Vreugdevure brand hoog oor toerisme

Francoise Steynberg - Die vreugdevure het gisteraand hoog gebrand by die 19de Namibië Toerisme Ekspo (NTE) by die Windhoekse skouterrein, met toerisme in Namibië wat van krag tot krag gaan.“Oor die afgelope jare het ons toerismebedryf prysenswaardige groei getoon. Ons toeriste-aankomste in ons land het 'n aansienlike verhoging getoon, wat beteken ons gaan steeds van krag tot krag,” het die minister van die omgewing en toerisme, mnr. Pohamba Shifeta, gisteraand tydens die amptelike opening van die NTE gesê.“Hierdie prestasie word aan beide eksterne en interne faktore toegeskryf, dus om die groei te handhaaf, het alle rolspelers 'n belangrike rol om te speel om potensiële besoekers en beleggers te lok.” Shifeta sê die toerisme ekspo dien as 'n platform vir die Namibiese toerismebedryf om hul produkte en dienste te bevorder en te bemark. “Geleenthede van hierdie omvang is goed vir toerisme en ons blootstelling as 'n bestemming. Meer besoekers van oor die wêreld sal bewus raak van Namibië en die land wil besoek,” het hy gesê. Die minister doen 'n beroep op alle uitstallers om die ekspo as 'n bykomende platform te gebruik om hul produkte ten toon te stel en bande met potensiële kliënte en verskaffers tot voordeel van die land te skep en te versterk. “Ons moet bewus wees van die mededingendheid van ander bestemmings in die streek. Dit is waarom ons nie tevrede moet bly met die huidige stand van die toerismebedryf nie, maar hard werk om ons posisie voortdurend te versterk.”Die uitvoerende hoof van Namibia Media Holdings, mnr. Albe Botha, het grappenderwys pres. Donald Trump verkeerd aangehaal: “Laat ons voortgaan om Namibië as die bestemming van keuse te maak, want ons was altyd wonderlik, maar nie almal weet dit reeds nie.” Botha het die Verantwoordelike Toerisme-toekennings (RTA) se wenner van 2017, Wilderness Safaris Hoanib Skeleton Coast Camp, geluk gewens wat deur Eco Awards aangewys is. VEILIGE REISShifeta sê vanjaar se tema vir die NTE, Veilige Reis, speel 'n deurslaggewende rol in toerisme, omdat dit die land se beeld as uitstekende toeristebestemming verbeter weens die positiewe rekord oor toeristeveiligheid.“Namibië is alombekend as 'n selfbestuurbestemming en as ons nie ons paaie veilig hou nie, kan ons daardie mark verloor. Ek kan nie die belangrikheid van veiligheid en sekuriteit tot ons ekonomie, veral vir toerisme, oorbeklemtoon nie,” het hy gesê.“Ek wil hê ons moet 'n geen-verdraagsaamheid-benadering teenoor misdaad teen toeriste verklaar, asook teen diegene wat onder die invloed van alkohol bestuur en skuldig aan misdaad teen Namibiese wildlewe is.”Die minister van werke en vervoer, mnr. Alpheus !Naruseb, het gesê Namibië is trots op die konstruksie en instandhouding van 'n wêreldklas vervoerinfrastruktuur, maar “ons het grusame padongelukke waarin toeriste betrokke is wat ons beeld kan skade berokken”. “Vir ons om 'n land van keuse vir toeriste te wees, moet ons ons deel rakende die veiligheid en sekuriteit van ons besoekers verseker. Negatiewe publisiteit oor padongelukke van toeriste is nie goed vir ons land nie,” het !Naruseb gesê.Die NTE duur tot Saterdag.

Vreugdevure brand hoog oor toerisme

Kommentaar

Republikein 2025-09-02

Meld asseblief aan om kommentaar te lewer

Vreugdevure brand hoog oor toerisme

Kommentaar

Republikein 2025-09-02

Meld asseblief aan om kommentaar te lewer

MELD AAN

Advertensie