voer. Fritz en Diana het by die werkers gaan staan. Volgens Fritz het die koei stadig opgestaan en in hul rigting beweeg. “Sy was baie rustig en het sowat twee meter van Diana gaan staan en na ons gekyk. Die volgende oomblik het die koei haar aangeval.”Die koei het Diana omgestamp, op haar knieë neergesak en Diana met die kop gestamp. “Dit was soos ’n buffelaanval. Die koei het opgespring, omgedraai en weer bo-op Diana op haar knieë neergesak en haar met die kop gestamp. Sy het dit drie keer gedoen.”Elke keer wanneer die koei opgespring het, het Fritz en die werkers probeer om Diana uit die pad van die dier te sleep. “Die koei was egter baie vinnig en soos ’n aggressiewe buffel. Ná die derde aanval kon ons Diana onder haar arms gryp en by die hek uitkry.”Fritz het Diana op die grasperk gestabiliseer, terwyl E-Med Rescue 24 ook laat weet is wat onmiddellik ’n ambulans gestuur het. Volgens hom het hy Diana in sy motor gelaai en met haar die 70 kilometer grondpad Windhoek toe gejaag. Die ambulans het hom onderweg na Windhoek ontmoet waarna Diana oorgeplaas en na die Mediclinic-hospitaal gehaas is. Sy is met ’n gekraakte skedel, bloeding op die brein, gebreekte ribbes en pols, asook ’n geskeurde lewer en ’n gat in haar een long in die hospitaal opgeneem. Diana was vir agt dae in die intensiewesorgeenheid en sterk nou in ’n saal in die hospitaal aan. Die volgende stap is rehabilitasie wat vyf weke sal duur. “Dit gaan al baie beter met haar, sy is al weer besig om my rond te stuur,” sê Fritz. Volgens hom het sy eerstehulpkennis wat hy in die weermag opgedoen het, die flinke en professionele optrede van E-Med Rescue 24 asook die dokters en verpleegsters van die Mediclinic-hospitaal sy vrou se lewe gered. “Ek het nie die koei van kant gemaak nie, omdat sy nog nooit so iets gedoen het nie. Dit was ’n fratsongeluk en heeltemal teen haar natuur.” Die enigste verklaring wat hy vir die aanval het, is dat die koei kon dink Diana is ’n hond. Volgens Fritz is die kraal langs die huis geleë en word die koeie en kalwers gereeld deur die honde geterg. “Diana het met die honde gespeel en dalk soos hulle geruik. Die koei het dus die reuk van ’n hond gekry wat by haar kalf staan en het dienooreenkomstig opgetree.1396986481

Vrou ernstig beseer ná koei haar aanval

Kommentaar

Republikein 2026-02-04

Meld asseblief aan om kommentaar te lewer

Vrou ernstig beseer ná koei haar aanval

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.